মুখ্যমন্ত্ৰীৰ পদৰ প্ৰস্তাৱ কিয় নাকচ কৰিলে চনু চুডে? কোনে দিছিল এই প্ৰস্তাৱ?

কোভিড মহামাৰীৰ সময়ত দুখীয়াৰ ত্ৰাণকৰ্তা হৈ পৰিছিল বলীউডৰ অভিনেতা চনু চুড। লকডাউনত দেশৰ বিভিন্ন ঠাইত আবদ্ধ হৈ থকা প্ৰব্ৰজিত শ্ৰমিকসকলক ঘৰলৈ ঘূৰাই পঠিওৱাৰ ক্ষেত্ৰত তেওঁৰ বিশেষ ভূমিকা আছিল।

ইয়াৰ উপৰিও বহু দৰিদ্ৰ আৰু ৰোগীয়া লোকক সহায় কৰি ৰিয়েল লাইফ হিৰ’ হৈ পৰিছে অভিনেতা চনু। ৰাজনীতি অবিহনেও সমাজৰ বাবে কাম কৰিব পাৰি বুলি ইতিমধ্যে প্ৰমাণ কৰি দিছে অভিনেতাগৰাকীয়ে।

শেহতীয়াকৈ ৰাজনীতিত যোগদান কৰাৰ প্ৰস্তাৱো লাভ কৰিছে চনু চুডে। আনকি মুখ্যমন্ত্ৰী পদৰ বাবেও প্ৰস্তাৱ লাভ কৰিছে অভিনেতাগৰাকীয়ে। কিন্তু সেই সকলোবোৰ প্ৰস্তাৱ তেওঁ নাকচ কৰিছে। শেহতীয়াকৈ এক সাক্ষাৎকাৰত এই বিষয়ে মুকলিকৈ কয় অভিনেতাগৰাকীয়ে।

চনু চুডে কয়, “মোক মুখ্যমন্ত্ৰীৰ পদৰ প্ৰস্তাৱো দিয়া হৈছিল। সেই প্ৰস্তাৱ মই নাকচ কৰিলোঁ। তাৰ পিছত মোক উপ-মুখ্যমন্ত্ৰী হ’বলৈ কোৱা হ’ল। দেশৰ এজন প্ৰভাৱশালী ব্যক্তিয়ে মোক এই প্ৰস্তাৱ দিছিল।”

অভিনেতাজনে অৱশ্যে সেই সকলোবোৰ অফাৰ নাকচ কৰিছিল। অভিনেতাগৰাকীৰ মতে, তেওঁ নিজৰ স্বাধীনতা হেৰুৱাব নিবিচাৰে।

চনুৱে কয়, “মানুহে দুটা কাৰণত ৰাজনীতিত যোগদান কৰে। এটা টকা উপাৰ্জন কৰিবলৈ আৰু আনটো হৈছে ক্ষমতাৰ বাবে। দুয়োটাৰে প্ৰতি মোৰ আগ্ৰহ নাই। ৰাজনীতিত থকাৰ দায়িত্ব বহুত। মানুহক সহায় কৰিবলৈ মোক মুকলি পৰিৱেশৰ প্ৰয়োজন। ৰাজনীতিৰ অত্যাচাৰলৈ মোৰ ভয় লাগে।”

অভিনেতাজনে কয়, “এতিয়া মই ৰাজনীতিৰ বাবে সাজু হোৱা নাই। বৰ্তমান মই অভিনেতা-পৰিচালক হিচাপে অধিক কাম কৰিব বিচাৰো। মই ৰাজনীতিৰ বিৰোধী নহয়। ৰাজনীতিক মই সন্মান কৰো। মোৰ বহু বন্ধু আছে যিসকলে ৰাজনীতিত থাকি ভাল কাম কৰি আছে”।

উল্লেখ্য যে ২০২২ চনত চনু চুডৰ ভগ্নী মালবিকা চুডে কংগ্ৰেছত যোগদান কৰিছিল। পঞ্জাৱৰ মোগা সমষ্টিৰ পৰা বিধানসভা নিৰ্বাচনত প্ৰতিদ্বন্দ্বিতা কৰি আপৰ প্ৰাৰ্থী অমনদীপ কৌৰৰ ওচৰত তেওঁ পৰাস্ত হৈছিল।