চেম্পিয়নৰ দৰে আৰম্ভণি চেম্পিয়ন দলৰ। যোৱা বছৰ য’ত শেষ হৈছিল তাৰ পৰাই ৰয়েল চেলেঞ্জাৰ্ছ বাংগালুৰুৰ আৰম্ভণি হৈছে। তেওঁলোকে ছানৰাইজাৰ্ছ হায়দৰাবাদক প্ৰায় দিশহাৰা কৰি দিলে।
উদ্বোধনী মেচত হায়দৰাবাদত ঈশান কিষানৰ বিস্ফোৰক বেটিঙৰ পিছত আৰ চি বিৰ আকাশত পুনৰ জিলিকি উঠিল ‘বিৰাট’ নক্ষত্ৰ। দেৱদত্ত পাড্ডিকাল বা ৰজত পাতিদাৰো পিছ পৰি থকা নাছিল। এছ আৰ এইচে নিৰ্ধাৰণ কৰি দিয়া ২০২ ৰানৰ লক্ষ্য খেদি আৰ চি বিয়ে বিশেষ চিন্তাত পৰিব নালাগিল। প্ৰথমখন খেলতে ৬ উইকেটত জয়লাভ কৰি বেংগালুৰুৱে আই পি এলৰ আৰম্ভণি কৰে।
শনিবাৰে বিৰাটৰ দলটোৱে টছত জয়লাভ কৰে। বেংগালুৰুৰ অধিনায়ক ৰজত পাটিদাৰে বলিং কৰাৰ সিদ্ধান্ত লয়। হায়দৰাবাদত আছিল ট্ৰেভিছ হেড আৰু অভিষেক শৰ্মাৰ দৰে আগ্ৰাসী বেটছমেন। তেওঁলোকৰ ফৰ্মত বিপক্ষক বিধ্বস্ত কৰাৰ ক্ষমতা তেওঁলোকৰ আছিল যদিও প্ৰথমখন মেচত ব্যৰ্থ হয়। ১১ ৰান সংগ্ৰহ কৰি উভতি যায় হেড। অভিষেকৰ ইনিংছ ৭ ৰানৰ পৰা আগবাঢ়িব নোৱাৰিলে।
চাৰি নম্বৰত নমা নিতীশ কুমাৰ ৰেড্ডীও (১) ফ্লপ হয়। এটা সময়ত ২৯ ৰানত ৩ উইকেট হেৰুৱাই দলটোক চাপৰ পৰা উলিয়াই আনে অধিনায়ক ঈশান কিষান আৰু হেনৰিক ক্লাচেনে। তেওঁলোকৰ যুটীয়ে গুৰুত্বপূৰ্ণ ৯৭ ৰান সংগ্ৰহ কৰে। প্ৰটিয়াৰ তাৰকাগৰাকীয়ে ২২টা বলত ৩১ ৰান সংগ্ৰহ কৰি উভতি যায়। বাউণ্ডেৰী লাইনত ফিল ছল্টৰ হাতত ধৰা পৰে তেওঁ। অৱশ্যে আম্পায়াৰে ৰিপ্লেৰ সহায় লৈ কেচ লোৱাৰ সময়ত ভৰিখনে বাউণ্ডেৰী ৰছী স্পৰ্শ কৰিছিল নেকি সেইটো নিশ্চিত কৰে। ক্লাচেনক আউট দিয়া হয়।
প্ৰটিয়া বেটছমেন ক্লাচেন উভতিল যদিও ঈশানক বশ কৰিব নোৱাৰিলে। এসময়ত অদমনীয় যেন লগা আৰ চি বিৰ বলিং ঈশানৰ সন্মুখত অসহায় যেন লাগিছিল। তেওঁ যিদৰে খেলি আছিল, এনে লাগিছিল যেন শতক অনিবাৰ্য। শেষত ছল্টৰ দুৰন্ত কেচে তেওঁক ড্ৰেছিং ৰুমৰ বাট দেখুৱাই দিলে। অভিনন্দন সিঙে উইকেটটো লাভ কৰে। ৩৮টা বলত ৮০ ৰানৰ এই বিস্ফোৰক ইনিংছত ৮টা চাৰি আৰু ৫টা ছয়ৰে সজাই তোলা হৈছিল। শেষত অনিকেত ভাৰ্মাৰ ১৮টা বলত ৪৩ ৰানৰ ইনিংছেৰে এছ আৰ এইচে ২০০ ৰান অতিক্ৰম কৰে।
আৰচিবিৰ হৈ জেকব ডাফীয়ে ২২ ৰানত ৩টা উইকেট দখল কৰে। ৰোমাৰিয়া শ্বেফাৰ্ডে ৩টা উইকেট দখল কৰে যদিও ৫৪ ৰান দিয়ে। ভুৱনেশ্বৰ কুমাৰ, সুয়েশ শৰ্মা আৰু অভিনন্দন সিঙে ১টাকৈ উইকেট দখল কৰে। ২০২ ৰানৰ লক্ষ্য খেদি আৰচিবিয়ে আৰম্ভণিতে ফিল ছল্ট (৮)ৰ উইকেট হেৰুৱায়। ইয়াৰ পিছতে বিৰাট কোহলী আৰু দেৱদত্ত পাড্ডিকালে খেল চম্ভালে।
এটা সময়ত পাড্ডিকাল অধিক আক্ৰমণাত্মক আছিল। এই যুটিটোৱে ১০১ ৰান সংগ্ৰহ কৰে। বাংগালোৰে ৮.১ অভাৰত ১০০ ৰান অতিক্ৰম কৰে। ২৫ বছৰীয়া বাওঁহাতৰ তাৰকাগৰাকীয়ে ২৬টা বলত ৬১ ৰানৰ এটা দৰ্শনীয় ইনিংছ খেলে। আউট হ’লেও ‘চেজমাষ্টাৰ’ বিৰাটৰ ফৰ্ম আছিল অতি উত্তম। অৱশ্যে অধিনায়ক ৰজত পাটিদাৰে ১২টা বলত ৩১ ৰান সংগ্ৰহ কৰি বিস্ফোৰক ইনিংছেৰে খেলখন ঘূৰাই আনিলে। অৱশ্যে পাটিদাৰ ওভতাৰ পিছতে আউট হয় (০)জিতেশ শৰ্মা।
একেৰাহে দুটা বলত উইকেট হেৰুৱাইও আৰ চি বিয়ে বিশেষ চাপ অনুভৱ কৰা নাছিল। কাৰণ সেই সময়ত প্ৰতি অভাৰত মাত্ৰ ৫ ৰানৰ প্ৰয়োজন আছিল। শেষলৈকে যুঁজি বিৰাটে দলক জয়ী কৰাই খেলপথাৰ এৰে। ৩৮টা বলত ৬৯ ৰানৰ সাৱলীল ইনিংছ খেলে। কেতিয়াও এনে লগা নাছিল যে যোৱা জানুৱাৰীৰ পৰা তেওঁক প্ৰতিযোগিতামূলক ক্ৰিকেট খেলা নাই। প্ৰয়োজনত ৰখাই খেলিছিল আৰু প্ৰয়োজন হ’লে বেট খুলি খেলিছিল। সেইটোৱেই যেন তেওঁৰ ৰসায়ন।
চিন্নাস্বামীৰ গেলেৰীত বিৰাটক লৈ উৎসৱমুখৰ পৰিৱেশ বিৰাজ কৰিছিল। তেওঁলোকৰ উদযাপন আৰু অধিক বৃদ্ধি কৰে বেংগালুৰুৰ এক দমনীয় জয়ে। ২৬টা বল বাকী থকা অৱস্থাত জয় নিশ্চিত কৰে আৰ চি বিয়ে।
সংক্ষিপ্ত স্কোৰঃ
এছ আৰ এইচ: ২০১/৩ (ঈশান ৮০, অনিকেত ৪৩, ডাফী ৩২/৩, শ্বেফাৰ্ড ৫৪/৩)
আৰ চি বি : ২০৩/৪ (বিৰাট ৬৯*, দেৱদত্ত ৬১, পাইন ৩৫/২, হৰ্ষ ৩৫/১)
ৰয়েল চেলেঞ্জাৰ্ছ বাংগালোৰে ৬ উইকেটত জয়লাভ কৰে।
