২০১৭ চনৰ উন্নাও ধৰ্ষণ গোচৰৰ মূল অভিযুক্ত তথা বিজেপিৰ পৰা বহিষ্কৃত নেতা কুলদীপ সিং চেংগাৰৰ শাস্তি স্থগিত ৰখাৰ বিষয়টোক লৈ এতিয়া উচ্চতম ন্যায়ালয়ত তীব্ৰ আইনী যুঁজ আৰম্ভ হৈছে। দিল্লী উচ্চ ন্যায়ালয়ে চেংগাৰৰ আজীৱন কাৰাদণ্ডৰ শাস্তি স্থগিত ৰাখি যি নিৰ্দেশ দিছিল, তাক প্ৰত্যাহ্বান জনাই কেন্দ্ৰীয় তদন্তকাৰী সংস্থা চিবিআইয়ে উচ্চতম ন্যায়ালয়ৰ দ্বাৰস্থ হৈছে। এই স্পৰ্শকাতৰ আবেদনখনৰ শুনানি অহা ২৯ ডিচেম্বৰত শীৰ্ষ আদালতত অনুষ্ঠিত হ’ব বুলি জানিব পৰা গৈছে।
উচ্চতম ন্যায়ালয়ৰ কাৰণ তালিকা অনুসৰি মুখ্য ন্যায়াধীশ সূৰ্য্য কান্তৰ নেতৃত্বত গঠিত এখন বিচাৰপীঠে এই শুনানি গ্ৰহণ কৰিব। এই বিচাৰপীঠত ন্যায়াধীশ জে কে মহেশ্বৰী আৰু ন্যায়াধীশ অগাস্টিন জৰ্জ মাছিহো অন্তৰ্ভুক্ত আছে। কেৱল চিবিআইয়েই নহয়, উচ্চ ন্যায়ালয়ৰ সেই নিৰ্দেশক প্ৰত্যাহ্বান জনাই অধিবক্তা অঞ্জলী পেটেল আৰু পূজা শিল্পকাৰেও পৃথক আবেদন দাখিল কৰিছে, যাৰ শুনানিও একেদিনাই অনুষ্ঠিত হ’ব।
উল্লেখ্য যে কুলদীপ সিং চেংগাৰে ইতিমধ্যে সাত বছৰ পাঁচ মাহৰ কাৰাদণ্ড সম্পূৰ্ণ কৰাৰ পৰিপ্ৰেক্ষিতত দিল্লী উচ্চ ন্যায়ালয়ে তেওঁৰ আজীৱন কাৰাদণ্ডৰ শাস্তি স্থগিত ৰাখিছিল। চেংগাৰে ২০১৯ চনৰ নিম্ন আদালতৰ ৰায়ক প্ৰত্যাহ্বান জনাই যি আবেদন কৰিছিল, তাৰ নিষ্পত্তি নোহোৱালৈকে এই ৰেহাই দিয়া হৈছিল। চিবিআইয়ে যোৱা ২৬ ডিচেম্বৰত এই নিৰ্দেশৰ বিৰুদ্ধে উচ্চতম ন্যায়ালয়ত আবেদন কৰিছিল। অৱশ্যে ধৰ্ষণৰ বলি হোৱা কিশোৰীগৰাকীৰ পিতৃৰ জিম্মাত মৃত্যু হোৱা আন এক গোচৰত ১০ বছৰৰ শাস্তি ভুগি থকাৰ বাবে চেংগাৰ এতিয়াও কাৰাগাৰৰ পৰা ওলাই আহিব পৰা নাই।
উচ্চ ন্যায়ালয়ে চেংগাৰক ১৫ লাখ টকাৰ ব্যক্তিগত বণ্ড আৰু তিনিজন জামিনদাৰৰ বিনিময়ত এই সকাহ দিছিল। লগতে তেওঁৰ ওপৰত কেইবাটাও কঠোৰ চৰ্ত আৰোপ কৰা হৈছিল। যাৰ ভিতৰত আছিল ধৰ্ষণৰ বলি হোৱা মহিলাগৰাকীৰ দিল্লীৰ বাসগৃহৰ পৰা ৫ কিলোমিটাৰ ব্যাসাৰ্ধৰ ভিতৰত তেওঁ সোমাব নোৱাৰিব। ইয়াৰ উপৰিও ভুক্তভোগী মহিলাগৰাকী বা তেওঁৰ মাতৃক কোনো ধৰণৰ ভাবুকি প্ৰদান নকৰিবলৈও কোৱা হৈছিল। এই যিকোনো এটা চৰ্ত উলংঘা কৰিলে তেওঁৰ জামিন বাতিল হ’ব বুলি আদালতে স্পষ্ট কৰি দিছিল।
মন কৰিবলগীয়া যে ২০১৯ চনৰ ১ আগষ্টত উচ্চতম ন্যায়ালয়ৰ নিৰ্দেশতে এই সমগ্ৰ ধৰ্ষণ গোচৰটো উত্তৰ প্ৰদেশৰ পৰা দিল্লীৰ আদালতলৈ স্থানান্তৰ কৰা হৈছিল। ইফালে ভুক্তভোগীৰ পিতৃৰ মৃত্যুৰ গোচৰত লাভ কৰা শাস্তিও স্থগিত ৰাখিবলৈ চেংগাৰে আবেদন কৰিছে, যিখন আবেদন বৰ্তমান বিচাৰাধীন হৈ আছে। সমগ্ৰ দেশ কঁপাই যোৱা এই জঘন্য কাণ্ডৰ শেহতীয়া আইনী প্ৰক্ৰিয়াই এতিয়া সকলোৰে দৃষ্টি আকৰ্ষণ কৰিছে।
