বিশ্ব স্বাস্থ্য সংস্থা আৰু ইণ্টাৰনেচনেল এজেন্সী ফৰ ৰিচাৰ্চ অন কেন্সাৰে যুটীয়াভাৱে প্ৰকাশ কৰা ‘গ্ল‘বেল ষ্টেটাছ ৰিপ‘ৰ্ট অন কেন্সাৰ ২০২৬‘ শীৰ্ষক প্ৰতিবেদন অনুসৰি বিশ্বৰ উচ্চ আৰু নিম্ন আয়ৰ দেশসমূহৰ মাজত কৰ্কট ৰোগৰ চিকিৎসা আৰু ৰোগীৰ জীৱন ৰক্ষাৰ ক্ষেত্ৰত এক ব্যাপক বৈষম্য পোহৰলৈ আহিছে। প্ৰতিবেদনখনত উল্লেখ কৰা মতে, কৰ্কট ৰোগৰ ফলত বৰ্তমান বিশ্বত প্ৰতিদিনে ছাব্বিশ হাজাৰতকৈয়ো অধিক লোকৰ মৃত্যু হয় আৰু বছৰি প্ৰায় এক কোটি লোকে এই ৰোগত প্ৰাণ হেৰুৱায়, যাৰ ফলত ই হৃদৰোগৰ পিছতে বিশ্বৰ দ্বিতীয়টো সৰ্বাধিক মৃত্যুৰ কাৰণ হিচাপে পৰিগণিত হৈছে।
প্ৰতিবেদন অনুসৰি, সমগ্ৰ বিশ্বত প্ৰতি বছৰে প্ৰায় দুই কোটি ছয় লাখ লোক নতুনকৈ কৰ্কট ৰোগত আক্ৰান্ত হয়। ধঁপাত নিয়ন্ত্ৰণ, টিকাকৰণ আৰু ৰোগ প্ৰতিৰোধৰ ক্ষেত্ৰত বিশ্বই যথেষ্ট অগ্ৰগতি লাভ কৰিলেও লাখ লাখ লোকে আজিও জীৱনদায়িনী চিকিৎসা লাভৰ ক্ষেত্ৰত তীব্ৰ বৈষম্যৰ সন্মুখীন হৈছে। এই সন্দৰ্ভত বিশ্ব স্বাস্থ্য সংস্থাৰ সঞ্চালক প্ৰধান ডাঃ টেড্ৰছ আধানম ঘেব্ৰেইছুছে মত প্ৰকাশ কৰে যে কৰ্কট ৰোগে প্ৰায় সকলোকে স্পৰ্শ কৰে, কিন্তু এজন ব্যক্তিয়ে কৰ্কট ৰোগৰ পৰা পৰিত্ৰাণ পাব নে নাই সেয়া তেওঁৰ জন্মস্থান বা উপাৰ্জনৰ ওপৰত নিৰ্ভৰশীল হোৱাটো অনুচিত। তেওঁ লগতে কয় যে প্ৰতিবেদনত উল্লেখ কৰা এই বৈষম্যসমূহ অপৰিহাৰ্য নহয়, বৰঞ্চ ই মানুহৰ পছন্দৰ পৰিণাম আৰু একত্ৰিত প্ৰচেষ্টাৰ জৰিয়তে ইয়াক সলনি কৰিব পৰা যাব।
ধনী আৰু দৰিদ্ৰ ৰাষ্ট্ৰসমূহৰ মাজত ৰোগীৰ জীৱন ৰক্ষাৰ হাৰৰ পাৰ্থক্য অতি উদ্বেগজনক। উচ্চ আয়ৰ দেশসমূহত স্তন কৰ্কট ৰোগত আক্ৰান্ত সাতাশী শতাংশ মহিলাই কমেও পাঁচ বছৰ জীয়াই থকাৰ বিপৰীতে নিম্ন আয়ৰ দেশসমূহত এই হাৰ মাত্ৰ বিয়াল্লিছ শতাংশলৈ হ্ৰাস পায়। বিশ্বৰ প্ৰতি তিনিখন দেশৰ ভিতৰত এখনতকৈয়ো কম দেশেহে বৰ্তমান কৰ্কট ৰোগৰ চিকিৎসাক সৰ্বজনীন স্বাস্থ্য আৱৰণৰ অন্তৰ্ভুক্ত কৰিছে, যাৰ ফলত বহু ৰোগী প্ৰয়োজনীয় ৰোগ নিৰ্ণয় আৰু চিকিৎসাৰ পৰা বঞ্চিত হ‘বলগীয়া হৈছে। আনহাতে, অত্যাৱশ্যকীয় কুৰিবিধ কৰ্কট ৰোগৰ ঔষধৰ উপলব্ধতা উচ্চ আয়ৰ দেশসমূহত ৬৮ ৰ পৰা ৯৪ শতাংশ হোৱাৰ বিপৰীতে নিম্ন আৰু মজলীয়া আয়ৰ দেশসমূহত ই মাত্ৰ ৯ ৰ পৰা ৫৪ শতাংশৰ ভিতৰত আৱদ্ধ।
কৰ্কট ৰোগে সৃষ্টি কৰা আৰ্থ-সামাজিক বোজাৰ বিষয়েও বিশ্ব স্বাস্থ্য সংস্থাই বিশেষভাৱে আলোকপাত কৰিছে। ৰোগীসকলৰ মাজত চলোৱা প্ৰথমটো গোলকীয় সমীক্ষা অনুসৰি, কমেও পঁয়তাল্লিছ শতাংশ লোকে আৰ্থিক সংকটৰ সন্মুখীন হয়, আধাতকৈ বেছি লোকে মানসিক স্বাস্থ্যৰ সমস্যালৈ আঙুলিয়াই দিয়ে আৰু প্ৰায় সকলো তত্ত্বাৱধায়কে অবৈতনিক যতনৰ দায়িত্ব আৰু সামাজিক বিচ্ছিন্নতাৰ দৰে তীব্ৰ হেঁচাৰ সন্মুখীন হয়। মহাদেশীয় পৰিসংখ্যা বিশ্লেষণ কৰিলে দেখা যায় যে ২০২৪ চনত বিশ্বৰ মুঠ কৰ্কট ৰোগী আৰু মৃত্যুৰ আধাতকৈ বেছি এছিয়া মহাদেশত সংঘটিত হৈছিল। ইয়াৰ বিপৰীতে, বিশ্বৰ জনসংখ্যাৰ মাত্ৰ ন শতাংশ লোক বাস কৰা ইউৰোপত একৈশ শতাংশ আক্ৰান্ত আৰু বিশ শতাংশ মৃত্যুৰ ঘটনা পঞ্জীয়ন কৰা হৈছে। আনহাতে, আফ্ৰিকা আৰু এছিয়াৰ কিছু অংশত ৰোগৰ প্ৰাদুৰ্ভাৱ কম যদিও মৃত্যুৰ হাৰ যথেষ্ট বেছি।
বিশ্বজুৰি কৰ্কট ৰোগত হোৱা মৃত্যুৰ প্ৰধান কাৰণ হিচাপে হাওঁফাওঁৰ কৰ্কট ৰোগ শীৰ্ষত আছে। পুৰুষৰ ক্ষেত্ৰত হাওঁফাওঁ, প্ৰষ্টেট আৰু ক‘ল‘ৰেক্টেল কৰ্কট ৰোগ বেছিকৈ হোৱা দেখা যায় আৰু মহিলাৰ ক্ষেত্ৰত স্তন, হাওঁফাওঁ আৰু ক‘ল‘ৰেক্টেল কৰ্কট ৰোগৰ মাত্ৰা সৰ্বাধিক। ২০২৪ চনৰ আনুমানিক হিচাপ অনুসৰি বিশ্বজুৰি ২৪ লাখ মহিলা স্তন কৰ্কট ৰোগত আক্ৰান্ত হৈছিল আৰু প্ৰায় ছয় লাখ ৯৪ হাজাৰ মহিলাৰ মৃত্যু হৈছিল। বিশ্ব স্বাস্থ্য সংস্থাৰ মতে, দহটাৰ ভিতৰত প্ৰায় চাৰিটা কৰ্কট ৰোগৰ কাৰণ হৈছে প্ৰতিৰোধযোগ্য বিপদশংকা, যাৰ ভিতৰত ধঁপাত আৰু সুৰা সেৱন, মেদবহুলতা, শাৰীৰিক নিস্ক্ৰিয়তা, অস্বাস্থ্যকৰ খাদ্যাভ্যাস আৰু হিউমেন পেপিল‘মা ভাইৰাছ তথা হেপাটাইটিছ বি আৰু চিৰ দৰে সংক্ৰমণ অন্যতম। ইণ্টাৰনেচনেল এজেন্সী ফৰ ৰিচাৰ্চ অন কেন্সাৰৰ সঞ্চালক ডাঃ এলিজাবেথ ৱেইডাৰপাছে সতৰ্ক কৰি দিয়ে যে প্ৰতিৰোধমূলক নীতি গ্ৰহণ কৰা দেশসমূহত ৰোগৰ হাৰ হ্ৰাস পাইছে যদিও ইয়াৰ অগ্ৰগতি অতি লেহেমীয়া আৰু মেদবহুলতা, বায়ু প্ৰদূষণ আদিৰ বাবে ৰোগৰ প্ৰকৃতি সলনি হৈছে, সেয়েহে কৰ্কট ৰোগ প্ৰতিৰোধক এক ৰাজনৈতিক অগ্ৰাধিকাৰ দিয়া উচিত।
বিগত দশকটোত বিশ্বজুৰি ধঁপাতৰ ব্যৱহাৰ হ্ৰাস, টিকাকৰণ কাৰ্যসূচী আৰু ৰাজনৈতিক প্ৰতিশ্ৰুতিৰ দৰে কিছু গুৰুত্বপূৰ্ণ সফলতা অৰ্জন কৰা হৈছে বুলি প্ৰতিবেদনখনত উল্লেখ কৰা হৈছে। ২০১০ চনৰ পঞ্চাশ শতাংশৰ তুলনাত বৰ্তমান বিৰাশী শতাংশ দেশে ৰাষ্ট্ৰীয় কৰ্কট নিয়ন্ত্ৰণ পৰিকল্পনা প্ৰস্তুত কৰিছে। এই অগ্ৰগতিৰ পাছতো ৰোগী আৰু তেওঁলোকৰ পৰিয়ালক স্বাস্থ্য ব্যৱস্থাৰ কেন্দ্ৰবিন্দুত ৰাখি কৰ্কট ৰোগ নিয়ন্ত্ৰণৰ পৰিসৰ কেৱল চিকিৎসাৰ মাজতে আৱদ্ধ নাৰাখি অধিক প্ৰসাৰিত কৰাৰ প্ৰয়োজনীয়তা বিশ্ব স্বাস্থ্য সংস্থাই ব্যক্ত কৰিছে। সংস্থাটোৰ গোলকীয় সমীক্ষাত নেতৃত্ব দিয়া শৈশৱৰ কৰ্কট ৰোগ জয় কৰা ক্লৰিছা চিলষ্ট্ৰাই কৰ্কট ৰোগক কেৱল এক চিকিৎসা নিৰ্ণয় নহয় বৰঞ্চ ইয়াৰ প্ৰভাৱ ব্যক্তি আৰু পৰিয়ালৰ প্ৰতিটো দিশতে সুদূৰপ্ৰসাৰী বুলি অভিহিত কৰি অধিক সমতাপূৰ্ণ আৰু কাৰ্যকৰী স্বাস্থ্য নীতি প্ৰস্তুত কৰাৰ বাবে ৰোগীসকলৰ সৈতে মিলি কাম কৰিবলৈ নীতিনিৰ্ধাৰকসকললৈ আহ্বান জনাইছে।
