২০১৮ বৰ্ষৰ মিছেছ ইণ্ডিয়া (ক্লাছিক) খিতাপ অৰ্জন কৰা গহপুৰ মহকুমাৰ হেলেম ৰাজহ চক্ৰৰ গৰৈমাৰী গাঁৱৰ বোৱাৰী মমতা সন্দিকৈক ৩১ অক্টোবৰ মঙলবাৰে গৃহভূমি গহপুৰত উষ্ম আদৰণি জনোৱা হয়। উত্তৰ লক্ষীমপুৰ জিলাৰ হাৰমতিৰ সন্দীপনি একাডেমীৰ ইংৰাজী বিষয়ৰ এগৰাকী শিক্ষয়িত্ৰী হিচাপে কৰ্মৰত মমতা সন্দিকৈ দ’লহাট চাহ বাগিচাৰ ফেক্টৰী পৰিচালক নয়ন জ্যোতি সন্দিকৈৰ অৰ্ধাংগিনী।
গুৱাহাটীৰ মণিৰাম দেৱান ট্ৰেড চেন্টাৰত যোৱা ২৫ অক্টোবৰৰ পৰা ২৮ অক্টোবৰলৈকে অনুষ্ঠিত হোৱা ‘মিছেছ ইণ্ডিয়া (ক্লাছিক)-২০১৮’ প্ৰতিযোগিতাত অংশগ্ৰহণ কৰি ১২০ গৰাকী প্ৰতিযোগীৰ মাজৰ পৰা এই সন্মান আজুৰি আনিবলৈ সক্ষম হয় মমতা সন্দিকৈয়ে।
এগৰাকী সফল মাতৃ হোৱাৰ ওপৰিও এগৰাকী আদৰ্শ বোৱাৰী ৰূপে সন্দিকৈয়ে নিয়াৰিকৈ ঘৰুৱা-কাজ পৰিচালনা কৰাৰ ওপৰিও তেখেতে নিজৰ সফলতাৰ বাবে সাধনা আৰু প্ৰৱল আত্মবিশ্বাস অক্ষুণ্ণ ৰাখিছে।
উল্লেখযোগ্য যে মমতা সন্দিকৈয়ে মিছেছ ইণ্ডিয়া (ক্লাছিক)ৰ দৰে গুৰুত্বপূৰ্ণ খিতাপ লাভ কৰিবলৈ সক্ষম হোৱাত আনন্দত উৎফুলিত হৈ পৰিছে সমগ্ৰ গহপুৰবাসী। ইতিমধ্যে মমতা সন্দিকৈয়ে চলিত বৰ্ষৰ জুলাই মাহত অনুষ্ঠিত নৰ্থ আসাম এনজেলিক প্ৰতিযোগিতাত ৰাৰ্নাছ-আপৰ সন্মান লাভ কৰিবলৈ সক্ষম হৈছিল। য
স্মৰ্তব্য যে গৃহভূমিত উপস্থিত হৈয়েই মমতা সন্দিকৈয়ে বৰঙাবাৰীস্থিত শ্বহীদ কনকলতা বৰুৱাৰ প্ৰতিমূৰ্তিৰ চৰণত সেৱা জনাই উপস্থিত স্থানীয় ৰাইজৰ পৰা আশীৰ্বাদ গ্ৰহণ কৰে। ইফালে মমতা সন্দিকৈয়ে ২০১৯ বৰ্ষৰ ১৯ জানুৱাৰিৰ পৰা ২৪ জানুৱাৰিলৈ বুলগেৰিয়াত অনুষ্ঠিত হ’বলগীয়া মিছেছ ইউনিৰ্ভাছ প্ৰতিযোগিতাত অংশগ্ৰহণ কৰিব বুলি জানিবলৈ দিছে। এই খবৰে নিশ্চিতভাৱে সমগ্ৰ অঞ্চলটোকে উৎফুল্লিত কৰি তুলিছে। মমতা সন্দিকৈৰ এই সফলতাত গহপুৰৰ বিভিন্ন দল-সংগঠন, অনুষ্ঠান-প্ৰতিষ্ঠান আৰু সদাশয় ব্যক্তিয়ে অভিনন্দন জ্ঞাপন কৰি ভৱিষ্যতে আৰু অধিক সফলতা কামনা কৰিছে।
