পেলেষ্টাইনৰ গাজা ষ্ট্ৰিপত গড়ে প্ৰতি ১০ মিনিটৰ মূৰে মূৰে এটি শিশু নিহত হৈছে। এই কথা সদৰী কৰিছে বিশ্ব স্বাস্থ্য সংস্থাৰ মুৰব্বী টেড্ৰ’ছ আধানম গেব্ৰিয়াছুছে। শুকুৰবাৰে ৰাষ্ট্ৰসংঘৰ নিৰাপত্তা পৰিষদত তেওঁ কয় যে গাজাত কোনো ঠাই নিৰাপদ নহয় আৰু কোনোৱেই নিৰাপদ নহয়।
গাজাৰ ৩৬খন চিকিৎসালয়ৰ আধা আৰু অঞ্চলটোৰ প্ৰাথমিক স্বাস্থ্যসেৱা কেন্দ্ৰৰ দুই তৃতীয়াংশই এতিয়া কাম কৰা নাই বুলি গেব্ৰিয়াছুছে কয়। আৰু যিবোৰ চিকিৎসালয় আৰু প্ৰাথমিক স্বাস্থ্যসেৱা কেন্দ্ৰ এতিয়াও সক্ৰিয় হৈ আছে, সেইবোৰৰ সক্ষমতাও শেষ হৈ গৈছে। বিশ্ব স্বাস্থ্য সংস্থাৰ মুৰব্বীগৰাকীয়ে গাজাৰ স্বাস্থ্যসেৱা ব্যৱস্থা “পতনৰ পথত” বুলি অভিহিত কৰে।
১৫ জনীয়া সদস্যৰ নিৰাপত্তা পৰিষদক গেব্ৰিয়াছুছে কয় যে আনকি গাজাৰ চিকিৎসালয়ৰ কৰিড’ৰবোৰো মৃত, আহত আৰু অসুস্থ লোকেৰে ভৰি আছে। মৰ্গ উফন্দি উঠিছে। অস্ত্ৰোপচাৰ এনাস্থেচিয়া নোহোৱাকৈ কৰা হৈছে। হাজাৰ হাজাৰ গৃহহীন লোকে চিকিৎসালয়ত আশ্ৰয় লৈছে।
লগতে পঢ়কঃ বয়স আছিল মাত্ৰ ২৪ বছৰ; কোৰিয়ান গায়িকা কিম নাহিৰ ৰহস্যজনক মৃত্যুক কেন্দ্ৰ কৰি চাঞ্চল্য
যোৱা ৭ অক্টোবৰত পেলেষ্টাইনৰ স্বাধীনতাকামী হামাছে ইজৰাইলক আক্ৰমণ কৰে। তেতিয়াৰ পৰাই ইজৰাইলৰ বাহিনীয়ে গাজাত আক্ৰমণ অব্যাহত ৰাখিছে। ইজৰাইলে কয় যে হামাছৰ সদস্যই কমেও ১২০০ লোকক হত্যা কৰিছে। তেওঁলোকে ২৪০ৰো অধিক লোকক পণবন্দী কৰি লৈছিল। ইয়াৰ পিছত ইজৰাইলে গাজাত বিমান আক্ৰমণ চলায়। পিছত তেওঁলোকে স্থলপথতো অভিযান আৰম্ভ কৰে।
গেব্ৰিয়াছুছে কয় যে ৭ অক্টোবৰৰ পৰা গাজা আৰু পশ্চিম পাৰৰ স্বাস্থ্যসেৱাৰ সুবিধাসমূহত ২৫০টাতকৈও অধিক আক্ৰমণ বিশ্ব স্বাস্থ্য সংস্থাই পৰ্যবেক্ষণ কৰিছে। আনহাতে, ইজৰাইলত স্বাস্থ্যসেৱা ব্যৱস্থাৰ ওপৰত ২৫টা আক্ৰমণ সংঘটিত হৈছে। ইজৰাইলে দাবী কৰিছে যে হামাছে চিকিৎসালয়খনৰ তলৰ সুৰংগসমূহত অস্ত্ৰ-শস্ত্ৰ লুকুৱাই ৰাখিছে, যদিও এই অভিযোগ হামাছে অস্বীকাৰ কৰিছে।
ইথিওপিয়াৰ টিগ্ৰেৰ বাসিন্দা গেব্ৰিয়াছুছে কয় যে গাজাত শিশুসকলৰ কেনেকুৱা অৱস্থা, সৰুতে মোৰো এই অভিজ্ঞতা হৈছিল।
লগতে পঢ়কঃ বিপৰ্যয়! বিশ্বকাপৰ পৰা বিদায় লোৱাৰ মুহূৰ্ততে আইচিচিয়ে নিলম্বন কৰিলে কুশল মেণ্ডিছৰ শ্ৰীলংকাক
বিশ্ব স্বাস্থ্য সংস্থাৰ মুৰব্বীগৰাকীয়ে কয়, ‘এতিয়া স্বাস্থ্যকৰ্মী আৰু সাধাৰণ লোকক সহায় কৰাৰ সৰ্বোত্তম উপায় হ’ল তেওঁলোকক প্ৰয়োজনীয় স্বাস্থ্য সেৱা প্ৰদান কৰা। তেওঁলোকক ঔষধ, চিকিৎসা সামগ্ৰী দিয়া আৰু চিকিৎসালয়সমূহ চলি থাকিবলৈ জেনেৰেটৰলৈ ইন্ধন যোগান নিশ্চিত কৰা।’
