শুল্কৰ আৰোপৰ ক্ষেত্ৰত আমেৰিকাই আকৌ এবাৰ কোপ দৃষ্টি পেলাইছে। ৰাষ্ট্ৰপতি ট্ৰাম্পে ভাৰতকে ধৰি ১৬খন দেশৰ ওপৰত অতিৰিক্ত শুল্ক আৰোপ কৰিব পাৰে। হোৱাইট হাউছৰ সূত্ৰ অনুসৰি ১৬খন দেশে নিয়ম মানি নচলি ব্যৱসায় কৰাৰ অভিযোগ উত্থাপন হৈছে। ভাৰতো সেই তালিকাত আছে। দেশকেইখনৰ বিৰুদ্ধে তদন্তৰ নিৰ্দেশ দিছে ট্ৰাম্প প্ৰশাসনে।
আন্তঃৰাষ্ট্ৰীয় সংবাদ মাধ্যমৰ সূত্ৰ অনুসৰি হোৱাইট হাউছে এই ১৬খন দেশৰ বাণিজ্য নীতিত অমিল থকাৰ অভিযোগ উত্থাপন কৰিছে। ৰাষ্ট্ৰপতি ট্ৰাম্পে ইয়াক ‘অন্যায়’ বুলি গণ্য কৰিছে।
বুধবাৰে আমেৰিকাৰ এজন বাণিজ্য প্ৰতিনিধি জেমিছনে কয় যে এই তদন্ত প্ৰক্ৰিয়াটো ১৯৭৪ চনৰ বাণিজ্য আইন ৩০১ ধাৰা অনুসৰি আৰম্ভ কৰা হৈছে। দুটা পৃথক তদন্তৰ নিৰ্দেশ দিয়া হৈছে। জেমিছনে কয় যে যদিহে তদন্তত অনিয়ম পোৱা যায় তেন্তে দেশসমূহৰ ওপৰত নতুন আমদানি শুল্ক আৰোপ কৰা হ’ব।
হোৱাইট হাউছৰ সূত্ৰ অনুসৰি ভাৰত, চীন, বাংলাদেশ, জাপান, দক্ষিণ কোৰিয়া, টাইৱান, ছুইজাৰলেণ্ড, নৰৱে, ইণ্ডোনেছিয়া, ছিংগাপুৰ, থাইলেণ্ড, মালয়েছিয়া, কম্বোডিয়া, ভিয়েটনাম আৰু ইউৰোপীয় ইউনিয়নৰ বিৰুদ্ধে তদন্ত আৰম্ভ কৰা হৈছে।
ৱাশ্বিংটনে অভিযোগ কৰিছে যে এই দেশসমূহে বলপূৰ্বকভাৱে ঘৰুৱা উৎপাদন বৃদ্ধি কৰিবলৈ চেষ্টা কৰিছে। তেওঁলোকে নিজৰ ঘৰুৱা উৎপাদন ক্ষমতা এনেদৰে বৃদ্ধি কৰিছে যিটো একেবাৰেই সামঞ্জস্যপূৰ্ণ নহয়। কেইবাখনো দেশে সেই সামগ্ৰীসমূহ কম মূল্যত আন্তঃৰাষ্ট্ৰীয় বজাৰত বিতৰণ কৰাৰ অভিযোগো উত্থাপন হৈছে। এই ১৬খন দেশে আন্তঃৰাষ্ট্ৰীয় বাণিজ্য চুক্তি উলংঘা কৰা বুলি হোৱাইট হাউছে অভিযোগ উত্থাপন কৰিছে।
বহুতৰ মতে ট্ৰাম্পে অধিক শুল্ক আৰোপ কৰিবলৈ এই তদন্ত আৰম্ভ কৰাৰ পৰিকল্পনা কৰিছে। একাংশ বিশেষজ্ঞৰ মতে ট্ৰাম্পে ঘৰুৱা উৎপাদন বজাৰৰ সুৰক্ষাৰ প্ৰসংগত যোৱা মাহতে আমেৰিকাৰ উচ্চতম ন্যায়ালয়ে ট্ৰাম্পৰ শুল্ক নীতিক ‘অবৈধ’ বুলি বাতিল কৰিছিল।
অৱশ্যে উচ্চতম ন্যায়ালয়ৰ ৰায়ক অতিক্ৰম কৰি ট্ৰাম্পে দেশসমূহৰ ওপৰত ১০ শতাংশ শুল্ক আৰোপ কৰে। ১৯৭৪ চনৰ আমেৰিকাৰ বাণিজ্য আইনৰ ১২২ নং ধাৰাত তেওঁ এই শুল্ক আৰোপ কৰিছিল। সেই শুল্ক ৰাতিটোৰ ভিতৰতে বৃদ্ধি কৰি ১৫ শতাংশলৈ বৃদ্ধি কৰা হয় । সেই সময়ত ট্ৰাম্প প্ৰশাসনে ৩০১ আৰু ২৩২ নং ধাৰাত আইনী ব্যৱস্থা গ্ৰহণ কৰাৰ ইংগিত দিছিল।
