প্ৰথম পৰ্যায়ৰ পঞ্চায়ত নিৰ্বাচনৰ দিন চমু চাপি অহাৰ লগে লগে ৰাজ্যৰ বিভিন্ন প্ৰান্তৰ লগতে লখিমপুৰ জিলাতো ৰাজনৈতিক দলসমূহে ব্যাপক ৰূপত বৃদ্ধি কৰিছে নিজৰ নিজৰ নিৰ্বাচনী প্ৰচাৰ। বৰ্তমান লখিমপুৰত ৰাজনৈতিক দলসমূহে ইটোৱে সিটোক চোকা বাক্য বাণেৰে সমালোচনা কৰি ভোটাৰ ৰাইজৰ মন জয় কৰাৰ এক অঘোষিত প্ৰতিযোগিতাত নামি পৰা পৰিলক্ষিত হৈছে।
বিৰোধী দল কংগ্ৰেছৰ পঞ্চায়ত নিৰ্বাচনৰ মূল অস্ত্ৰ হ’ল নাগৰিকত্ব সংশোধনী বিধেয়ক আনহাতে বিগত দিনসমূহত পঞ্চায়তত হোৱা দুৰ্নীতিকে প্ৰধান নিৰ্বাচনী ইচ্ছ্যু হিচাপে লৈ নিৰ্বাচনী প্ৰচাৰত নামিছে শাসকীয় বিজেপি।
আগন্তুক পঞ্চায়ত নিৰ্বাচনত যাতে লখিমপুৰৰ পৰা বিজেপিয়ে ভাল ফলাফল দেখুৱাব পাৰে তাৰ বাবে নিৰ্বাচনী প্ৰচাৰত নামি পৰিছে লখিমপুৰ লোকসভা সমষ্টিৰ সাংসদ তথা বিজেপি নেতা প্ৰদান বৰুৱাই।
শনিবাৰে জিলাখনৰ পানীগাঁও চাৰিআলিত এক নিৰ্বাচনী কাৰ্যালয়ৰ মুকলি কৰি সাংসদগৰাকীয়ে ৰাজ্য চৰকাৰৰ অন্যতম মিত্ৰ দল অসম গণ পৰিষদ দলক ক্ষুৰধাৰ সমালোচনা কৰে। অগপই নাগৰিকত্ব সংশোধনী বিধেয়কৰ বিৰোধিতা কৰি অসমখনক এক অস্থিৰ পৰিৱেশৰ মাজলৈ ঠেলি দিছে বুলিও সাংসদগৰাকীয়ে গুৰুতৰ অভিযোগ তোলে।
ইফালে বিজেপিৰ সমান্তৰালকৈ কংগ্ৰেছ দলেও জিলাখনত নিৰ্বাচনী প্ৰচাৰ জোৰদাৰ কৰি তোলা পৰিলক্ষিত হৈছে। খোদ প্ৰদেশ কংগ্ৰেছৰ সভাপতি ৰিপুন বৰাই জিলাখনৰ বিহপুৰীয়া, নাওবৈচা আৰু উত্তৰ লখিমপুৰত দলটোৰ হৈ প্ৰচাৰ কাৰ্যত অংশগ্ৰহণ কৰিছে।
উজ্জ্বলপুৰ গাঁও পঞ্চায়তত আয়োজিত এখন নিৰ্বাচনী প্ৰচাৰ সভাত অংশ লৈ প্ৰদেশ কংগ্ৰেছৰ সভাপতিগৰাকীয়ে শাসকীয় বিজেপি-অগপক মূল লক্ষ্য কৰি তীব্ৰ সমালোচনা কৰে। তেওঁ ভোটাৰক উদ্দেশ্যি কয় যে আগন্তুক পঞ্চায়ত নিৰ্বাচনত যদিহে বিজেপি-অগপক ভোট দিয়া হয় তেন্তে সেই ভোট নাগৰিকত্ব সংশোধনী বিধেয়কৰ সমৰ্থনত যাব।
ৰিপুন বৰাই লগতে কয় যে কেন্দ্ৰ আৰু ৰাজ্যত বিজেপি চৰকাৰ থকাৰ পাছতো ৰাজ্যৰ উন্নয়ন স্থবিৰ হৈ পৰিছে। লোকসভা আৰু বিধানসভা নিৰ্বাচনৰ পূৰ্বে বিজেপিয়ে দিয়া প্ৰতিশ্ৰুতি আজিলৈ এটাও পূৰণ নকৰিলে। বৰঞ্চ বিজেপিয়ে কংগ্ৰেছ চৰকাৰৰ দিনত আৰম্ভ কৰা ১৩৩টা কল্যাণকামী আঁচনি বন্ধহে কৰি দিলে বুলি ৰিপুণ বৰাই উল্লেখ কৰে।