দূৰদৰ্শনৰ প্ৰসিদ্ধ বাতৰি পৰিৱেশিকা তথা ৰাজ্যসভাৰ প্ৰাক্তন সদস্য সৰলা মহেশ্বৰীৰ দেহাৱসান ঘটিছে। বৃহস্পতিবাৰে (১২ ফেব্ৰুৱাৰী) দিল্লীত তেওঁৰ মৃত্যু হয়। দূৰদৰ্শনৰ বাতৰি পৰিৱেশিকা হিচাপে অতি জনপ্ৰিয় আছিল সৰলা মহেশ্বৰী।
মহেশ্বৰীপিছলৈ চি পি আই (এম)ৰ পৰা ৰাজ্যসভাত সাংসদ হিচাপেও কাৰ্যনিৰ্বাহ কৰিছিল। আজিয়েই দিল্লীৰ নিগম বোধ ঘাটত তেওঁৰ শেষকৃত্য সম্পন্ন কৰা হ’ব। মৃত্যুৰ সময়ত তেওঁৰ বয়স আছিল ৭১ বছৰ।
১৯৮০ চনৰ পৰা ১৯৯০ চনৰ ভিতৰত সৰলা মহেশ্বৰীৰ বাতৰি উপস্থাপনে সকলো ভাৰতীয় দৰ্শকৰ মন মুগ্ধ কৰিছিল। দূৰদৰ্শনে তেওঁৰ মৃত্যুত শোক প্ৰকাশ কৰিছে। সৰলা মহেশ্বৰীৰ প্ৰাক্তন সহকৰ্মী তথা প্ৰবীণ বাতৰি পৰিবেশিকা শাম্মি নাৰঙেও শোক প্ৰকাশ কৰিছে।
এই দুখৰ খবৰটো দূৰদৰ্শন চেনেলে এক্স হেণ্ডেলত পোষ্ট কৰি ৰাজহুৱা কৰিছে। ডি ডি নেচনেলৰ বাতৰি অনুসৰি মহেশ্বৰী দেৱীৰ বাতৰি পৰিৱেশন কৰা শৈলী, তেওঁৰ ব্যক্তিত্ব আৰু সংযমে সেই সময়ৰ দৰ্শকৰ মাজত অনুৰণন ঘটাবলৈ সক্ষম হৈছিল আৰু লগতে তেওঁলোকৰ আস্থাও লাভ কৰিবলৈ সক্ষম হৈছিল।
পোষ্টটোত উল্লেখ কৰা হৈছে, “দূৰদৰ্শন পৰিয়ালৰ হৈ শ্ৰীমতী সৰলা মহেশ্বৰীলৈ আন্তৰিক শ্ৰদ্ধাঞ্জলি। তেওঁ দূৰদৰ্শনৰ এগৰাকী প্ৰখ্যাত আৰু সন্মানীয় বাতৰি পৰিবেশিকা আছিল। কোমল কণ্ঠ আৰু স্পষ্ট উচ্চাৰণেৰে ভাৰতীয় সংবাদ জগতত আৰু দৰ্শকৰ মাজত নিজস্ব শৈলীৰ বাতৰি পৰিৱেশনেৰে এক বিশেষ স্থান অৰ্জন কৰিছিল।”
শুকুৰবাৰে পুৱা তেওঁৰ মৃত্যুৰ খবৰ ওলোৱাৰ পিছতে সংবাদ জগতখন স্তম্ভিত হৈ পৰে। ছচিয়েল মিডিয়াতো কেইবাজনো ব্যক্তিত্ব আৰু অনুৰাগীয়ে শোক প্ৰকাশ কৰিছে। সৰ্বভাৰতীয় মহিলা কংগ্ৰেছেও তেওঁৰ মৃত্যুত শোক প্ৰকাশ কৰে।
কোৱা বাহুল্য যে সৰলা মহেশ্বৰীৰ মৃত্যু ভাৰতীয় বৈদ্যুতিন মাধ্যমৰ বাবে এক অপূৰণীয় ক্ষতি। কিছুমানে শোক প্ৰকাশ কৰি কয় যে, “এগৰাকী উল্লেখযোগ্য ব্যক্তিত্ব সৰলা দেৱীয়ে আশী আৰু নব্বৈৰ দশকত তেওঁৰ বাতৰি উপস্থাপনৰ জৰিয়তে সমগ্ৰ দেশকে মোহিত কৰিছিল। তেওঁৰ মৃত্যুৰ ফলত এটা সোণালী যুগৰ অন্ত পৰিল।”
