জাৰ্মান স্পৰ্টছৱেৰ নিৰ্মাতা কোম্পানী পুমাৰ সৈতে বিৰাট কোহলীৰ আঠ বছৰীয়া সম্পৰ্কৰ অন্ত পৰিল। সূত্ৰৰ মতে, পুমাই আগ্ৰহী আছিল যদিও কোহলীয়ে চুক্তি বৃদ্ধি কৰিব বিচৰা নাই। বৰ্তমান কোহলীয়ে একমাত্ৰ আৰু নিজৰ লাইফষ্টাইল ব্ৰেণ্ড ‘ৱান ৮’ৰ প্ৰসাৰতা বৃদ্ধিৰ চেষ্টা চলাই আছে।
সৰ্বভাৰতীয় সংবাদ মাধ্যমত প্ৰকাশিত এক প্ৰতিবেদনত দাবী কৰা হৈছে যে পুমাই ৩৬ বছৰীয়া কোহলীৰ সৈতে আৰু ৮ বছৰৰ বাবে চুক্তিবদ্ধ হ’ব বিচাৰিছিল। যাৰ মূল্য আছিল ৩৩০ কোটি টকা। ইয়াৰ পূৰ্বে ২০১৭ চনত যেতিয়া কোহলীয়ে পুমাৰ সৈতে চুক্তিবদ্ধ হৈছিল তেতিয়া মূল্য আছিল ১১০ কোটি টকা। অৰ্থাৎ তিনিগুণ টকা বৃদ্ধি কৰাৰ প্ৰস্তাৱ দিলেও কোহলী মান্তি নহ’ল। উল্লেখ্য যে বিৰাট বিগত আঠ বছৰ ধৰি পুমাৰ ব্ৰেণ্ড এম্বেছাদৰো আছিল।
সূত্ৰ অনুসৰি কোহলীয়ে এতিয়া এজিলিটাছৰ সৈতে যুক্ত হ’বলৈ ওলাইছে। ২০২৩ চনত পুমা ইণ্ডিয়া আৰু দক্ষিণ-পূব এছিয়াৰ পৰিচালন সঞ্চালক অভিষেক গাংগুলীয়ে প্ৰতিষ্ঠা কৰিছিল এই কোম্পানীটো। এই কোম্পানীয়ে ভাৰত আৰু বিদেশত ক্ৰীড়াৰ সামগ্ৰী যোগান ধৰে। কোহলীৰ ‘ৱান ৮’ কোম্পানীয়ে হয়তো এই কোম্পানীটোৰ সৈতে সংযুক্ত হ’ব পাৰে। সেইটোৱেই সূত্ৰৰ খবৰ।
উল্লেখ্য যে এদিন পূৰ্বে পুমাই ঘোষণা কৰিছিল যে, ‘বিৰাট কোহলীৰ ক্ৰীড়া সঁজুলি নিৰ্মাতা কোম্পানী পুমাৰ সৈতে আঠ বছৰীয়া চুক্তিৰ অন্ত পৰিল। তেওঁ পুমাৰ ব্ৰেণ্ড এম্বেছাদৰো আছিল। বিৰাট কোহলীলৈ ভৱিষ্যতৰ বাবে শুভেচ্ছা জ্ঞাপন কৰিলোঁ। বিৰাটৰ লগত কেইটামান বছৰ বৰ ভাল লাগিল। একাধিক প্ৰচাৰত কোহলীয়ে অংশ লৈছে। কিন্তু ভৱিষ্যতৰ তাৰকাৰ বাবে পুমাই এনেদৰে কাম কৰি যাব। যাতে দেশৰ ক্ৰীড়াৰ ভৱিষ্যত আৰু উজ্জ্বল হয়।’
বিৰাট এতিয়া আই পি এলত ব্যস্ত। তেওঁৰ দল আৰ চি বি ৫খন মেচত ৩ খন জয়ৰে লীগ তালিকাৰ চতুৰ্থ স্থানত আছে।
