চাৰি মাহ পাৰ হৈ গ’ল, মণিপুৰৰ হিংসা এতিয়াও বন্ধ হোৱা নাই। উত্তৰ-পূৰ্বাঞ্চলৰ ৰাজ্যসমূহৰ পৰিস্থিতি সন্দৰ্ভত আলোচনাৰ দাবীত বিৰোধীয়ে সংসদত কেন্দ্ৰৰ বিৰুদ্ধে অনাস্থা প্ৰস্তাৱ আনিছে।
চৰকাৰ ভংগ কৰাৰ কোনো পৰিকল্পনা নাই বা মণিপুৰৰ মুখ্যমন্ত্ৰীক পদৰ পৰা অপসাৰণ কৰাৰ কোনো পৰিকল্পনা নাই বুলি মন্তব্য কৰিছে বিজেপিয়ে।
বুধবাৰে কেন্দ্ৰীয় গৃহমন্ত্ৰী অমিত শ্বাহে সংসদত কয় যে মণিপুৰত দুটা সম্প্ৰদায়ৰ মাজত সংঘাতৰ সৃষ্টি হোৱাৰ পিছতো কিয় মণিপুৰ চৰকাৰ ভংগ নহ’ল। মণিপুৰৰ এন বীৰেণ সিং চৰকাৰে হিংসা ৰোধ কৰাত পূৰ্ণ সহযোগিতা আগবঢ়াইছে বুলি গৃহমন্ত্ৰীগৰাকীয়ে কয়।
যোৱা মে’ মাহৰ পৰা মণিপুৰত সাম্প্ৰদায়িক সংঘাতৰ সৃষ্টি হৈছে। কুকি আৰু মেটেই সম্প্ৰদায়ৰ মাজত সংঘৰ্ষত এতিয়ালৈকে ১৫০ জন লোকৰ প্ৰাণহানি হৈছে। শেহতীয়াকৈ ছ’চিয়েল মিডিয়াত এটা ভিডিঅ’ ভাইৰেল হৈছিল য’ত দুগৰাকী মহিলাক উলংগ কৰি দলবদ্ধ ধৰ্ষণ কৰাৰ অভিযোগ উত্থাপন হৈছিল।
বিৰোধীয়ে দাবী কৰিছে যে মণিপুৰত প্ৰশাসনিক ব্যৱস্থা সম্পূৰ্ণৰূপে ভাঙি গৈছে। ৰাজ্যৰ পৰিস্থিতি নিয়ন্ত্ৰণত ব্যৰ্থ হৈছে মুখ্যমন্ত্ৰী। মণিপুৰত ৰাষ্ট্ৰপতিৰ শাসন জাপি দিব লাগে। যোৱা জুন মাহত যেতিয়া বিৰোধী দলসমূহে গৃহমন্ত্ৰী অমিত শ্বাহৰ সৈতে বৈঠকত মিলিত হৈছিল, তেতিয়া মণিপুৰৰ মুখ্যমন্ত্ৰী এন বীৰেণ সিঙৰ পদত্যাগৰো দাবী উত্থাপন হৈছিল।
কালি সংসদত পুনৰবাৰ এন বীৰেণ সিঙৰ পদত্যাগৰ দাবী জনাইছে বিৰোধী নেতাসকলে। কংগ্ৰেছৰ গৌৰৱ গগৈৰ পৰা আৰম্ভ কৰি এন চি পিৰ সুপ্ৰিয়া চুলে আৰু তৃণমূল কংগ্ৰেছৰ সৌগতা ৰায় – সকলোৱে মণিপুৰত ৰাষ্ট্ৰপতিৰ শাসন আৰু মণিপুৰৰ মুখ্যমন্ত্ৰীৰ পদত্যাগ দাবী কৰিছিল।
বিৰোধীৰ এই দাবীৰ প্ৰতি সঁহাৰি জনাই কেন্দ্ৰীয় গৃহমন্ত্ৰী অমিত শ্বাহে কয়, “চৰকাৰে সহযোগ নকৰিলে ৰাষ্ট্ৰপতিৰ শাসন জাপি দিয়া হয়। কিন্তু মণিপুৰ চৰকাৰে কেন্দ্ৰক সম্পূৰ্ণ সহযোগিতা আগবঢ়াইছে। মুখ্যমন্ত্ৰীয়ে সহযোগ কৰিছে।”
গৃহমন্ত্ৰীৰ এই মন্তব্যৰ প্ৰতিক্ৰিয়া প্ৰকাশ কৰে কংগ্ৰেছ নেতা গৌৰৱ গগৈয়ে। সংসদৰ বাহিৰত তেওঁ কয়, ‘মণিপুৰত ৬০ হাজাৰ লোক সাহায্য শিবিৰত বসবাস কৰি আছে, আৰু কেন্দ্ৰই কয় যে মুখ্যমন্ত্ৰীয়ে সহযোগ কৰিছে। এনে সহযোগিতাৰ কোনো প্ৰয়োজন নাই, নৈতিকতাৰ খাতিৰত প্ৰধানমন্ত্ৰীয়ে এতিয়াই মুখ্যমন্ত্ৰীক বৰ্খাস্ত কৰক। ই মুখ্যমন্ত্রীৰ কেনেধৰণৰ সহযোগিতা, য’ত আৰক্ষী চকীৰ পৰা অস্ত্ৰ-শস্ত্ৰ লুট কৰা হৈছে। গৃহ বিভাগ আৰু মুখ্যমন্ত্ৰীৰ ভুল স্বীকাৰ কৰাৰ সাহস নাই।”
