ইজৰাইল আৰু ইৰাণৰ মাজত চলি থকা যুদ্ধৰ পৰিপ্ৰেক্ষিতত বিশ্বজুৰি সৃষ্টি হোৱা অনিশ্চয়তাৰ মাজত শেহতীয়াকৈ প্ৰধানমন্ত্ৰী নৰেন্দ্ৰ মোদীয়ে দেশবাসীক মিতব্যয়ী হ’বলৈ আহ্বান জনাইছিল। তেওঁ জনসাধাৰণক অনাগত এটা বছৰৰ বাবে সোণ কিনিবলৈ বাৰণ কৰাৰ লগতে পেট্ৰ’ল আৰু ডিজেল ৰাহি কৰিবলৈ অনুৰোধ জনাইছিল। ইয়াৰ উপৰিও অপ্ৰয়োজনীয় বিদেশ ভ্ৰমণ পৰিহাৰ কৰা আৰু ব্যক্তিগত বাহনৰ সলনি ৰাজহুৱা পৰিবহণ ব্যৱহাৰ কৰিবলৈ তেওঁ দেশবাসীক সজাগ কৰিছিল। কিন্তু প্ৰধানমন্ত্ৰীৰ এই গুৰুত্বপূৰ্ণ আহ্বানৰ মাত্ৰ এদিন পাছতেই মধ্যপ্ৰদেশত বিজেপি নেতাসকলৰ আচৰণত সম্পূৰ্ণ বিপৰীত ছবিহে প্ৰতিফলিত হ’ল।
মধ্যপ্ৰদেশৰ পাঠ্যপুথি নিগমৰ নৱনিযুক্ত অধ্যক্ষ সৌভাগ্য সিং ঠাকুৰে উজ্জয়িনীৰ পৰা ভূপাললৈ আহোঁতে লগত লৈ আহিছিল প্ৰায় ২০০ খন বাহনৰ এক বিশাল কনভয়। এই বিশাল লানি বাহনৰ বাবে সমগ্ৰ ঘাইপথ আৰু ভূপাল চহৰত ভয়ংকৰ যান-জঁটৰ সৃষ্টি হয়। তীব্ৰ গৰমৰ মাজত ঘণ্টাৰ পাছত ঘণ্টা ধৰি স্কুলীয়া ছাত্ৰ-ছাত্ৰী, বৃদ্ধ আৰু সাধাৰণ যাত্ৰীসকল ৰাস্তাতে আবদ্ধ হৈ থাকিবলগীয়া হয়। বিজেপিৰ ৰাজ্যিক কাৰ্যালয়ৰ পৰা আৰম্ভ কৰি চহৰখনৰ বিভিন্ন গুৰুত্বপূৰ্ণ মোৰবোৰত কেৱল নেতাজনৰ সমৰ্থকৰ গাড়ীৰ লানিহে দেখা গৈছিল, যিয়ে প্ৰধানমন্ত্ৰীৰ মিতব্যয়িতাৰ বাৰ্তাক যেন ভেঙুচালিহে কৰিছিল।
অকল ভূপালতে নহয়, ৰাজ্যখনৰ অন্যান্য প্ৰান্ততো একেই দৃশ্য দেখিবলৈ পোৱা গৈছে। শিৱপুৰীৰ বিধায়ক প্ৰীতম সিং লোধীয়ে এটা মন্দিৰৰ বিবাদ নিষ্পত্তি কৰিবলৈ ২০০ খন গাড়ী লৈ উপস্থিত হোৱাৰ বিপৰীতে খাণ্ডৱাত জিলা পৰ্যালোচনা সভালৈ যোৱাৰ সময়ত মন্ত্ৰী ধৰ্মেন্দ্ৰ লোধীৰ কনভয়টো আছিল অতি বিশাল। ইয়াৰ ওপৰত প্ৰশ্ন উত্থাপন হোৱাত মন্ত্ৰীগৰাকীয়ে নিজেই স্বীকাৰ কৰে যে ইমানবোৰ বাহন লৈ যোৱাৰ কোনো যুক্তি নাই আৰু প্ৰধানমন্ত্ৰীৰ নিৰ্দেশ পালন কৰাটো প্ৰয়োজনীয়। তেওঁ এই সন্দৰ্ভত জিলা উপায়ুক্তক নিৰ্দেশ দিয়া বুলিও সংবাদ মাধ্যমক অৱগত কৰে।
বিজেপিৰ ৰাজ্যিক সভাপতি হেমন্ত খাণ্ডেলৱালে দলৰ নেতাসকলক ৰাজহুৱা পৰিবহণ বা ই-ৰিক্সা ব্যৱহাৰ কৰিবলৈ আহ্বান জনাইছে। প্ৰধানমন্ত্ৰীৰ আহ্বানৰ প্ৰতি সঁহাৰি জনাই কিছুমান নেতাই ই-ৰিক্সা বা ই-স্কুটাৰ চলাই কাৰ্যালয়লৈ অহা দেখা গৈছে। যেনে ভূপালত সত্যেন্দ্ৰ ভূষণ সিঙে ই-ৰিক্সাত উঠি আৰু শক্তি মন্ত্ৰী প্ৰদ্যুমন সিং তোমাৰে ই-স্কুটাৰ চলাই জনসাধাৰণক সজাগ কৰিবলৈ যত্ন কৰিছে। কিন্তু একে সময়তে তেওঁলোকৰ সমৰ্থকসকলে বৃহৎ কনভয় লৈ যোৱা কাৰ্যই এই প্ৰচেষ্টাসমূহক ম্লান কৰি পেলাইছে। প্ৰধানমন্ত্ৰীৰ উপদেশ আৰু দলীয় কাৰ্যকৰ্তাৰ মাজৰ এই ব্যৱধানে এতিয়া সাধাৰণ ৰাইজৰ মাজত ব্যাপক চৰ্চাৰ বিষয় হৈ পৰিছে।
