আমেৰিকাই ৰাছিয়াৰ পৰা ইন্ধন ক্ৰয় কৰাত ‘নিষেধাজ্ঞা’ আৰোপ কৰিছিল। আমেৰিকাৰ ৰাষ্ট্ৰপতি ড’নাল্ড ট্ৰাম্পে ৰাছিয়াৰ পৰা ইন্ধন আমদানি বন্ধ কৰাৰ চৰ্তত ভাৰতীয় সামগ্ৰীৰ ওপৰত শুল্ক হ্ৰাস কৰিছিল। কিন্তু ইৰাণৰ ওপৰত হোৱা আক্ৰমণৰ বাবে ইন্ধন তেলৰ ক্ষেত্ৰত সংকটৰ সৃষ্টি হৈছে। এনে পৰিস্থিতিত ভাৰতে ৰাছিয়াৰ পৰা ইন্ধন ক্ৰয় কৰিবলৈ আমেৰিকাৰ অনুমতি লাভ কৰিছে।
ইৰাণ আৰু পশ্চিম এছিয়াৰ পৰিস্থিতিৰ বাবে ভাৰতে অহা ৩০ দিনৰ বাবে ৰাছিয়াৰ পৰা তেল ক্ৰয় কৰিব পাৰিব। শুকুৰবাৰে ছ’চিয়েল মিডিয়াত এক পোষ্টযোগে এই কথা ঘোষণা কৰে আমেৰিকাৰ কোষাগাৰ সচিব স্কট বেছাণ্টে।
হৰমুজ প্ৰণালীৰ মাজেৰে চলাচল সাময়িকভাৱে ‘বন্ধ’ কৰা হৈছে। ফলত সমগ্ৰ বিশ্বতে শক্তি সংকটৰ সৃষ্টি হৈছে। ইতিমধ্যে খাৰুৱা তেলৰ মূল্য প্ৰায় ২০% বৃদ্ধি পাইছে। ট্ৰাম্পে আশ্বাস দিছিল যে হৰমুজ প্ৰণালীৰ মাজেৰে পাৰ হৈ যোৱা মালবাহী জাহাজসমূহক আমেৰিকাৰ সেনাৰ পহৰাৰ অধীনত পাৰ হ’বলৈ দিয়া হ’ব।
অৱশ্যে ইৰাণৰ ৰিভল্যুচনেৰী গাৰ্ডে দাবী কৰিছে যে সমগ্ৰ হৰমুজ প্ৰণালী তেহৰাণৰ নিয়ন্ত্ৰণত আছে। উত্তেজনাপূৰ্ণ পৰিস্থিতিত ইয়াক সাময়িকভাৱে বন্ধ কৰি দিয়া হৈছে। লগতে কোৱা হৈছে যে তাত কেৱল চীনৰ জাহাজহে পাৰ হ’ব পাৰিব।
পশ্চিম এছিয়াত উত্তেজনাই শক্তি সৰবৰাহকলৈ ডাঙৰ প্ৰশ্নৰ উত্থাপন হৈছে। ইয়াৰ মাজতে প্ৰশাসনে বিশ্ব শক্তি বজাৰখন সুস্থিৰ কৰাৰ বাবে এই পদক্ষেপ গ্ৰহণ কৰিছে। ভাৰতক কিয় ৰাছিয়াৰ পৰা শক্তি আমদানি কৰিবলৈ দিয়া হৈছে সেই কথাও জনাইছে আমেৰিকাৰ কোষাগাৰ সচিবগৰাকীয়ে। দ্বিপাক্ষিক সম্পৰ্কৰ গুৰুত্বৰ ওপৰত আলোকপাত কৰি তেওঁ ভাৰতক আমেৰিকাৰ ‘অপৰিহাৰ্য অংশীদাৰ’ বুলি অভিহিত কৰে।
ছ’চিয়েল মিডিয়া এক্সত এটা পোষ্টত স্কট বেছেণ্টে লিখিছে যে ট্ৰাম্পৰ শক্তি কাৰ্যসূচীৰ ফলত তেল আৰু গেছ উৎপাদনে সৰ্বোচ্চ স্তৰত উপনীত হৈছে। একে সময়তে তেওঁ কয় যে বিশ্বৰ বজাৰলৈ তেলৰ প্ৰবাহ অব্যাহত ৰাখিবলৈ কোষাগাৰ বিভাগে ৩০ দিনৰ অস্থায়ী ৰেহাই জাৰি কৰি ভাৰতীয় শোধনাগাৰসমূহক ৰাছিয়াৰ তেল ক্ৰয় কৰিবলৈ অনুমতি দিছে।
কিন্তু ইচ্ছাকৃতভাৱে হ্ৰস্বম্যাদী এই ব্যৱস্থাই ৰাছিয়া চৰকাৰক বিশেষ আৰ্থিক সুবিধা প্ৰদান নকৰে। কাৰণ ইয়াৰ দ্বাৰা কেৱল সাগৰত আৱদ্ধ হৈ থকা তেলৰ সৈতে জড়িত লেনদেনৰ অনুমতি দিয়া হ’ব। ইয়াৰ লগে লগে নতুন দিল্লীয়ে আমেৰিকাৰ পৰা ক্ৰয় কৰা ইন্ধন তেলৰ পৰিমাণ বৃদ্ধি কৰিব বুলি আশা কৰা হৈছে।
