পুনৰ নগাঁও জিলাৰ পুৰণিগুদাম অঞ্চললৈ গৌৰৱ কঢ়িয়াই আনিবলৈ সক্ষম হৈছে পুৰণিগুদামৰ গায়নবৈৰাগী চুকৰ ভাস্কৰ্যপূৰ্ণ গায়ন নামৰ এজন যুৱকে।
যুৱকজন সৰুৰে পৰাই জড়িত হৈ আহিছিল বিভিন্ন শিল্পকৰ্মৰ সৈতে। কোনো আনুষ্ঠানিক শিক্ষা নোহোৱাকৈ যুৱকজনে কৰি আহিছে ব্যতিক্ৰমী চিত্ৰ অংকনৰ প্ৰয়াস।
বিশেষ প্ৰতিভাৰ অধিকাৰী যুৱকজনে শেহতীয়াকৈ কেইটামান ক্ষুদ্ৰ ক্ষুদ্ৰ বুটৰ ডালিত ভাৰতৰ মানচিত্ৰ, অসমৰ মানচিত্ৰ, জাতীয় পতাকা আদিৰ চিত্ৰ অতি সুক্ষ্মভাৱে অংকন কৰি “অসম বুক অফ ৰেকৰ্ড”ত নিজৰ নাম অন্তৰ্ভুক্ত কৰিবলৈ সক্ষম হোৱাৰ লগতে যুৱকজনৰ এই আচৰ্যজনক কৰ্মৰ আধাৰত আহৰণ কৰিবলৈ সক্ষম হোৱা সন্মান বাবে সমগ্ৰ নগাঁও বাসীৰ লগতে পুৰনিগুদাম বাসী গৌৰাম্বিত হোৱা পৰিলক্ষিত হৈছে।
ইয়াৰ উপৰি আহত গছৰ পাতত খোদিত কৰা বিভিন্ন প্ৰকাৰ ভাস্কৰ্যৰ বাবে এতিয়া জিলাখনত চৰ্চাৰ অন্যতম কেন্দ্ৰ বিন্দু হৈ পৰিছে পুৰণিগুদামৰ ভাস্কৰ্যপূৰ্ণ।
বিশেষকৈ যুৱক জনে খোৱা চাহ আৰু কফিক ৰং হিচাবে লৈ আঁকিছে বৃহৎকায় চিত্ৰও। ইয়াৰ ভিতৰত অসমীয়াৰ বাপতিসাহোন বিহুক উপস্থাপন কৰি অংকন কৰা এখন চিত্ৰয়ে প্ৰশংসা বুটলিবলৈ সক্ষম হৈছে ৰাইজৰ।
পুৰণিগুদাম বিৰিঞ্চি কুমাৰ বৰুৱা মহাবিদ্যালয়ত দ্বিতীয় ষান্মাসিকত অধ্যয়নৰত ভাস্কৰ্যপূৰ্ণ গায়ন নামৰ যুৱকজন সৰুৰে পৰা সত্ৰীয়া নৃত্য আৰু অভিনয় জগতৰ লগত জড়িত বুলি জানিব পৰা গৈছে।