US to take part in a military exercise ভাৰত আৰু আমেৰিকা যুক্তৰাষ্ট্ৰই হিমালয় পৰ্বতমালাত যৌথ সামৰিক অনুশীলন চলাব। চীনৰ সৈতে ভাৰতৰ বিতৰ্কিত সীমান্তৰ পৰা ১০০ কিলোমিটাৰতকৈও কম দূৰত্বত এই অনুশীলন অনুষ্ঠিত হ’ব।
শনিবাৰে আমেৰিকা যুক্তৰাষ্ট্ৰৰ সংবাদ মাধ্যম চিএনএন-য়ে এগৰাকী ভাৰতীয় সেনা বিষয়াৰ উদ্ধৃতি দি এই বাতৰি প্ৰকাশ কৰিছে।
বাতৰি অনুসৰি, অহা অক্টোবৰৰ মাজভাগত উত্তৰাখণ্ডৰ আউলি চহৰৰ সমীপত এই অনুশীলন অনুষ্ঠিত হ’ব। চহৰখন হিমালয় পৰ্বতমালাৰ দক্ষিণ দিশে অৱস্থিত আৰু ইয়াতেই সাগৰ পৃষ্ঠৰ পৰা ১০ হাজাৰ ফুট উচ্চতাত যুদ্ধৰ অনুশীলন চলাব নতুন দিল্লী আৰু ৱাশ্বিংটনে।
টাইৱানক লৈ চীনৰ সৈতে আমেৰিকা যুক্তৰাষ্ট্ৰৰ উত্তেজনা শীৰ্ষত উপনীত হোৱাৰ সময়তে যৌথ অনুশীলনৰ এনে আগতীয়া ঘোষণা কৰা হৈছে। তদুপৰি এতিয়ালৈকে বিতৰ্কিত সীমান্তটোত ভাৰত আৰু চীনৰ সৈনিকসকলৰ মাজত বহু সংঘৰ্ষ সংঘটিত হৈছে আৰু ভাৰত আৰু চীন অঞ্চলটোত যুদ্ধোন্মুখ স্থিতিত থকা বুলি জনা যায়।
আউলি চহৰখন ভাৰত আৰু চীনৰ মাজত বিতৰ্কিত সীমান্ত ৰেখাৰ পৰা প্ৰায় ১০০ কিলোমিটাৰ দূৰত অৱস্থিত। ভাৰত আৰু চীন দুয়োপক্ষই সীমান্তৰ সিপাৰে ইখনে সিখনৰ ভূখণ্ডৰ মালিকীস্বত্ব দাবী কৰি আহিছে।
লগতে পঢ়ক: Iran Bans Women: বিজ্ঞাপনত মহিলাৰ উপস্থিতিৰ ওপৰত নিষেধাজ্ঞা আৰোপ ইৰানৰ
অৱশ্যে ১৯৬২ চনৰ ভাৰত-চীন যুদ্ধৰ পিছৰে পৰা এই নিয়ন্ত্ৰণ ৰেখাই দুয়োখন দেশৰ মাজত সীমান্ত হিচাপে ব্যৱহাৰ হৈ আহিছে। ২০২০ চনত ভাৰতে চীনে দাবী কৰা ভূখণ্ডত এটা পথ নিৰ্মাণ কৰিবলৈ লোৱাৰ সময়তে দুয়োখন দেশৰ সীমান্তৰক্ষী বাহিনীৰ মাজত এক ৰক্তক্ষয়ী সংঘৰ্ষ ঘটিছিল।
