দিল্লীৰ তুঘলক ক্ৰিছেণ্টৰ ৩০ নম্বৰ চৰকাৰী বাংলোটোত ২০২৫ চনৰ ১৪ মাৰ্চৰ নিশা সংঘটিত অগ্নিকাণ্ডই এক চাঞ্চল্যকৰ ঘটনা পোহৰলৈ আনিছিল। জুই নুমুৱাবলৈ অহা অগ্নিনিৰ্বাপক বাহিনীৰ কৰ্মীয়ে ষ্টোৰৰুমৰ ভিতৰত ৫০০ টকাৰ জ্বলি যোৱা নোটৰ বৃহৎ স্তূপ দেখা পাইছিল। এই ঘটনাই দেশৰ ন্যায় ব্যৱস্থাত তীব্ৰ চাঞ্চল্যৰ সৃষ্টি কৰিছিল।
ঘটনাৰ তদন্তৰ বাবে লোকসভাৰ অধ্যক্ষ ওম বিৰলাই গঠন কৰা তিনিজনীয়া ন্যায়িক তদন্ত সমিতিয়ে অৱশেষত প্ৰতিবেদন দাখিল কৰিছে। প্ৰতিবেদনত কোৱা হৈছে যে তেতিয়াৰ দিল্লী হাইকোর্টৰ ন্যায়াধীশ তথা পিছত এলাহাবাদ হাইকোর্টলৈ বদলি হোৱা ন্যায়াধীশ যশৱন্ত বাৰ্মাৰ বিৰুদ্ধে উত্থাপিত তিনিওটা অভিযোগ তদন্তত সত্য প্ৰমাণিত হৈছে।
অগ্নিকাণ্ডৰ পিছৰে পৰা ন্যায়াধীশ বাৰ্মাই দাবী কৰি আহিছিল যে ষ্টোৰৰুমটো তেওঁৰ নিয়ন্ত্ৰণত নাছিল আৰু অগ্নিকাণ্ডৰ সময়ত তেওঁ তাত উপস্থিতো নাছিল। কিন্তু তদন্ত সমিতিয়ে তেওঁৰ এই দাবী গ্ৰহণ কৰা নাই। প্ৰতিবেদন অনুসৰি, যিটো স্থানৰ পৰা বৃহৎ পৰিমাণৰ নগদ ধন উদ্ধাৰ হৈছিল, সেই স্থান ন্যায়াধীশগৰাকীৰ প্ৰাতিষ্ঠানিক আৰু প্ৰত্যক্ষ নিয়ন্ত্ৰণৰ ভিতৰত আছিল।
তদন্ত সমিতিয়ে উল্লেখ কৰিছে যে ষ্টোৰৰুমত কেইখনমান নোট নহয়, বৰং নগদ টকাৰ বান্ধ আৰু স্তূপ আছিল। কিন্তু এই বিপুল পৰিমাণৰ টকা ক’ৰ পৰা আহিছিল, ইয়াৰ মালিক কোন আছিল বা কিয় সেই স্থানত টকা ৰখা হৈছিল, সেই সন্দৰ্ভত ন্যায়াধীশগৰাকীয়ে কোনো সন্তোষজনক উত্তৰ দিব পৰা নাছিল। তদন্ত সমিতিয়ে তেওঁৰ উত্তৰক অসম্পূৰ্ণ আৰু বিভ্ৰান্তিকৰ বুলি উল্লেখ কৰিছে।
অৱশ্যে টকাৰ উৎসৰ লগতে অগ্নিকাণ্ডৰ পিছৰ ঘটনাক্ৰমক লৈও ডাঙৰ প্ৰশ্ন উত্থাপন হৈছে। তদন্ত প্ৰতিবেদন অনুসৰি, জুই নুমুৱাৰ পিছত ষ্টোৰৰুমটো তৎক্ষণাত ছীল কৰি সুৰক্ষিত কৰা হোৱা নাছিল। প্ৰথমে ঘটনাস্থললৈ অহা কৰ্মীসকল আঁতৰি যোৱাৰ পিছতে ঘৰটো ততাতৈয়াকৈ পৰিষ্কাৰ কৰা হৈছিল।
পিছত যেতিয়া আনুষ্ঠানিকভাৱে সেই স্থান পৰিদৰ্শন কৰা হৈছিল, তেতিয়ালৈ ষ্টোৰৰুমত থকা বৃহৎ পৰিমাণৰ নগদ ধন নোহোৱা হৈছিল। তদন্তৰ সময়ত ন্যায়াধীশগৰাকীৰ ব্যক্তিগত সচিব ৰাজিন্দৰ সিং কাৰ্কি আৰু গৃহকৰ্মী মহম্মদ ৰাহিলৰ উপস্থিতিৰ তথ্য পোৱা গৈছিল। অৱশ্যে ন্যায়াধীশ যশৱন্ত বাৰ্মাই নিজে সেই টকা আঁতৰাইছিল নেকি, সেই বিষয়ে তদন্ত সমিতিয়ে কোনো চূড়ান্ত সিদ্ধান্ত দিয়া নাই।
সেই নিশা ষ্টোৰৰুমত প্ৰকৃততে কিমান টকা আছিল, তাৰ সঠিক হিচাপ এতিয়া জনা নাযায়। কাৰণ উদ্ধাৰ হোৱা নগদ ধন আনুষ্ঠানিকভাৱে বাজেয়াপ্ত, গণনা বা নথিভুক্ত কৰা হোৱা নাছিল। ন্যায়াধীশগৰাকীৰ পক্ষৰ পৰা টকা ষড়যন্ত্ৰ কৰি তাত ৰখা হৈছিল বুলি কৰা দাবীৰ সমৰ্থনত কোনো প্ৰমাণ বা সাক্ষীও দাখিল কৰিব পৰা হোৱা নাছিল।
ইফালে, ঘটনাৰ পিছত ন্যায়াধীশ যশৱন্ত বাৰ্মাৰ বিৰুদ্ধে সংসদত অপসাৰণৰ প্ৰক্ৰিয়া আৰম্ভ হোৱাৰ পথ মুকলি হৈছিল। অৱশেষত সংসদীয় অপসাৰণৰ সন্মুখীন হোৱাৰ সময়তে তেওঁ এলাহাবাদ হাইকোর্টৰ ন্যায়াধীশৰ পদৰ পৰা পদত্যাগ কৰে। ইয়াৰ ফলত সংসদীয় প্ৰক্ৰিয়াৰে তেওঁক অপসাৰণ কৰাৰ বিষয়টোও শেষ হৈ যায়।
এই ঘটনাক কোনো ফৌজদাৰী আদালতৰ শাস্তি বুলি ক’ব নোৱাৰি। কিন্তু দেশৰ উচ্চ ন্যায়ালয়ৰ এজন ন্যায়াধীশৰ চৰকাৰী বাসগৃহৰ ষ্টোৰৰুমত বৃহৎ পৰিমাণৰ নগদ ধন উদ্ধাৰ হোৱা, সেই ধনৰ উৎসৰ সন্তোষজনক ব্যাখ্যা নোপোৱা আৰু পিছত নগদ ধন নোহোৱা হৈ যোৱা ঘটনাই দেশৰ ন্যায় ব্যৱস্থাৰ স্বচ্ছতা আৰু বিশ্বাসযোগ্যতাক লৈ এক গভীৰ প্ৰশ্ন উত্থাপন কৰিছে।
