সাংবাদিক গৌৰী লংকেশ হত্যাকাণ্ডৰ অন্যতম অভিযুক্ত শ্ৰীকান্ত পানাগাৰকাৰে মহাৰাষ্ট্ৰৰ জলনা পৌৰসভা নিৰ্বাচনত জয়লাভ কৰিছে। কাৰাগাৰৰ পৰা মুক্তি পোৱাৰ পিছত তেওঁ একনাথ শিণ্ডেৰ নেতৃত্বাধীন শিৱসেনাত যোগদান কৰিছিল যদিও তীব্ৰ বিতৰ্কৰ বাবে তেওঁক দলীয় পদৰ পৰা আঁতৰাই দিয়া হৈছিল। এইবাৰ নিৰ্দলীয় প্ৰাৰ্থী হিচাপে নিৰ্বাচনত অৱতীৰ্ণ হৈ তেওঁ ১৩ নং ৱাৰ্ডৰ পৰা ২৬২১ টা ভোট লাভ কৰি বিজয়ী হয়। তেওঁৰ এই জয়ে এতিয়া সমগ্ৰ দেশতে চৰ্চা লাভ কৰিছে।
মন কৰিবলগীয়া যে এই নিৰ্বাচনত একনাথ শিণ্ডেৰ শিৱসেনাই শ্ৰীকান্তৰ বিৰুদ্ধে কোনো প্ৰাৰ্থী প্ৰক্ষেপ কৰা নাছিল। আনহাতে বিজেপি আৰু অন্যান্য বিৰোধী দলৰ প্ৰাৰ্থীক পৰাস্ত কৰি তেওঁ নিজৰ আধিপত্য বিস্তাৰ কৰিবলৈ সক্ষম হয়। জয়লাভৰ পাছতেই তেওঁ সমৰ্থকসকলৰ সৈতে ৰাজপথত আনন্দ উল্লাস কৰা দেখা যায়। এজন হত্যাৰ অভিযুক্তৰ এনে বিজয়ক লৈ এতিয়া বিভিন্ন মহলত প্ৰতিক্ৰিয়াৰ সৃষ্টি হৈছে।
২০১৭ চনৰ ৫ ছেপ্টেম্বৰত সাংবাদিক তথা সমাজকৰ্মী গৌৰী লংকেশক তেওঁৰ বাসগৃহৰ সন্মুখতে হত্যা কৰা হৈছিল। এই গোচৰৰ তদন্ত কৰি মহাৰাষ্ট্ৰ আৰক্ষীৰ সন্ত্ৰাসবাদ বিৰোধী দলে ২০১৮ চনত শ্ৰীকান্তক গ্ৰেপ্তাৰ কৰিছিল। তেওঁৰ বিৰুদ্ধে হত্যাকাৰীক মাৰণাস্ত্ৰ যোগান ধৰাৰ অভিযোগ আছিল। দীৰ্ঘদিন কাৰাগাৰত থকাৰ পিছত শেহতীয়াকৈ তেওঁ জামিনত মুক্তি পাইছিল। ইয়াৰ পূৰ্বে তেওঁক এটা বিধানসভা সমষ্টিৰ নিৰ্বাচনী সমিতিৰ গুৰুত্বপূৰ্ণ দায়িত্ব দিয়া হৈছিল যদিও ব্যাপক জনৰোষৰ বাবে ২৪ ঘণ্টাৰ ভিতৰতে সেই দায়িত্ব বাতিল কৰিবলগীয়া হৈছিল।
শ্ৰীকান্তৰ ৰাজনৈতিক ইতিহাস পুৰণি। তেওঁ ২০০১ চনৰ পৰা ২০০৬ চনলৈ অবিভক্ত শিৱসেনাৰ কাউন্সিলাৰ হিচাপে কাৰ্যনিৰ্বাহ কৰিছিল। ২০১১ চনত দলীয় টিকট নোপোৱাৰ বাবে তেওঁ সোঁপন্থী হিন্দু জনজাগৃতি সমিতিত যোগদান কৰে। ২০১৮ চনত তেওঁৰ পৰা বৃহৎ পৰিমাণৰ বোমা আৰু অস্ত্ৰ-শস্ত্ৰ উদ্ধাৰ হোৱাৰ পিছত তেওঁৰ বিৰুদ্ধে বিস্ফোৰক আইন আৰু ইউএপিএৰ দৰে কঠোৰ ধাৰাত গোচৰ ৰুজু কৰা হৈছিল। নিৰ্বাচনত জয়ী হোৱাৰ পিছত শ্ৰীকান্তই মন্তব্য কৰিছে যে গৌৰী লংকেশ হত্যাকাণ্ডৰ গোচৰ এতিয়াও আদালতত বিচাৰাধীন হৈ আছে। তেওঁৰ এই জয়ে এতিয়া মহাৰাষ্ট্ৰৰ ৰাজনীতিত এক নতুন ধৰণৰ বিতৰ্কৰ সূচনা কৰিছে।
