আজিও জ্বলি আছে বাঘজানৰ তৈল খাদৰ জুই।
যোৱা ৯ জুনত বিস্ফোৰণ সংঘটিত হোৱাৰ পিছৰে পৰা বাঘজানত জুই জ্বলিয়েই আছে।
বাঘজানৰ জুই নিৰ্বাপিত কৰিবলৈ আৰু কমেও আঠ সপ্তাহ লাগিব বুলি প্ৰকাশ কৰিলে অইলৰ মুখ্য পৰিচালন সঞ্চালক সুশীল চন্দ্ৰ মিশ্ৰই।
এখন সংবাদমেলত মিশ্ৰই কয় যে জুই নিৰ্বাপনৰ ক্ষেত্ৰত যাৱতীয় সকলো ব্যৱস্থাই হাতত লোৱা হৈছে।অইলে আঠ সপ্তাহৰ ভিতৰত জুই সম্পূৰ্ণকৈ নিৰ্বাপন কৰিবলৈ সক্ষম হব বুলি তেওঁ কয়।
উল্লেখ্য জুই নিৰ্বাপনৰ বাবে ছিংগাপুৰৰ এলাৰ্ট ডিজাষ্টাৰ কণ্ট্ৰ’লৰ পৰা অনা ছজনীয়া বিশেষজ্ঞৰ দলটোও এতিয়ালৈকে জুই নুমুওৱাত বিফল হৈছে।
বাঘজানত অইলৰ ৫নং খাদত ২৭ মে’ত নিৰ্গমনৰ ঘটনা সংঘটিত হৈছিল, আৰু একেটা খাদতে ১৩ দিন পিছত প্ৰচণ্ড অগ্নিকাণ্ডৰ ঘটনা ঘটিছিল।
বৃহৎ জুয়ে সমগ্ৰ বাঘজান এলেকাকে সামৰি লৈছিল। অঞ্চলটোৰ মাগুৰি-মতাপুং বিলৰ চৰাই আৰু জলজ প্ৰাণীৰ ব্যাপক ক্ষতি হৈছিল।
প্ৰচণ্ড জুইৰ বাবে ডিব্ৰু-ছৈখোৱা ৰাষ্ট্ৰীয় উদ্যানৰ একাংশও প্ৰভাৱিত হৈছিল।
নৰ্থইষ্ট নাওৰ সৈতে হোৱা কথা-বতৰাত পৰিৱেশবিদ নিৰন্তৰ গোহাঁয়ে কয় যে জুইকুৰাই দিনে দিনে ডিব্ৰু-ছৈখোৱাৰ সমগ্ৰ পৰিস্থিতিতন্ত্ৰৰ বাবে সমস্যাৰ সৃষ্টি কৰিছে।
“ই সমগ্ৰ অঞ্চলটোৰ পৰিৱেশত প্ৰভাৱ পেলাইছে। অইল ইণ্ডিয়া লিমিটেডে জুই নিয়ন্ত্ৰণৰ বাবে ৭ জুলাই সময়সীমা নিৰ্ধাৰণ কৰিছিল কিন্তু তেওঁলোকে এতিয়ালৈকে জুই নুমুওৱাত বিফল হৈছে।”
ইফালে বাঘজান আৰু গুইজান দুয়ো ঠাইতে বায়ুৰ গুণমান নিৰীক্ষণ কৰা হৈছে।
M/s ERMৰ দলে মাগুৰি বিল অঞ্চলৰ মাছমৰীয়াসকলৰ সৈতে আলোচনা চলাইছে।
খাদটো বন্ধ কৰাৰ এসপ্তাহ পিছলৈকে M/s ERMৰ অধ্যয়ন চলি থাকিব।
আনহাতে অইলৰ বিষয়াই জনোৱা মতে ধাৰাবাহিক বৰষুণ আৰু গধূৰ যান-বাহনৰ চলাচলৰ বাবে খাদটোলৈ অহা পথটোৰ অৱস্থা বেয়ালৈ ঢাল খাইছে।
তেওঁ লগতে জনোৱা মতে পথটোৰ বেয়া অংশ মেৰামতিৰ বাবে অহৰহ চেষ্টা চলাই থকা হৈছে আৰু এলেকাটোৰ পৰা ধ্বংসাৱশেষসমূহ আঁতৰোৱাৰ কামো অব্যাহত আছে।
