মৰ্যাদাৰ যুঁজত জয়লাভ কৰে ভাৰতে। ১৯ বছৰ অনুৰ্ধ বিশ্বকাপৰ দ্বিতীয়খন মেচত বাংলাদেশৰ বিৰুদ্ধে ১৮ ৰাণত জয়লাভ কৰে টিম ইণ্ডিয়াই।
বাংলাদেশে টছত জয়লাভ কৰি শনিবাৰে বুলাৱাত ভাৰতক বেটিং কৰিবলৈ প্ৰেৰণ কৰে। বেটিং কৰিবলৈ নমাৰ পিছত ইটোৰ পিছত সিটো উইকেট হেৰুৱাই সমস্যাৰ সন্মুখীন হ’বলগীয়া হয় টিম ইণ্ডিয়াই।
অৱশ্যে বৈভৱ সূৰ্যবংশী আৰু অভিজ্ঞান কুণ্ডুৰ বেটিঙে ভাৰতক সন্মানীয় স্থানত উপনীত হোৱাত সহায় কৰে। বাকী কামখিনি বলাৰসকলে সম্পন্ন কৰে।
উইকেট পৰি যোৱাৰ পাছতো বৈভৱ সূৰ্যবংশীৰ বিস্ফোৰক বেটিং অব্যাহত থাকে। তেওঁ ৩০টা বলতে পাঁচটা চাৰি আৰু তিনিটা ছয় মাৰি পঞ্চাশ ৰান সংগ্ৰহ কৰে। অভিজ্ঞান কুণ্ডুৱে বৈভৱক ভালদৰে সমৰ্থন কৰি চতুৰ্থ উইকেটৰ বাবে ৬২ ৰানৰ অংশীদাৰিত্ব গঢ়ি তুলিছিল। বৈভৱে ৬৭টা বলত ৭২ ৰান সংগ্ৰহ কৰে, য’ত আছিল ৬টা চাৰি আৰু তিনিটা ছয়। ফাষ্ট বলাৰ ইকবাল হুছেইন ইমনৰ বলত তেওঁ আউট হয়।
বৈভৱ সূৰ্যবংশীৰ আউটৰ পিছত হৰবংশ পাংগলিয়াই ক্ৰীজলৈ আহে যদিও তেওঁ মাত্ৰ ২ ৰানহে কৰিবলৈ সক্ষম হয়। তাৰ পাছত অভিজ্ঞান কুণ্ডু আৰু কনিষ্ক চৌহানে উইকেট ৰক্ষা কৰি ৫৪ ৰান সংগ্ৰহ কৰে। কনিষ্কে ২৬টা বলত ৪টা চাৰি আৰু এটা ছয় মাৰি ২৮ ৰান সংগ্ৰহ কৰে।
কলিভৰ আউট হোৱাৰ কিছু সময়ৰ পাছতে অভিজ্ঞান কুণ্ডুৱে ৮২টা বল খেলি থকা সময়লৈকে ৪টা চাৰি আৰু এটা ছয় মাৰে। খিলান পেটেলে (৮ ৰান) বিশেষ পাৰ্থক্য আনিব নোৱাৰিলে, ফলত ভাৰতে ৮/২০৮ ৰানত অৱস্থান কৰে।
অভিজ্ঞান কুণ্ডু আছিল আউট হোৱা নৱম বেটছমেন। কুণ্ডুৱে ১১২টা বলত চাৰিটা চাৰি আৰু তিনিটা ছয়ৰ সহায়ত ৮০ ৰান সংগ্ৰহ কৰে। তাৰপিছতে দীপেশ দেৱ ট্ৰেইন ১১ ৰানত আউট হোৱাত ৪৮.৪ অভাৰত ২৩৮ ৰানত ভাৰতীয় ইনিংছৰ অন্ত পৰে। বাংলাদেশৰ হৈ আল ফাহাদে সৰ্বাধিক ৫টা উইকেট দখল কৰে। আজিজুল হাকিম টা মিম আৰু ইকবাল হোছেইন ইমনে দুটাকৈ উইকেট দখল কৰে।
প্ৰত্যুত্তৰত বাংলাদেশে বেটিং কৰি এক সুন্দৰ আৰম্ভণি কৰে। জৱাদ আবেৰে উইকেট হেৰুৱালেও ৰিফাত বেইগ আৰু অধিনায়ক আজিজুল হাকিমে ভাল বেটিং অব্যাহত ৰাখে। যদিও ৰিফাটে ৩৭ ৰানত আউট হয় যদিও আজিজুলৰ অৰ্ধশতকেৰে খেলখনত আছিল বাংলাদেশ।
অৱশ্যে তেওঁ আউট হোৱাৰ পাছত বাংলাদেশে ইটোৰ পিছত সিটোকৈ উইকেট হেৰুৱায়। দলটোৰ লৱাৰ মিডল অৰ্ডাৰ সম্পূৰ্ণ ব্যৰ্থ হয়। বাংলাদেশৰ দলটো ২৮.৩ অভাৰত ১৪৬ ৰান কৰি অল আউট হয়।
উল্লেখ্য যে বৰষুণ বিঘ্নিত খেলখনত ডাৰ্ক লুইচ পদ্ধতিত বাংলাদেশত ২৯ অভাৰত ১৬৫ ৰানৰ লক্ষ্য বান্ধি দিয়া হৈছিল। ভাৰতৰ হৈ বিহান মালহোট্ৰাই চাৰি অভাৰত ১৪ ৰান দি ৪ টা উইকেট দখল কৰি ভাৰতৰ বিজয়ত মুখ্য ভূমিকা পালন কৰে। তেওঁ মেন অফ দ্য মেচ সন্মান লাভ কৰে।
