লকডাউনৰ কাৰণে বহিঃৰাজ্যত আৱদ্ধ হৈ থকা প্ৰব্ৰজিত শ্ৰমিকসকলৰ বাবে ভগৱানৰ ৰূপত থিয় দিছে বলিউদৰ জনপ্ৰিয় অভিনেতা চনু চুডে।
প্ৰশাসনৰ অনুমতিত কোনো সহায় নোলোৱাকৈ সম্পূৰ্ণ নিজা খৰচত যিদৰে শ্ৰমিক সকলক নিজৰ নিজৰ ঘৰলৈ পঠিয়াই আছে তাক লৈ সকলো স্তৰৰ লোকে এতিয়া অভিনেতা চুডক বাস্তৱ হিৰ’ সজোৱাৰ লগতে ধন্যবাদ জ্ঞাপন কৰিছে।
কিন্তু এইখিনিতে নিশ্চয় সকলোৰে মনত এটা প্ৰশ্নৰ উদ্ভৱ হৈছে যে অভিনেতা চনুৱে কিয় মুম্বাইত আৱদ্ধ প্ৰব্ৰজিত শ্ৰমিসকলক এইদৰে সহায় কৰি আছে।
এই প্ৰশ্নৰ উত্তৰ হৈছে এটা ৰেইল পাছ, আৰু এই পাছটো বৰ্তমান তীব্ৰ হাৰত ভাইৰেল হৈ আছে ছ’চিয়েল মিডিয়াত।
আচলতে চনু চুড পাঞ্জাৱৰ মোগা জিলাৰ বাসিন্দা। তেওঁ পাঞ্জাৱৰ পৰা নিজৰ কেৰিয়াৰ গঢ়াৰ বাবে মায়ানগৰী মুম্বাইলৈ আহিছিল।
অভিনয় জগতত কেৰিয়াৰ গঢ়িব খোজা চনুৱে প্ৰথমাৱস্থাত যথেষ্ট সংগ্ৰাম কৰিবলগীয়া হৈছিল। কেৰিয়াৰৰ আৰম্ভণিৰ এই সংগ্ৰামৰ সময়ত তেওঁ অহা যোৱা কৰিছিল লোকেল ট্ৰেইনত।
আজিৰ এই অৱস্থা পোৱাত কেনে কেনে ধৰণৰ সংগ্ৰাম কৰিব লগীয়া হৈছিল সেই সকলো মনত আছে চনুৰ। সেয়ে আজি তেওঁ এইদৰে প্ৰব্ৰজিত শ্ৰমিকসকলক নিঃস্বাৰ্থভাৱে সহায় আগবঢ়াই আছে।
তদুপৰি লকডাউনত আৱদ্ধ শ্ৰমিকসকলে খোজ কাঢ়ি কাঢ়ি নিজৰ ঘৰলৈ গৈ থকা ছবিয়ে চনুক যথেষ্ট পৰিমানে আৱেগিক কৰি তুলিছিল আৰু সেয়ে তেওঁ শ্ৰমিক সকলক ঘূৰাই পঠিওৱাৰ সিদ্ধান্ত লৈছিল।
উল্লেখ্য যে ভাৰতত ক’ৰ’না ভাইৰাছৰ সংহাৰ আৰম্ভ হোৱাৰ সময়ৰে পৰা অভিনেতা চনুৱে বিভিন্ন ধৰণে সহায় আগবঢ়াই আহিছে।
প্ৰথমে তেওঁ কোৱাৰেণ্টাইন চেণ্টাৰৰ বাবে মুম্বাইস্থিত এখন হোটেল কৰ্তৃপক্ষক প্ৰদান কৰিছিল। ইয়াৰ পিছত দৈনিক ৪৫ হাজাৰৰো অধিক দুখীয়া শ্ৰমিক পৰিয়ালৰ মাজত খাদ্য সামগ্ৰী বিতৰণ কৰি মহানুভৱতাৰ পৰিচয় দাঙি ধৰিছে।
