২০১৯ চনত মুক্তিপ্ৰাপ্ত আয়ুস্মান খুৰানা অভিনীত বলীউডৰ জনপ্ৰিয় চিনেমা ‘বালা’ নিশ্চয় চাইছে। চিনেমাখনত এজন চুলিহীন যুৱকৰ চৰিত্ৰত অভিনয় কৰা আয়ুস্মান খুৰানাই নিজকে চুলিসহ সুদৰ্শন চেহেৰাৰ যুৱকৰ ৰূপত গঢ়ি তুলিবলৈ কৰা প্ৰচেষ্টা আৰু আন কিছু দৃশ্যই আপোনাৰ মনত নিশ্চয় হাস্যৰসৰ সৃষ্টি কৰিছিল।
বিবাহৰ ক্ষেত্ৰতো চুলি নথকাৰ বাবেই কন্যাঘৰৰ পৰা বাৰে বাৰে নাকচ হোৱা আয়ুস্মান খুৰানাই কিদৰে মানসিক অন্তৰ্দ্বন্দ্বত ভুগিছিল সেয়াও আপুনি দেখিছিল। নিজৰ এই চুলিহীন অৱয়ব লুকুৱাই ৰাখি বিয়াৰ পিছত পাৰিবাৰিক সমস্যাৰ সন্মুখীন হয় মূল নায়কৰূপী আয়ুস্মান।
কিন্তু এই সকলো পৰিস্থিতিৰ পৰা সবলভাৱে ওলাই আহি সমাজৰ কিছুমান প্ৰচলিত ধাৰণা আৰু বডী শ্বেমিঙৰ এই ভয়াৱহ দিশটোৰ সৈতে কেনেদৰে মোকাবিলা কৰিছিল সেয়াও আপোনালোকে নিশ্চয় উপভোগ কৰিছে।
সাধাৰণতে আমাৰ সমাজত চলি থকা বডী শ্বেমিঙৰ আতিশয্যৰ বিৰুদ্ধে বালা চিনেমাখনে এক সুদৃঢ় ধাৰণা গঢ়ি তুলিছিল। চিনেমাখনৰ ই আছিল আটাইতকৈ লক্ষ্যণীয় দিশ।
পিছে এইবাৰ চিনেমাত নহয়, বাস্তৱত এনে এক সমস্যাৰ সন্মুখীন হৈছে উত্তৰ প্ৰদেশৰ এজন যুৱক। ৰাজ্যখনৰ উন্নাও জিলাত এগৰাকী যুৱকে নিজৰ চুলিহীন অৱয়বৰ কথা লুকুৱাই ৰাখি এগৰাকী যুৱতীৰ সৈতে বিবাহপাশত আৱদ্ধ হ’বলৈ আগবাঢ়ে। কিন্তু বিবাহথলীতে হঠাৎ হয় অঘটন।
দৰাজন বিবাহ মণ্ডপলৈ যোৱাৰ সময়তে হঠাত মূৰ ঘূৰাই মূৰ্চ্ছা যায়। দৰাজন মাটিত ঢলি পৰাৰ লগে লগে তেওঁ পৰিধান কৰি থকা উইগটো ওলাই পৰে। লগে লগে বিবাহথলীত সমবেত সকলোৱে দৰাজনৰ প্ৰকৃত চেহেৰা দেখিবলৈ পায়।
কন্যাঘৰক দৰাজনে এই কথা অন্ধকাৰত ৰাখি বিবাহৰ বাবে আগবঢ়াৰ বাবে কইনাই বিবাহ অনুষ্ঠানলৈ আগবাঢ়িবলৈ অস্বীকাৰ কৰে। পৰিয়ালৰ সদস্য আৰু আত্মীয়সকলে কইনাগৰাকীক বিবাহত বহিবলৈ সৈমান কৰিবলৈ চেষ্টা কৰে যদিও তেওঁ দৃঢ়তাৰে প্ৰতাখ্যান কৰে।
ইয়াৰ ফলশ্ৰুতিত বিষয়টো সন্দৰ্ভত স্থানীয় আৰক্ষী চকীৰ কাষ চপা হয়। কিন্তু আৰক্ষীৰ হস্তক্ষেপৰ পিছতো কইনাগৰাকীয়ে বিবাহত বহিবলৈ অমান্তি হয়।
পৰৱৰ্তী সময়ত দুয়োপক্ষৰ সিদ্ধান্ত অনুসৰি পঞ্চায়ত সভা আহ্বান কৰা হয়। কইনাগৰাকীৰ পৰিয়ালে দাবী কৰে যে তেওঁলোকে বিবাহৰ বাবে ৫.৬৬ লাখ টকা খৰচ কৰিছিল। এই দাবীৰ সঁহাৰি জনাই দৰা পক্ষই কন্যা পক্ষক এই ক্ষতিপূৰণ ঘূৰাই দিছিল।
এনে পৰিস্থিতিত কইনা অবিহনেই দৰা আৰু বৰযাত্ৰীসকল কানপূৰলৈ উভতিব লগীয়া হয়।
আনহাতে ঘটনা সন্দৰ্ভত প্ৰতিক্ৰিয়া প্ৰকাশ কৰি কইনাৰ এগৰাকী খুৰাকে কয় যে দৰাৰ পৰিয়ালে দৰাজনৰ ক্ষেত্ৰত সত্যতা লুকুৱাই ৰাখিব নালাগিছিল। যদি দৰাপক্ষই প্ৰকৃত সত্য পূৰ্বেই প্ৰকাশ কৰিলেহেঁতেন, তেওঁলোকে বিবাহৰ প্ৰস্তাৱ নাকচ নকৰিলে হয়।
পোনপ্ৰথমে মিথ্যাচাৰৰ আশ্ৰয় লৈ বিবাহৰ দৰে কাৰ্যসূচী এটা আগবঢ়াৰ আশা কৰিব নোৱাৰি বুলি কন্যা পক্ষই মন্তব্য কৰে।
