উন্নাও ধৰ্ষণ গোচৰৰ অন্যতম দোষী কুলদীপ সিং চেংগাৰৰ বাবে পুনৰ এক বেয়া খবৰ আহি পৰিছে। সোমবাৰে উচ্চতম ন্যায়ালয়ে চেংগাৰৰ জামিন আবেদনৰ শুনানি গ্ৰহণ কৰিবলৈ অস্বীকাৰ কৰে। ভুক্তভোগীৰ পিতৃৰ জিম্মাত হোৱা মৃত্যুৰ সৈতে জড়িত গোচৰটোত ১০ বছৰৰ কাৰাদণ্ডৰ বিৰুদ্ধে দাখিল কৰা আবেদনখনৰ সন্দৰ্ভত উচ্চতম ন্যায়ালয়ে দিল্লী উচ্চ ন্যায়ালয়কহে এই বিষয়ত অগ্ৰাধিকাৰ ভিত্তিত শুনানি গ্ৰহণ কৰিবলৈ নিৰ্দেশ দিয়ে।
মুখ্য ন্যায়াধীশ সূৰ্য্য কান্ত, ন্যায়াধীশ জয়মল্য বাগচী আৰু এন ভি ৰমনাৰ বিচাৰপীঠে এই শুনানি গ্ৰহণ কৰিছিল। যোৱা ১৯ জানুৱাৰীত দিল্লী উচ্চ ন্যায়ালয়ে চেংগাৰৰ শাস্তি স্থগিত ৰাখিবলৈ অস্বীকাৰ কৰিছিল আৰু সেই নিৰ্দেশক প্ৰত্যাহ্বান জনাই চেংগাৰে উচ্চতম ন্যায়ালয়ৰ দ্বাৰস্থ হৈছিল। উল্লেখ্য যে ২০১৮ চনত ভুক্তভোগী যুৱতীগৰাকীৰ পিতৃক এটা মিছা গোচৰত গ্ৰেপ্তাৰ কৰা হৈছিল আৰু তাৰ কিছুদিন পিছতে ন্যায়িক জিম্মাত তেওঁৰ মৃত্যু হৈছিল। ২০২০ চনত দিল্লী উচ্চ ন্যায়ালয়ে চেংগাৰ আৰু তেওঁৰ ভাতৃসহ আন কেইবাজনকো এই ষড়যন্ত্ৰত দোষী সাব্যস্ত কৰি দহ বছৰৰ কাৰাদণ্ড বিহিছিল।
আদালতত চেংগাৰৰ অধিবক্তাই যুক্তি দিছিল যে তেওঁ ইতিমধ্যে সাত বছৰতকৈ অধিক সময় কাৰাগাৰত কটাইছে। আনহাতে চিবিআইৰ হৈ ছলিচিটৰ জেনেৰেল তুষাৰ মেহতাই জনাইছিল যে দোষী সাব্যস্ত হোৱাৰ বিৰুদ্ধে মূল আবেদনখন ১১ ফেব্ৰুৱাৰীত শুনানিৰ বাবে আছে। ইফালে ভুক্তভোগীৰ অধিবক্তাই দোষীৰ শাস্তি ৩০৪ ধাৰাৰ পৰা ৩০২ ধাৰালৈ বৃদ্ধি কৰি যাৱজ্জীৱন কাৰাদণ্ডৰ দাবী উত্থাপন কৰিছে।
উচ্চতম ন্যায়ালয়ে মন কৰিবলৈ দিছে যে চেংগাৰে ইতিমধ্যে আন এটা সুকীয়া ধৰ্ষণ গোচৰত যাৱজ্জীৱন কাৰাদণ্ডৰ শাস্তি ভুগি আছে। যদিও যোৱা ডিচেম্বৰ মাহত দিল্লী উচ্চ ন্যায়ালয়ে এটা গোচৰত তেওঁক জামিন দিছিল, কিন্তু উচ্চতম ন্যায়ালয়ে পাছত সেই নিৰ্দেশ স্থগিত ৰাখিছিল। আদালতৰ মতে এই গোচৰৰ বিশেষ পৰিস্থিতিৰ প্ৰতি লক্ষ্য ৰাখি অভিযুক্তক মুকলি কৰি দিব পৰা নাযায়।
