বিশ্ব স্বাস্থ্য সংস্থাৰ এজন বিশেষজ্ঞই ক’ভিড-১৯ সম্পৰ্কে এটা বিস্ফোৰক ভাষ্য প্ৰদান কৰিছে।
তেওঁ কৈছে যে মহামাৰীবিধৰ ভাইৰাছ কোনো লেবৰেটৰীৰ পৰা উৎপন্ন হোৱা নাই।
বৰঞ্চ চীনৰ বন্যপ্ৰাণীৰ ফাৰ্মসমূহৰ (wildlife farm) পৰা এই ভাইৰাছবিধ বিয়পা বুলি তেওঁ দাবী কৰিছে।
পিটাৰ ডাচজাক নামৰ ব্ৰিটিছ বিশেষজ্ঞজনে আমেৰিকাৰ এটা সংবাদ প্ৰতিষ্ঠানৰ আগত এই দাবী কৰিছে.
উল্লেখযোগ্য যে ক’ভিড-১৯ৰ বিষয়ে তথ্য লাভ কৰিবলৈ তেওঁ বিশ্ব স্বাস্থ্য সংস্থাৰ এটা অনুসন্ধানকাৰী দলৰ স’তে চীন ভ্ৰমণ কৰিছিল।
তেওঁ কয় যে দক্ষিণ চীনৰ বন্যপ্ৰাণীৰ ফাৰ্মসমূহৰ পৰা ৱুহানৰ বজাৰৰ বিক্ৰেতাসকললৈ কেঁচা মাংসসমূহ যোগান ধৰা হয়।
যাৰ ফলত ৱুহানত প্ৰথমৰে পৰা এই মহামাৰীৰ সংক্ৰমণ হৈছিল।
বিশ্ব স্বাস্থ্য সংস্থাই ইয়াৰ প্ৰমাণ লাভ কৰা বুলি তেওঁ জনাইছে।
ডাচজাকে কয় যে চীনৰ চৰকাৰেও কৰোণা ভাইৰাচৰ উৎপন্নস্থলী এই বন্যপ্ৰাণী ফাৰ্মসমূহ বুলিয়েই অনুমান কৰিছে।
ফাৰ্মসমূহৰ বাদুলীৰ পৰা মানুহৰ শৰীৰলৈ ভাইৰাচবিধ সংক্ৰমণ হোৱা বুলি চীনৰ চৰকাৰে ধাৰণা কৰিছে।
ডাচজাকে চীনৰ বন্যপ্ৰাণীৰ ফাৰ্মসমূহৰ বিষয়ে জনায় যে গ্ৰাম্যাঞ্চলৰ পৰা দৰিদ্ৰতা নিৰ্মূলৰ বাবে চীনৰ চৰকাৰে এই ফাৰ্মসমূহৰ ব্যৱস্থা কৰিছিল।
ফাৰ্মসমূহত হগাগেদেৰা, কেটেলাপহু, বনৰীয়া কুকুৰ, বাঁহ নিগনিকে ধৰি বিভিন্ন ধৰণৰ বন্যপ্ৰাণী পোঁহা হয় আৰু খাদ্যৰ বাবে বজাৰত তাৰ মাংসসমূহ বিক্ৰী কৰা হয়।
আনহাতে, বিশ্বস্বাস্থ্য সংস্থাই আশা প্ৰকাশ কৰিছে যে অনুসন্ধানকাৰী দলটোৰ প্ৰতিবেদনখন কিছু দিনৰ পাছতে পোৱা যাব।
অনুসন্ধানকাৰী দলটোৱে চলিত বৰ্ষৰ জানুৱাৰী মাহত চীন ভ্ৰমণ কৰিছিল।
ডাচজাকে জনোৱামতে, চীনে উক্ত ফাৰ্মসমূহ ২০২০ চনৰ ফেব্ৰুৱাৰী মাহত বন্ধ কৰি দিছে।
ডাচজাকে কয় যে মহামাৰী বিয়পাৰ পাছতে ফাৰ্মসমূহৰ কৰ্তৃপক্ষক চৰকাৰে বন্যপ্ৰাণীসমূহ কিদৰে হত্যা কৰি পুতিব লাগে সেই বিষয়ে দিহা-পৰামৰ্শ প্ৰদান কৰিছিল, যাতে বন্যপ্ৰাণীসমূহৰ পৰা ৰোগ বিয়পিব নোৱাৰে।
ডাচজাকৰ এই ভাষ্যই সৰ্বত্ৰ চৰ্চা লাভ কৰিছে।
