সমগ্ৰ দেশ কঁপাই যোৱা ২০১৮ চনৰ জম্মু-কাশ্মীৰৰ কাঠুৱাৰ শিশু ধৰ্ষণ তথা হত্যা কাণ্ডৰ এজন দোষীক পঞ্জাৱৰ এখন আদালতে জামিন দিয়াৰ পিছতে জম্মু-কাশ্মীৰৰ প্ৰাক্তন মুখ্যমন্ত্ৰী মেহবুবা মুফতীয়ে ন্যায় ব্যৱস্থা সম্পূৰ্ণৰূপে খহি পৰিছে বুলি মন্তব্য কৰিছে।
২১ ডিচেম্বৰত পঞ্জাৱ আৰু হাৰিয়ানা উচ্চ ন্যায়ালয়ে বৰ্খাস্ত হোৱা আৰক্ষী উপ-পৰিদৰ্শক আনন্দ দত্তৰ বাকী থকা শাস্তি আৰু কাৰাদণ্ড স্থগিত কৰে আৰু জামিন বণ্ড প্ৰদান কৰাৰ পিছত তেওঁক মুকলি কৰাৰ নিৰ্দেশ দিয়ে।
উল্লেখ্য যে কাঠুৱা ধৰ্ষণৰ গোচৰত প্ৰমাণ ধ্বংস কৰাৰ বাবে দোষী সাব্যস্ত হৈছিল আৰক্ষীজন। “যেতিয়া এটি শিশুক ধৰ্ষণ কৰা হয় আৰু হত্যা কৰা হয়, অথচ তাৰ পিছতো ন্যায়ৰ পৰা বঞ্চিত হয়, এয়া স্পষ্ট হৈ পৰে যে ন্যায়ৰ ধ্বজা সম্পূৰ্ণৰূপে খহি পৰিছে।” মুফতীয়ে এটা টুইটত এইদৰে কয়।
স্মৰ্তব্য যে ২০১৮ চনৰ জানুৱাৰীত জম্মু-কাশ্মীৰৰ কাঠুৱা জিলাত আঠ বছৰীয়া শিশু এটিক ধৰ্ষণ কৰি হত্যা কৰা হৈছিল। ১০ জুন, ২০১৯ তাৰিখে পঞ্জাৱৰ পাঠানকোটৰ এখন আদালতে মূল অভিযুক্ত সঞ্জী ৰামকে ধৰি ছয়জন লোকক দোষী সাব্যস্ত কৰে।
বিশেষ আৰক্ষী বিষয়া দীপক খাজুৰিয়া আৰু পৰবেশ কুমাৰক আজীৱন কাৰাদণ্ডৰে দণ্ডিত কৰিছিল আদালতে।
তিনিজন বৰ্খাস্ত আৰক্ষী আনন্দ দত্ত, তিলক ৰাজ আৰু সুৰেন্দ্ৰ বাৰ্মাক প্ৰমাণ ধ্বংস কৰাৰ বাবে পাঁচ বছৰৰ কাৰাদণ্ড দিয়া হৈছিল।