ৰাজ্যৰ চৌদিশে লোকসভাৰ নিৰ্বাচনৰ বাবে নিৰ্বাচনী বতাহ ক্ৰমাৎ গৰম হৈ পৰিছে। বিজেপি,কংগ্ৰেছ,অগপ সকলো ৰাজনৈতিক দলে নিজ নিজ প্ৰাৰ্থীৰ সমৰ্থনত প্ৰচাৰ অভিযান এক প্ৰকাৰ তীব্ৰতৰ কৰি তুলিছে ৷
ৰাজ্যখনৰ আটাইতকৈ সন্মানীয় সমষ্টি গুৱাহাটী লোকসভা সমষ্টিতো প্ৰচাৰ অভিযান তুংগত উঠিছে ৷এতিয়ালৈ কংগ্ৰেছ দলে সমষ্টিটোৰ প্ৰাৰ্থীৰ নাম ঘোষণা কৰা নাই যদিও সমষ্টিটোৰ চুকে কোণে তীব্ৰ প্ৰচাৰ চলাইছে বিজেপিৰ প্ৰাৰ্থী কুইন ওজাই ৷ এইক্ষেত্ৰত পিছ পৰি থকা নাই নিৰ্দলীয় প্ৰাৰ্থী উপমান্যু হাজৰিকও ৷
‘’খিলঞ্জীয়াৰ ভোটত নিৰ্বাচিত হোৱা প্ৰতিনিধিয়ে খিলঞ্জীয়াৰ স্বাৰ্থ আগত ৰাখিব লাগিব, কোনো বিদেশী বা দলৰ নহয়৷ অসমৰ কথা, খিলঞ্জীয়াৰ কথা শুনিবলৈ আৰু শুনাবলৈ দিল্লীত মাত দিব লাগে, সংসদত মাত দিব লাগে,’’- এই কথাকে সাৰোগত কৰি নিৰ্বিচনী প্ৰচাৰত নামি পৰিছে গুৱাহাটী লোক সভাৰ নিৰ্দলীয় প্ৰাৰ্থী উপমান্যু হাজৰিকাই ৷
মঙলবাৰে বিয়লি গুৱাহাটী লোকসভাৰ অন্তৰ্গত কৃষ্ণাই আৰু পাইকানত প্ৰচাৰ চলাই ৰাইজৰ ভোট ভিক্ষা কৰে হাজৰিকাই ৷ প্ৰাৰ্থী গৰাকীয়ে কৃষ্ণাই আৰু পাইকানত উপস্থিত হৈ বিভিন্ন শ্ৰেণীৰ স্থানীয় লোকৰ সতে মত বিনিময় কৰাৰ লগতে গুৱাহাটী সমষ্টিটোত তেওঁক নিৰ্দলীয় প্ৰাৰ্থী হিচাপে ভোট দানৰ আহ্বান জনায় ৷
আনহাতে, অঞ্চলটোত প্ৰাৰ্থী গৰাকীয়ে হাতে হাতে প্ৰচাৰ প্ৰত্ৰ বিলাই ভোটাৰৰ মন আকৰ্ষিত কৰাৰ চেষ্টা কৰে।