প্ৰকৃততে বেইমান কোন? এই কথা উপলব্ধি কৰাৰ বাবে মুখ্য মন্ত্ৰী সৰ্বানন্দ সোণোৱালক আহ্বান জনাইছে অসম প্ৰদেশ কংগ্ৰেছ কমিটীৰ উপ-সভাপতি প্ৰদ্যুৎ বৰদলৈয়ে।
শুকুৰবাৰে গুৱাহাটীৰ ৰাজীৱ ভৱনত এখন সংবাদমেল সম্বোধন কৰি প্ৰদ্যুৎ বৰদলৈয়ে কংগ্ৰেছ দলক ‘বেইমান’ আখ্যা দিয়া মুখ্য মন্ত্ৰী সোণোৱালক কঠোৰ সমালোচনা কৰাৰ লগতে তেওঁৰ এই মন্তব্যৰ প্ৰত্যুত্তৰ দিয়ে।
বৰদলৈয়ে কয়, “মুখ্য মন্ত্ৰী সৰ্বানন্দ সোণোৱালে তেওঁ বৰ্তমান থকা দলটোৰ উত্তৰসূৰীসকলৰ ইতিহাস পাহৰি গৈছে। সেই দলৰ উত্তৰসূৰীসকলে ব্ৰিটিছৰ সহযোগী হৈ ভাৰতৰ স্বাধীনতা আন্দোলনৰ বিপক্ষে থিয় দিছিল। ভাৰতৰ ধৰ্মনিৰপেক্ষ পৰিস্থিতিক নসাৎ কৰি ধৰ্মীয় মেৰুকৰণৰে ৰাজনৈতিক স্বাৰ্থসিদ্ধি কৰি আছে।”
বৰদলৈয়ে লগতে প্ৰকৃততে ‘বেইমান কোন’ সেই কথা সৰ্বানন্দ সোণোৱালক বুকুত হাত দি আত্ম-উপলব্ধি কৰাৰ বাবেও আহ্বান জনায়।
তেওঁ কংগ্ৰেছ দলৰ ইতিহাসৰ কথা সোঁৱৰাই দি কংগ্ৰেছে ভাৰতৰ সকলো জাতি-ধৰ্ম-বৰ্ণৰ লোকক লগত লৈ এক বহুত্ববাদী ভাৰতীয়ত্ব প্ৰতিষ্ঠা কৰা বুলি মন্তব্য কৰে।
“যি দলে অহিংসাৰ জৰিয়তে দেশৰ স্বাধীনতা অৰ্জন কৰালে, সাম্প্ৰদায়িক বিষবাষ্প নোহোৱা কৰিলে। সেই দলক মুখ্য মন্ত্ৰী সৰ্বানন্দ সোণোৱালে বেইমান বুলি কৈছে”, প্ৰদ্যুৎ বৰদলৈয়ে কয়।
ইয়াৰ উপৰি বৰদলৈয়ে মুখ্য মন্ত্ৰী সোণোৱালক ‘কথাই প্ৰতি লুটি-বাগৰ মাৰিব পৰা’ আৰু ‘দিল্লীৱালা নেতাৰ ভৰি চুই ক্ষমতা সৰ্বস্ব ৰাজনীতি কৰা’ বুলিও কটাক্ষ কৰে।
‘তেওঁক অসমৰ ইতিহাসে দ্বিতীয়জন বদন বৰফুকন বুলি স্মৰণ কৰিব’ বুলি কৈ মুখ্য মন্ত্ৰী সৰ্বানন্দ সোণোৱালে জাতি-মাটি-ভেটি ৰক্ষাৰ আশ্বাস দি এতিয়া জাতিক সংকটৰ মুখলৈ ঠেলি দিয়াৰ ষড়যন্ত্ৰত লিপ্ত হোৱা বুলি মন্তব্য কৰে। সোণোৱাল নেতৃত্বাধীন চৰকাৰৰ দিনতেই এতিয়া লুণ্ঠন, চিণ্ডিকেটৰাজে চানি ধৰিছে বুলিও তেওঁ কয়।
বিজেপি চৰকাৰে এতিয়া পুঁজিপতিৰ হাতত দেশৰ অৰ্থনীতি গতাই দিয়া বুলি মন্তব্য কৰি কংগ্ৰেছে কেইজনমান পুঁজিপতিৰ হাতত দেশৰ অৰ্থনীতি গতাই দিয়া নাছিল বুলিও প্ৰদ্যুৎ বৰদলৈয়ে কয়।
উল্লেখ্য যে, মুখ্য মন্ত্ৰী সৰ্বানন্দ সোণোৱালে নতুন দিল্লীৰ এখন সভাত কংগ্ৰেছ দলক ‘বেইমান’ আখ্যা দিছিল। লগতে ৰাজ্যিক বিজেপিৰ সভাপতি ৰঞ্জিত দাসেও কংগ্ৰেছক ‘ননছেনছ’ বুলি কৈছিল। মুখ্য মন্ত্ৰীৰ লগতে ৰঞ্জিত দাসৰ মন্তব্যত ক্ষুব্ধ প্ৰদেশ কংগ্ৰেছৰ আহ্বানত আজি সমগ্ৰ ৰাজ্যতে কংগ্ৰেছ-কৰ্মীসকলে তেওঁলোকৰ পুত্তলিকাও দাহ কৰে।
