সামাজিক মাধ্যমত এতিয়া তীব্ৰ আলোড়ন সৃষ্টি হৈছে। যুৱ প্ৰজন্মৰ বিভিন্ন সমস্যা লৈ ৰাজপথত নামি আন্দোলন গঢ়ি তোলা হৈছে। আনকি শিক্ষামন্ত্ৰীৰ পদত্যাগৰ দাবীত দেশজুৰি গণ আন্দোলনৰো আহ্বান জনাইছে ককৰোচ জনতা পাৰ্টীয়ে। কিন্তু ইয়াৰ পিছৰ পদক্ষেপ কি হ’ব, তেওঁলোকে সম্পূৰ্ণ ৰাজনৈতিক দল খুলি নিৰ্বাচনৰ পথাৰত নামিবনে নে এইদৰেই বিভিন্ন বিষয়ত চৰকাৰ আৰু প্ৰশাসনক আইনা দেখুৱাই থাকিব, তাক লৈ প্ৰশ্ন উঠিছে। ককৰোচ জনতা পাৰ্টীৰ নেতাসকলে আচলতে কি বিচাৰিছে, সেই সন্দৰ্ভত অৱশেষত ইংগিত দিছে দলটোৰ প্ৰতিষ্ঠাপক অভিজিত দীপকে।
তেওঁলোকৰ দলটোৱে নিৰ্বাচনত অৱতীৰ্ণ হ’ব খোজেনে নাই সেই প্ৰশ্নৰ উত্তৰত অভিজিতে কয় যে তেওঁলোকৰ নিৰ্বাচন খেলাৰ প্ৰশ্নই নুঠে। এই দেশত যদি প্ৰতিগৰাকী ব্যক্তিয়েই নিজৰ অধিকাৰ আদায়ৰ বাবে নিৰ্বাচনত অৱতীৰ্ণ হ’বলগীয়া হয়, তেন্তে দেশ কেনেকৈ চলিব বুলি তেওঁ প্ৰশ্ন উত্থাপন কৰে। মঙলবাৰে ককৰোচ জনতা পাৰ্টীৰ প্ৰতিষ্ঠাপক অভিজিত দীপকে ইংগিত দিয়ে যে তেওঁলোকে এইদৰেই বিভিন্ন সমস্যাৰ বিৰুদ্ধে প্ৰতিবাদ অব্যাহত ৰাখিব বিচাৰে। নিৰ্বাচনত প্ৰতিদ্বন্দিতা কৰাৰ কোনো বিশেষ ইচ্ছা তেওঁলোকৰ নাই। প্ৰধানমন্ত্ৰী নৰেন্দ্ৰ মোদী, আৰ এছ এছ আৰু বিজেপিৰ একেৰাহে সমালোচনা কৰিলেও অভিজিত দীপকৰ মন্তব্যত এইটো স্পষ্ট হৈ পৰিছে যে তেওঁলোকে লাভ কৰা জনসমৰ্থনক নিৰ্বাচনৰ ভোট বাকচত ব্যৱহাৰ কৰাৰ কোনো ইচ্ছা আপাতত নাই।
এই সন্দৰ্ভত তেওঁ পুনৰ প্ৰধানমন্ত্ৰী নৰেন্দ্ৰ মোদীক লক্ষ্য কৰি কয় যে বিশ্বৰ যিকোনো প্ৰান্তত কিবা এটা ঘটনা ঘটিলেই প্ৰধানমন্ত্ৰীয়ে সামাজিক মাধ্যমত লিখি প্ৰতিক্ৰিয়া ব্যক্ত কৰে, কিন্তু দেশৰ ভিতৰত ছাত্ৰ-ছাত্ৰীসকলে যেতিয়া আত্মহত্যা কৰে, তেতিয়া তেওঁ কোনো উচ্চবাচ্য নকৰে। অভিজিতে স্পষ্টকৈ কৰ যে নিট পৰীক্ষাৰ কেলেংকাৰিৰ পিছত যি কেইগৰাকী ছাত্ৰ-ছাত্ৰীৰ মৃত্যু হৈছে, প্ৰধানমন্ত্ৰীয়ে প্ৰথমে তেওঁলোকৰ পৰিয়ালক সাক্ষাৎ কৰা উচিত আছিল। সোমবাৰে তেওঁক ৰাজহুৱাকৈ চৰ মৰা ঘটনাৰ বাবে তেওঁ আৰ এছ এছক জগৰীয়া কৰে। তেওঁৰ বক্তব্য অনুসৰি, যেতিয়াই কোনোবাই এই চৰকাৰ বা তেওঁলোকৰ আদৰ্শৰ বিৰুদ্ধে মাত মাতে, তেতিয়াই তেওঁলোকক আক্ৰমণ কৰা হয়।
অভিজিতৰ দলটোৱে যদি নিৰ্বাচনৰ পথাৰত নানামে, তেন্তে শাসক আৰু বিৰোধী দুয়োটা শিবিৰেই কিছু পৰিমাণে সকাহ পাব। কিয়নো এই ককৰোচ পাৰ্টীয়ে যদি নিৰ্বাচন খেলে, তেন্তে নতুন প্ৰজন্মৰ সমৰ্থনৰ বাবে শাসক আৰু বিৰোধী দুয়ো পক্ষৰে বহু নিৰ্বাচনী অংক সলনি হৈ যাব পাৰে।
