বিশ্ব ত্ৰাস ক’ৰ’না ভাইৰাছৰ সংক্ৰমণ প্ৰতিৰোধৰ বাবে সমগ্ৰ দেশৰ লগতে অসমতো অব্যাহত থকা দ্বিতীয় পৰ্য্যায়ৰ লকডাউনৰ মাজতে ভুতৰ ওপৰত দানৱ পৰাৰ দৰে পৰিস্থিতিৰ সন্মুখিন হ’ব লগীয়া হৈছে ৰাজ্যৰ গাহৰি পালক সকলে।
উজনি অসমৰ কেইবাখনো জিলাত অচিন ৰোগত আক্ৰান্ত হৈ বহুসংখ্যক গাহৰিৰ ইতিমধ্যে মৃত্যু মুখত পৰাৰ ঘটনাই সম্প্ৰতি নগাঁও জিলাৰ পুৰণিগুদামৰ একাংশ শিক্ষিত নিৱনুৱা গাহৰি পালকৰ মনতো বাৰুকৈয়ে শংকাৰ সৃষ্টি কৰিছে।
পুৰণিগুদামৰ পানীগাঁও অঞ্চলৰ কেইজনমান উচ্চ শিক্ষিত নিৱনুৱা যুৱকে প্ৰায় তিনি লক্ষ্যাধিক টকা ব্যয় সাপেক্ষে এবছৰ পূৰ্বৰ পৰা কলং নৈ বাকৰিৰ এক নিৰ্জন স্থানত আৰম্ভ কৰিছিল ব্যৱসায় ভিত্তিক গাহৰি প্ৰতিপালনৰ কাম।
স্বোৱাইন ফ্লু আদিৰ ৰোগৰ প্ৰতিষেধক টিকা ইতিমধ্যে যুৱক কেইজনে ফাৰ্ম খনত পোহা ষোল্লটাকৈ গাহৰিক প্ৰদান কৰিছে আৰু বৰ্তমান সুস্থ ফাৰ্ম খনৰ আটাইকেইটা গাহৰিয়ে। তথাপিও চিন্তিত হৈ পৰিছে পুৰণিগুদামৰ যুৱ গাহৰি পালক কেইজন।
বৃহত্তৰ পুৰণিগুদামৰ লগতে ৰাজ্যৰ আন-আন জিলালৈ এই অচিন ৰোগ সংক্ৰমীত হোৱা পূৰ্বেই সংশ্লিষ্ট বিভাগ তথা চৰকাৰ খনে বিহিত ব্যৱস্থা কৰি ৰাজ্যৰ সমূহ গাহৰি পালকক নিশ্চিত লোকচানৰ পৰা ৰক্ষা কৰিবলৈ আহ্বান জনাইছে পুৰণিগুদামৰ যুৱ গাহৰি পালক কেইজনে।
অন্যথা এতিয়াই বিভাগীয় মন্ত্ৰী গৰাকীয়ে তৎপৰতাৰে কোনো উচিত পদক্ষেপ গ্ৰহণ নকৰিলে ৰাজ্যৰ বাকী সমূহ অঞ্চলৰ নিৱনুৱা গাহৰি পালক সকল যে বৃহৎ আৰ্থিক ক্ষতিৰ সন্মুখীন হ’ব সেয়া নিশ্চিত।
