এ আই য়ু ডি এফৰ সাংসদ বদৰুদ্দিন আজমলে এখন সংবাদমেলৰ সময়ত প্ৰশ্ন কৰা বাবেই এজন সাংবাদিকক কৰা চূড়ান্ত অপমানৰ বিৰুদ্ধে তীব্ৰ প্ৰতিক্ৰিয়া প্ৰকাশ কৰিছে শিৱসাগৰৰ কেইবাটাও দল-সংগঠনে।
উজনি অসম মুছলিম কল্যাণ পৰিষদ, শিৱসাগৰ জিলাৰ গ্ৰাম্য সাংবাদিক সন্থা, তাই আহোম যুৱ পৰিষদ, শিৱসাগৰ জিলা সাংবাদিক সন্থা, কলিতা জনগোষ্ঠী ছাত্ৰ সন্থা, আহোম ৰয়েল চ’ছাইটি, দিচাংমুখ প্ৰেছ ক্লাব, শিৱসাগৰ জিলা ছাত্ৰ সন্থা, আটছাৰ শিৱসাগৰ জিলা সমিতি, আটাছুৰ শিৱসাগৰ মহকুমা সমিতি, বেতবাৰীৰ আটাছু আৰু বৃহত্তৰ অসমীয়া যুৱ মঞ্চৰ বেতবাৰী সমিতিয়ে আজমলৰ আচৰণক তীব্ৰ ভাষাৰে গৰিহণা দিয়ে।
উজনি অসম মুছলিম কল্যাণ পৰিষদৰ কেন্দ্ৰীয় কাৰ্যকৰী সভাপতি মণিৰুল ইছলাম বড়া আৰু সাধাৰণ সম্পাদক অহিদুৰ জামান চৌধুৰীয়ে কয় যে বদৰুদ্দিন আজমল অসমৰ খিলঞ্জীয়া মুছলমানৰ অভিভাৱক নহয়। সাংসদ আজমল কেৱল বংগভাষী মুছলমানৰহে অভিভাৱক। গণতন্ত্ৰৰ চতুৰ্থ স্তম্ভস্বৰূপ সংবাদ মাধ্যম আৰু সাংবাদিকক অপমান কৰা আজমলৰ বিৰুদ্ধে দেশৰ সংবাদ মাধ্যমে এক শক্তিশালী গণতান্ত্ৰিক সংগ্ৰাম গঢ়ি তোলাৰ লগতে ৰাজ্য চৰকাৰেও এইগৰাকী সংসদৰ বিৰুদ্ধে বিহীত ব্যৱস্থা গ্ৰহণ কৰিব লাগে বুলি ব্যক্ত কৰে।
আনহাতে বাতৰিকাকতলৈ প্ৰেৰণ কৰা এটা প্ৰেছ বিবৃতিৰ জৰিয়তে শিৱসাগৰ জিলাৰ গ্ৰাম্য সাংবাদিক সন্থাৰ সভাপতি ৰজনিকান্ত পাংগিং আৰু সহকাৰী সাধাৰণ সম্পাদক কল্যাণজ্যোতি বুঢ়াগোঁহায়ে কয় যে, সংবাদমেল আয়োজন কৰি সাংবাদিকক মাতি সাংবাদিকক অপমান কৰাটো অতি দুৰ্ভাগ্যজনক। শিষ্টাচাৰ নজনা এ আই য়ু ডি এফৰ প্ৰধান বদৰুদ্দিন আজমলক অতিশীঘ্ৰে গ্ৰেপ্তাৰ কৰিব লাগে বুলি তেওঁ দাবী জনায়।
তাই আহোম যুৱ পৰিষদৰ নেতা হেমন্ত চাংমায়ে গণতন্ত্ৰৰ চতুৰ্থ স্তম্ভ সংবাদ মাধ্যম আৰু সাংবাদিকৰ প্ৰতি অশ্লীল ভাষাৰে চৰম অপমান কৰা আজমলক আইনী ব্যৱস্থাৰ জৰিয়তে গ্ৰেপ্তাৰ কৰিবলৈ দাবী জনাইছে।
শিৱসাগৰ জিলা সাংবাদিক সন্থাৰ সাধাৰণ সম্পাদক জয়জ্যোতি গগৈয়ে কতৰ্ব্যৰত সাংবাদিকক অপমান কৰা কাৰ্য্যক গৰিহণা দিয়াৰ লগতে এনে কাৰ্য্যই বদৰুদ্দিন আজমলৰ সংসদ পদৰ মৰ্য্যাদাও লাঘৱ কৰা বুলি মন্তব্য কৰে। গগৈয়ে আজমলৰ বিৰুদ্ধে আইনী ব্যৱস্থা গ্ৰহণৰ পোষকতা কৰে।
আজমলৰ এই কাৰ্য্যক কলিতা জনগোষ্ঠী ছাত্ৰ সন্থাৰ কাৰ্যকৰী সভাপতি যুগান্তৰ বৰদলৈয়ে তীব্ৰ গৰিহণা দিয়াৰ লগতে আজমলৰ দৰে নেতাক সামাজিকভাৱে বৰ্জন কৰিবলৈ আহ্বান জনায়।
সাংবাদিকক অপমান কৰা কাৰ্য্যক তীব্ৰ প্ৰতিক্ৰিয়া ব্যক্ত কৰিছে আহোম ৰয়েল চ’ছাইটিৰ উপ সভাপতি হিমাংশু নেওগে। নেওগে আজমলক গ্ৰেপ্তাৰৰ দাবী উত্থাপন কৰে।
দিচাংমুখ প্ৰেছ ক্লাবৰ সভাপতি কুমাৰ অভিজিত দুৱাৰাই সাংবাদিকক অপমান কৰা কাৰ্যত ক্ষোভ প্ৰকাশ কৰি আজমলৰ ওপৰত আইনী ব্যৱস্থা লবলৈ দাবী জনাইছে।
শিৱসাগৰ জিলা ছাত্ৰ সন্থাৰ সহকাৰী সম্পাদক চৈয়দ আব্দুল মোকাদ্দিছ, আটছাৰ জিলা সমিতিৰ সহকাৰী সম্পাদক দীপু তাঁতী, আটাছুৰ শিৱসাগৰ মহকুমা সমিতিৰ অভিজিত বৰপাত্ৰ গোঁহাই, বেতবাৰীৰ আটাছু নেতা দীপাংকৰ কোঁৱৰ, বৃহত্তৰ অসমীয়া যুৱ মঞ্চৰ বেতবাৰী সমিতিৰ সমুজ্জ্বল বৰুৱাই আজমলৰ কাৰ্যক তীব্র ভাষাৰে গৰিহণা দিয়াৰ লগতে গ্ৰেপ্তাৰ কাৰৰ দাবী উত্থাপন কৰে।
উল্লেখযোগ্য যে ২৬ ডিচেম্বৰৰ দিনা এ আই য়ু ডি এফৰ জিলা পৰিষদৰ নিৰ্বাচিত সদস্য সকলক সম্বৰ্ধনা জনাবলৈ হাটশিঙীমাৰিত অনুষ্ঠিত দলটোৰ এখন সভাৰ পাছত সাংবাদিকৰ সৈতে হোৱা বাৰ্তালাপৰ সময়তে বদৰুদ্দিনে এজন সাংবাদিকক অপদস্থ কৰিছিল। সাংবাদিকজনে সোধা প্ৰশ্নত আহত হৈ বদৰুদ্দিনে তেওঁক ‘কুকুৰ’, ‘বদমাচ’ আদি শব্দৰে গালি পাৰিছিল আৰু বুমটো দলিয়াই দিছিল।
