শেহতীয়াকৈ অৰুণাচল প্ৰদেশৰ পশ্চিম কামেং জিলা প্ৰশাসনে ওদালগুৰি জিলা প্ৰশাসনক প্ৰেৰণ কৰা এখন পত্ৰই নিদ্ৰাহৰণ কৰিছে প্ৰশাসনৰ লগতে স্থানীয় ৰাইজৰ। পত্ৰ লাভ কৰাৰ লগে লগে তৎপৰতাৰে ওদালগুৰি জিলাৰ লগতে ইয়াৰ দাঁতি কাষৰীয়া জিলাসমূহৰ জৰুৰীকালীন সেৱাৰ লগতে দুৰ্যোগ প্ৰশমন বিভাগসমূহক সতৰ্ক হৈ থাকিবলৈ নিৰ্দেশ দিছে জিলা প্ৰসাসনে।
উল্লেখ্য যে অৰুণাচল প্ৰদেশৰ পশ্চিম কামেং জিলাৰ অতিৰিক্ত উপায়ুক্তই প্ৰেৰণ কৰা পত্ৰখনত উল্লেখ কৰা হৈছে যে অৰুণাচলত হোৱা মুষলধাৰ বৰষুণৰ ফলত য়োলংগ্ৰীপাম অঞ্চলত প্ৰচুৰ পৰিমাণে ভূমিস্খলন সংঘটিত হৈছে। সেয়ে যিকোনো সময়তে অৰুণাচলৰ পৰা বৈ অহা নাৰগাম নদীয়ে ওদালগুৰি জিলা তথা ইয়াৰ কাষৰীয়া অঞ্চলত প্ৰকৃতিয়ে ভয়ংকৰ ৰূপ ধাৰণ কৰিব পাৰে।
পাহাৰত হোৱা ভূমিস্খলনে য়োলংগ্ৰীপাম অঞ্চলেৰে বৈ অহা নাৰগাম নদীৰ বুকুত মাটি আৰু শিলৰ বৃহৎ অংশ জমা কৰিছে। ইয়াৰ ফলত নদীৰ স্বাভাৱিক গতি ৰুদ্ধ হৈ পৰাৰ লগতে উক্ত অঞ্চলতে আৱদ্ধ হৈ আছে নদীখনৰ এক বৃহৎ পৰিমাণৰ পানী। নদীত আৱদ্ধ হৈ থকা পানীখিনি যিকোনো মূহুৰ্ততে নামনি অংশলৈ গতি কৰাৰ আশংকা প্ৰকাশ কৰিয়ে পশ্চিম কামেং জিলা প্ৰশাসনে ওদালগুৰি জিলা প্ৰশাসনলৈ পত্ৰ প্ৰেৰণ কৰিছে।
উল্লেখ্য যে যদিহে এই বৃহৎ পৰিমাণৰ পানীখিনি হঠাৎ নামনিলৈ বৈ আহে তেন্তে অসম-অৰুণাচল সীমান্তত অৱস্থিত ভৈৰৱকুণ্ড নদীয়ে ৰূদ্ৰমূৰ্তি ধাৰণ কৰাৰ উপৰি জিলাখনৰ বিভিন্ন প্ৰান্তত বানে সংহাৰী ৰূপ ধাৰণ কৰিব বুলি আশংকা প্ৰকাশ কৰিছে জিলা প্ৰশাসনে।
সেয়ে প্ৰশাসনে জিলাখনৰ বিভিন্ন প্ৰান্তৰ লগতে ভৈৰৱকুণ্ড অঞ্চলৰ নৈপৰীয়া ৰাইজক মাছমৰা, নদীৰ বালি খনন কাৰ্য আদি চলোৱাৰ পৰা বিৰত থাকিবলৈ সতৰ্ক জাৰি কৰে। ইয়াৰ উপৰি প্ৰশাসনে জৰুৰীকালীন বিভাগসমূহক সতৰ্ক থাকিবলৈ নিৰ্দেশ দিছে।