জনপ্ৰিয় সংগীত পৰিচালক ৱাজিদ খানৰ কোভিড-১৯ত মৃত্যু; শোকস্তব্ধ বলীউদ

বলীউদৰ প্ৰসিদ্ধ তথা জনপ্ৰিয় সংগীত পৰিচালক ৱাজিদ খানৰ পৰলোকপ্ৰাপ্তি ঘটিছে। দেওবাৰে ৱাজিদ খানৰ মৃত্যুৰ বাতৰিয়ে বলীউদক শোকস্তব্ধ কৰি তুলিছে।

বলীউদত চাজিদ-ৱাজিদ যুটীৰ অন্যতম ৱাজিদ খানৰ মৃত্যুৰ বাতৰিয়ে ছবিজগতৰ বিশিষ্ট ব্যক্তিৰ লগতে তেওঁৰ অনুৰাগীসকলকো ব্যথিত কৰিছে।

বাতৰি অনুসৰি, ৱাজিদ খান কিডনীৰ ৰোগত ভূগি আছিল আৰু তেওঁৰ স্বাস্থ্যৰ অৱনতি ঘটাৰ পাছত তেওঁক মুম্বাইৰ এখন হাস্পাতলত ভৰ্তি কৰা হয়।

৪২বৰ্ষীয় ৱাজিদ খানৰ কেইমাহমান পূৰ্বে কিডনী ট্ৰান্সপ্লেন্ট কৰা হৈছিল।

তেওঁৰ স্বাস্থ্য সুস্থ নাছিল আৰু কেইদিনমান পূৰ্বে তেওঁৰ দেহত কোভিড-১৯ পজিটিভ ধৰা পৰিছিল।

দেওবাৰে সন্ধিয়া তেওঁৰ স্বাস্থ্যৰ অধিক অৱনতি ঘটে আৰু চিকিৎসকে আপ্ৰাণ চেষ্টা কৰিও তেওঁক বচাব নোৱাৰিলে।

জানিব পৰা মতে, কিডনীৰ সমস্যাৰ বাবে তেওঁৰ ইম্যুনিটি লেভেল বহুত হ্ৰাস পাই গৈছিল।

সংগীত শিল্পীগৰাকীৰ মৃত্যুত বিশিষ্ট সংগীতকাৰ চেলিম মাৰ্চেন্ট, অভিনেত্ৰী প্ৰিয়ংকা চোপ্ৰাকে ধৰি বিভিন্ন জনে শোক প্ৰকাশ কৰি টুইট কৰিছে।

প্ৰিয়ংকা চোপ্ৰাই টুইট কৰি ৱাজিদ খানৰ মৃত্যু এক অত্যন্ত দুখজনক খৱৰ বুলি কোৱাৰ লগতে কয়,’’এটা কথা মোৰ সদায় মনত থাকিব সেয়া হৈছে ৱাজিদ ভাইৰ হাঁহিটো।সদায়েই মিচিকয়াই থাকিছিল। বহুত সোনকালে গুচি গ’ল।‘’

Terrible news. The one thing I will always remember is Wajid bhai's laugh. Always smiling. Gone too soon. My condolences to his family and everyone grieving. Rest in peace my friend. You are in my thoughts and prayers.@wajidkhan7

— PRIYANKA (@priyankachopra) May 31, 2020

উল্লেখযোগ্য যে চাজিদ-ৱাজিদৰ যুটীয়ে চলমান খানৰ বাবে বিশেষভাৱে সংগীত ৰচনা কৰিছিল।

চলমান খনৰ দাবাং ছবিখনৰ সংগীতে সকলোৰে মন চুই গৈছিল আৰু ই জনপ্ৰিয়তাৰ শিখৰত আৰোহন কৰিছিল।

চাজিদ-ৱাজিদে ১৯৯৮চনত চলমান খানৰ ছবি ‘’প্যাৰ কিয়া তো ডৰনা কিয়া’’ৰ জৰিয়তে নিজৰ কেৰিয়াৰ আৰম্ভ কৰিছিল।

ইয়াৰ পাছতে যুটীটোৱে এখনৰ পাছত আনখন হিট ছবিৰ সংগীত ৰচনা কৰিছিল। তাৰ ভিতৰত চোৰি চোৰি, হেল্ল ব্ৰাদাৰ, মুঝছে চাদী কৰোগী, পাৰ্টনাৰ, ৱান্টেড, দাবাঙৰ দৰে ছবি আছিল।

২০০৮চনত পাৰ্টনাৰ ছবিখনত ৱাজিদ খানে গায়ক হিচাপে কণ্ঠদান কৰিছিল।