দ্বিতীয় পৰ্য্যায়ৰ ল’কডাউন ২১ এপ্ৰিলৰ পৰা চৰকাৰে জনসাধাৰণৰ সহায় হোৱাকৈ কিছু পৰিমাণে শিথিল কৰিছে যদিও কৃষক ৰাইজৰ দুৰ্দশাৰ অন্ত পৰা নায়।
নগাঁও জিলাৰ চামগুৰি সমষ্টিৰ অন্তৰ্গত এৰাকলং-মাজুলী নামৰ ঠাইৰ কৃষক সকলে বজাৰৰ অভাৱত উৎপাদিত পাচলি বিক্ৰী কৰিব পৰা নায়।
ল’কডাউনৰ ফলত পথাৰতে পকী তলসৰি নষ্ট হৈছে প্ৰায় এহেজাৰ বিঘা মাটিত কৰা বিভিন্ন প্ৰকাৰৰ পাচলি।
অঞ্চলটোৰ প্ৰায় ডেৰশটি কৃষক পৰিয়ালে কৰা বন্ধাকবি, পটল, কুণ্ডলি, জলকীয়া, বেঙেনা, তিয়হ, বিলাহী, স্কোৱাচ, জিকা আদি বিভিন্ন প্ৰকাৰৰ কেঁচা শাক-পাচলি প্ৰতি বছৰে উজনি অসমৰ লগতে ৰাজ্যৰ বিভিন্ন প্ৰান্তলৈ যোগান ধৰি স্বাৱলম্বী হৈ উঠিছিল।
চলিত বছৰ ল’কডাউনৰ বাবে বজাৰ আৰু পাইকাৰী ক্ৰেতাৰ অভাৱত এতিয়া বৃহৎ পৰিমাণৰ উৎপাদিত পাচলি সমূহ গছতে পঁচি নষ্ট হোৱাত হাহাকাৰ লাগিছে এৰাকলং-মাজুলীৰ কৃষক ৰাইজৰ মাজত।
অতি উদ্বেগজনক বিষয় এইয়ে যে, অঞ্চলটোৰ প্ৰায় সৰহসংখ্যক কৃষকেই বেংক অথবা আন কোনো বিত্তীয় প্ৰতিষ্ঠানৰ পৰা ঋণলৈ কৃষিকাৰ্য্য চলাই আছিল।
ল’কডাউনৰ বাবে নিজৰ কৃষি ডৰাৰ পৰা এইবছৰ কোনো লাভালাভ আশা কৰিব নোৱাৰি ঋণ পৰিশোধ কৰিবলৈ বিপাঙত পৰা হতাশগ্ৰষ্ট কৃষক ৰাইজে অতি শীঘ্ৰে কৃষি মন্ত্ৰী অতুল বৰাক কৃষিপ্ৰধান অঞ্চলটো পৰিদৰ্শন কৰি বিহিত ব্যৱস্থা গ্ৰহণৰ জৰিয়তে কৃষক ৰাইজক সকাহ প্ৰদান কৰিবলৈ আহ্বান জনাইছে।
চৰকাৰী সহায় অবিহনে অঞ্চলটোৰ কৃষক পৰিয়ালবোৰৰ ভবিষ্যত অন্ধকাৰ বুলি উল্লেখ কৰিছে কৃষক সকলে।