অযোধ্যৰ ৰাম মন্দিৰৰ দানৰ ধন চুৰি হোৱা ঘটনাক লৈ উত্তৰ প্ৰদেশ বিধানসভাৰ অধ্যক্ষ সতীশ মহানাই এক দায়িত্বহীন মন্তব্য কৰি বিতৰ্কৰ সৃষ্টি কৰিছে। তেওঁ কয় যে যিসকল ভক্তই শুদ্ধ চিত্তেৰে আৰু সঁচা ভক্তিৰে ৰামলালাৰ চৰণত দান কৰা নাছিল, হয়তো তেওঁলোকৰ ধনেই চুৰি হৈছে। সমাজবাদী পাৰ্টি আৰু কংগ্ৰেছৰ দৰে বিৰোধী দলসমূহে অভিযোগ কৰিছে যে সতীশ মহানাই ইচ্ছাকৃতভাৱে এই চুৰিৰ ঘটনাক গুৰুত্বহীন কৰি দেখুৱাবলৈ চেষ্টা কৰিছে।
ৰাম ভক্তসকলৰ বিৰুদ্ধে এনে মন্তব্য কৰাৰ লগতে মহানাই কয় যে তেওঁলোকৰ ধন চুৰি হোৱা নাই, বৰঞ্চ সেই ধন মন্দিৰ নিৰ্মাণত ব্যয় হৈছে আৰু মন্দিৰৰ এই সুন্দৰ ৰূপেই তাৰ প্ৰমাণ। এই চুৰিৰ ঘটনাক লৈ উত্তৰ প্ৰদেশত ইতিমধ্যে ৰাজনৈতিক তৰ্ক-বিতৰ্ক আৰম্ভ হৈছে। ইয়াৰ মাজতে অযোধ্যৰ শ্ৰীৰাম জন্মভূমি তীৰ্থ ক্ষেত্ৰ ট্ৰাষ্টৰ কোষাধ্যক্ষ গোবিন্দদেৱ গিৰিয়ে কয় যে ৰাম মন্দিৰৰ পৰা ১৩ কোটি টকা চুৰি হোৱা বুলি যি খবৰ বিয়পিছে সেয়া মিছা। তেওঁৰ হিচাপ মতে চুৰি হোৱা ধনৰ পৰিমাণ চাৰি কোটি টকাতকৈ বেছি নহয়।
আৰক্ষীয়ে জানিবলৈ দিয়া মতে, অযোধ্যৰ ৰাম মন্দিৰৰ চিচিটিভি ফুটেজৰ পৰা গ্ৰেপ্তাৰ কৰা আঠজন অভিযুক্তৰ ভিতৰত পাঁচজন প্ৰত্যক্ষভাৱে এই চুৰিৰ লগত জড়িত থকাৰ প্ৰমাণ পোৱা গৈছে। জানিব পৰা মতে তেওঁলোক সকলোৱেই ৰাম মন্দিৰ ট্ৰাষ্টৰ পদাধিকাৰী আৰু বিশ্ব হিন্দু পৰিষদৰ একাংশ সদস্যৰ অতি ঘনিষ্ঠ। এই পৰিস্থিতিত চুৰি হোৱা ধন ভক্তসকলক ঘূৰাই দিয়া উচিত নেকি বুলি উঠা এক প্ৰশ্নৰ উত্তৰত বিধানসভাৰ অধ্যক্ষ সতীশ মহানাই কয় যে কোনেও কেতিয়াবা দান কৰা ধন ঘূৰাই নিবিচাৰে। তেওঁ কয় যে চৰকাৰ আৰু ট্ৰাষ্টে চুৰিৰ বিৰুদ্ধে ব্যৱস্থা লৈছে আৰু দোষী যিয়েই নহওক কিয় তেওঁৰ বিৰুদ্ধে কঠোৰ ব্যৱস্থা লোৱা হ’ব। কিন্তু ৰাম জন্মভূমি আন্দোলনৰ বাবে সংগ্ৰাম কৰা সমগ্ৰ সংগঠনটোৱেই চোৰেৰে ভৰি আছে বুলি ভবাটো কোনো কাৰণতে মানি ল’ব নোৱাৰি বুলিও তেওঁ স্পষ্ট কৰি দিয়ে
