শিৱসাগৰৰ আঠখন তৈলক্ষেত্ৰ বিদেশী কোম্পানীৰ হাতত গতাবলৈ লোৱা কেন্দ্ৰীয় চৰকাৰৰ সিদ্ধান্তৰ বিৰুদ্ধে জাঙুৰ খাই উঠিছে শিৱসাগৰৰ বিভিন্ন দল সংগঠন।
সদৌ অসম ছাত্ৰ সন্থা,বীৰ লাচিত সেনা,অনুসূচীত জাতি ছাত্ৰ সন্থা,সংগ্ৰামী যুৱ ছাত্ৰ পৰিষদকে ধৰি কেইবাটাও সংগঠনে চৰকাৰৰ এই সিদ্ধান্তক গৰিহণা দিছে।
সদৌ অসম ছাত্ৰ সন্থাৰ শিৱসাগৰ জিলা সমিতিৰ সাধাৰণ সম্পদক সমীৰণ ফুকনে কয়, ‘’অসমৰ সম্পদৰ ওপৰত থকা অধিকাৰ কেন্দ্ৰীয় চৰকাৰে যি ব্যক্তিগত কোম্পানীৰ হাতত গতাই দিব বিচাৰিছে সেই কাৰ্যক শিৱসাগৰ জিলা ছাত্ৰ সন্থাই তীব্ৰ বিৰোধিতা কৰিছো।‘’
‘’অসমৰ সম্পদ আহৰণ কৰি মুনাফা লাভৰ বাবে কেন্দ্ৰীয় চৰকাৰে ব্যক্তিগত কোম্পানীক গতাই দিব বিচাৰিছে এই কথা কেতিয়াও মানি লোৱা নহব। অনাগত দিনত অ’এনজিচি কৰ্তৃপক্ষই উচিত প্ৰত্যুতৰ পাবলৈ সাজু হৈ থাকিব লাগিব,’’ আছু নেতাজনে লগতে কয়।
আনহাতে, বীৰ লাচিত সেনাৰ নেতা চিতু বৰুৱাই কয়,’’লকডাউনৰ সুবিধালৈ অ’এনজিচিয়ে আঠ খনকৈ তৈলক্ষেত্ৰ ব্যক্তিগত কোম্পানী বা বিদেশী কোম্পানীক গতাই দিয়াৰ যি প্ৰক্ৰিয়া আৰম্ভ কৰিলে তাক কোনো কাৰণতে বীৰ লাচিত সেনাই মানি নলয়। তেওঁলোকে অসমীয়াৰ আবেগক লৈ খেলিছে।‘’
বৰুৱাই কয়,‘’অসমৰ মাতৃ গৰ্ভৰ পৰা ওলোৱা প্ৰতিটো সম্পদৰ মালিকীস্বত্ব কোনো বাহিৰাগত কোম্পানীৰ হাতলৈ যোৱাটো কেতিয়াও মানি নলও।‘’
অ’এনজিচিক এনেকাৰ্যৰ পৰা বিৰত থাকিবলৈ সকীয়াই দিয়ে বীৰ লাচিত সেনাই।
বীৰ লাচিত সেনাৰ নেতাজনে লগতে কয় যে এই লকডাউনৰ গইনা লৈ অসমত এক লুন্ঠনৰাজ আৰম্ভ হৈছে। দিহিং পাটকাইত কয়লা খননৰ অনুমতি দিয়া কাৰ্যকো তীব্ৰ গৰিহণা দিয়ে বীৰ লাচিত সেনাই।
অনুসূচীত জাতি ছাত্ৰ সন্থাৰ সম্পাদক পৰশজ্যোতি দাসে কয়, ‘’অসমৰ তৈলক্ষেত্ৰ সমুহ অসমীয়াৰ সম্পদ। এই সম্পদ সমুহ পুজিপতিৰ হাতত গতাই দিবলৈ চৰকাৰক ঠিকা দিয়া নাই। তেজ দিম তেল নিদিও বুলি শ্ল’ গান দিয়া বহু অসমীয়া যুৱক শ্বহীদ হৈছে। এই সকল অসমীয়াৰ কেঁচা তেজক চৰকাৰে অপমান কৰিছে।‘’
তেওঁ চৰকাৰে অসমৰ তৈলক্ষেত্ৰসমুহ পুজিপতিক দিয়াৰ যি হঠকাৰী সিদ্ধান্ত লৈছে তাক পৰিহাৰ কৰিবলৈ দাবী জনায়।
সংগ্ৰামী যুৱ ছাত্ৰ পৰিষদ শিৱসাগৰ জিলা সমিতিৰ সভাপতি বিজয় কৃষ্ণ দুৱৰাই কয় যে নৰেন্দ্ৰ মোডী নেতৃত্বধীন বিজেপি চৰকাৰে লকডাউনৰ সুযোগত ভাৰতৰ বিভিন্ন ৰাজ্যৰ লগতে অ’এনজিচিৰ আঠ খন তৈলক্ষেত্ৰ বহিৰাগত বনিক গোষ্ঠীক গতাই দিয়াৰ যি চক্ৰান্ত কৰিছ তাক সংগ্ৰামী যুৱ ছাত্ৰ পৰিষদ শিৱসাগৰ জিলা সমিতিয়ে কোনো কাৰণতে মানি নলয়।
