সঁচাকৈয়ে ৰিয়েল হিৰ’ বুলি ক’লে যাক কোৱা হয় তেনে এগৰাকী ব্যক্তিতেই পৰিণত হৈছে বিহাৰৰ এগৰাকী অধ্যাপক। বিহাৰৰ নীতিশৱাৰ মহাবিদ্যালয়ৰ হিন্দী বিষয়ৰ অধ্যাপক ড০ লালন কুমাৰে বিগত প্ৰায় দুবছৰ ধৰি শ্ৰেণীত কোনো ছাত্ৰ-ছাত্ৰীকে পাঠদান কৰিব পৰা নাই।
কাৰণ হিন্দী ভাষাৰ শ্ৰেণীলৈ কোনো শিক্ষাৰ্থীয়ে দুবছৰে পাঠগ্ৰহণ কৰিবলৈ অহা নাই। মহাবিদ্যালয় খনৰ প্ৰায় ভাগ শিক্ষাৰ্থীয়েই এনেদৰে শ্ৰেণীত উপস্থিত থকাৰ পৰা বিৰত হৈ আহিছে।
শৈক্ষিক পৰিবেশ বিনষ্ট হৈ পৰা মহাবিদ্যালয় খনত অধ্যাপনা কৰি সেয়ে মুঠেও সুখী নহয় অধ্যাপক ড০ লালন কুমাৰ। সেয়ে দুবছৰে কোনো শিক্ষাৰ্থীকে পাঠদান কৰিব নোৱাৰা অধ্যাপকগৰাকীয়ে সততাৰ পৰিচয় দি তেওঁৰ দৰমহাৰ ২৩ লক্ষাধিক টকা মহাবিদ্যালয় কৰ্তৃপক্ষক ঘূৰাই দিছে। অধ্যাপকগৰাকীৰ এনে মহৎ কাৰ্যই বহুতকে অনুপ্ৰেৰণা যোগাইছে।
যিটো সময়ত বহুতে কাম নকৰাকৈয়ে চৰকাৰী দৰমহা লৈ আছে, তেনে সময়তে ড০ লালন কুমাৰৰ কাৰ্য এক আদৰ্শ হিচাবে পৰিগণিত হৈছে।। শ্ৰেণীত পাঠদান কৰিব নোৱাৰাৰ বাবেই ড০ লালন কুমাৰে ২ বছৰ ৯ মাহৰ সম্পূৰ্ণ দৰমহা ২৩ লাখ ৮২ হাজাৰ ২২৮ টকা কৰ্তৃপক্ষক ঘূৰাই দিছে।
বিশ্ববিদ্যালয়ৰ পঞ্জীয়ক ড০ আৰ কে ঠাকুৰৰ হাতত অধ্যাপকগৰাকীয়ে সেই ধনৰ চেক দিয়ে যদিও পঞ্জীয়কে চেক খন ৰাখিবলৈ অসন্মত হয়। তেতিয়াই অধ্যাপকগৰাকীয়ে চেক গ্ৰহণ নকৰিলে চাকৰিয়েই এৰি দিব বুলি কোৱাত অৱশেষত পঞ্জীয়কে চেক খন গ্ৰহণ কৰে। ৷
এই প্ৰসংগত লালন কুমাৰে কয় ” জাতিৰ পিতা মহাত্মা গান্ধীৰ চিন্তাধাৰাৰ মই অনুগামী, সেয়ে কাম নকৰাকৈ ধন গ্ৰহণ কৰাটো মই মানি ল’ব নোৱাৰো, সেইবাবেই মই দৰমহা ঘূৰাই দিছো।” উল্লেখ্য বিহাৰৰ বৈশালী জিলাৰ এটা সাধাৰণ পৰিয়ালৰ সন্তান ড০ লালন কুমাৰ ।
তেওঁ জৱাহৰলাল নেহৰু বিশ্ববিদ্যালয়ৰ পৰা হিন্দী বিষয়ত স্নাতকোত্তৰ ডিগ্ৰী গ্ৰহণ কৰিছিল আৰু দিল্লী বিশ্ববিদ্যালয়ৰ পৰা পিএইচডিও লাভ কৰিছিল। শৈক্ষিক জীৱনত সোণৰ পদক অৰ্জন কৰা লালন কুমাৰে ২৪ ছেপ্টেম্বৰ, ২০১৯ত মহাবিদ্যালয় খনত যোগদান কৰিছিল৷ কিন্তু মহাবিদ্যালয় খনৰ শৈক্ষিক পৰিবেশৰ বাবে তেওঁ এতিয়া দৰমহা ল’ব নোৱাৰা হৈ পৰিছে। লালন কুমাৰে কয় যে যি কোনো মূল্যৰ বিনিময়তে মহাবিদ্যালয় খনৰ শৈক্ষিক পৰিবেশ ঘূৰাই আনিবই লাগিব।
