ৰাষ্ট্ৰীয় ভোটাৰ দিৱস ২০২২ ৰ লগত সংগতি ৰাখি অসমৰ মুখ্য নিৰ্বাচনী বিষয়াৰ নিৰ্দেশনামৰ্মে “সজাগ ভোটাৰ প্ৰতিযোগিতা”ৰ অধীনত বঙাইগাঁও জিলা প্ৰশাসন তথা নিৰ্বাচনী বিভাগৰ উদ্যোগতো মঙলবাৰৰ পৰা দুটা পৰ্যায়ত ফুটবল খেল প্ৰতিযোগিতা আৰম্ভ কৰা হৈছে।
প্ৰথম পৰ্যায়ত একাদশ আৰু দ্বাদশ শ্ৰেণীৰ ছাত্ৰ আৰু দ্বিতীয় পৰ্যায়ত মহাবিদ্যালয়ৰ ছাত্ৰৰ মাজত এই ফুটবল খেল প্ৰতিযোগিতা অনুষ্ঠিত কৰা হয়। এই ফুটবল প্ৰতিযোগিতা জিলাখনৰ বৰ্ষণগাঁওস্থিত চিলাৰায় ষ্টেডিয়ামত শুভাৰম্ভ কৰে উপায়ুক্ত ডা:এম এছ লক্ষ্মী প্ৰিয়াই।
উদ্বোধনী ভাষণত উপায়ুক্তগৰাকীয়ে বিগত বৰ্ষৰ ২৬ জানুৱাৰীৰ কথা সুৱঁৰি কয় যে এই ষ্টেডিয়ামতে ড্ৰাগছ সেৱনকাৰী বহু উঠি অহা যুৱকক মূলসূঁতিলৈ ওভতাই অনাৰ প্ৰক্ৰিয়া আৰম্ভ কৰিছিল যিসকল যুৱকৰ মাজৰ পৰা পৰৱৰ্তী পৰ্যায়ত দক্ষ ফুটবল খেলুৱৈয়ো ওলাইছে। এই ফুটবল প্ৰতিযোগিতাত অংশগ্ৰহণ কৰিবলৈ অহা খেলুৱৈসকলক উপায়ুক্তগৰাকীয়ে কৰমৰ্দন কৰি শুভেচ্ছা জনাই প্ৰথমে বল ঠেলি প্ৰতিযোগিতাখনৰ শুভাৰম্ভ কৰে।
মহাবিদ্যালয় পৰ্যায়ত প্ৰথম খেল অনুষ্ঠিত হয় মহাত্মা গান্ধী কলেজ আৰু ইন্দিৰা গান্ধী কলেজৰ ছাত্ৰৰ মাজত।
উদ্বোধনী অনুষ্ঠানত অতিৰিক্ত উপায়ুক্ত নৱজ্যোতি ওজা, বঙাইগাঁৱৰ সদৰ মহকুমাধিপতি তথা নিৰ্বাচনী বিষয়া(ভাৰপ্ৰাপ্ত) মোগেন নৰহ, উত্তৰ শালমাৰা মহকুমাৰ নিৰ্বাচনী বিষয়া তন্ময় ঘোষ, জিলা ক্ৰীড়া বিষয়া খগেন চন্দ্ৰ নাথ, শাৰীৰিক নিৰ্দেশকসকল আৰু ক্ৰীড়াপ্ৰেমী লোকসকল উপস্থিত থাকে।
বৰ্ষণগাঁও ষ্টেডিয়ামত দুদিনীয়াকৈ অনুষ্ঠিত হোৱা ফুটবল খেল প্ৰতিযোগিতাত মুঠ ১২ টা দলে অংশগ্ৰহণ কৰে।
আনহাতে একাদশ আৰু দ্বাদশ শ্ৰেণীৰ মাজত ফুটবল খেল প্ৰতিযোগিতা জিলাখনৰ জেলকাঝাৰ ষ্টেডিয়ামত অনুষ্ঠিত হয় আৰু সদৰ মহকুমাধিপতি তথা বঙাইগাঁৱৰ নিৰ্বাচনী বিষয়া মোগেন নৰহে শুভাৰম্ভ কৰে।
জেলকাঝাৰত মুঠ ৭টা দলৰ মাজত খেল অনুষ্ঠিত কৰা হয় ৷ খেলসমূহ আছিল জিলা ভিত্তিক। ইয়াৰ পিছত মাণ্ডলিক পৰ্যায়ত ধুবুৰী, বঙাইগাঁও, গোৱালপাৰা, নলবাৰী, বজালী, বৰপেটা আৰু দক্ষিণ শালমাৰা জিলাৰ বাবে বঙাইগাঁৱতে অনুষ্ঠিত কৰা হ’ব।
