ৰাজ্যৰ খিলঞ্জীয়া লোকসকলৰ স্বাৰ্থত অহা ৮ ডিচেম্বৰত প্ৰব্ৰজন বিৰোধী মঞ্চই গুৱাহাটীৰ লতাশিল খেলপথাৰত ‘সচেতন ৰাইজ’ৰ এক সমাবেশ আয়োজন কৰিব। আজি গুৱাহাটীত অনুষ্ঠিত এক সংবাদমেলত প্ৰব্ৰজন বিৰোধী মঞ্চৰ আহ্বায়ক উপমন্যু হাজৰিকাই এই কথা সদৰী কৰে।
সংবাদমেলত হাজৰিকাই জানিবলৈ দিয়া মতে, ১৯৫১ চনৰ ভিত্তিত ভূমি, চৰকাৰী চাকৰি আৰু সা-সুবিধা, বেপাৰ-বাণিজ্যৰ অনুজ্ঞাপত্ৰ সংৰক্ষণৰ ব্যৱস্থা কৰা, সম্পূৰ্ণ পুনৰীক্ষণৰ দ্বাৰা এন আৰ চিৰ বিসংগতি দূৰ কৰি সকলো বিদেশীৰ নাম কৰ্তন কৰা আৰু কোনো ধৰণৰ প্ৰব্ৰজনকাৰী যাতে নতুনকৈ নাগৰিক সংশোধনী বিধেয়ক বা আন কোনো প্ৰকাৰে সংস্থাপিত নহয় এই ৩টা দাবীত উক্ত সমাৱেশ অনুষ্ঠিত কৰা হ’ব।
তেওঁ কয় যে উক্ত দাবী ৩টা পূৰণ হ’লেহে অসমত খিলঞ্জীয়া লোকসকল সংখ্যালঘু হোৱাৰ পৰা ৰক্ষা পৰিব। তদুপৰি চৰকাৰে খিলঞ্জীয়াৰ অস্তিত্বৰ স্বাৰ্থত প্ৰতিশ্ৰুতি দিও পূৰণ কৰা নাই বুলি অভিযোগ কৰি হাজৰিকাই কয় যে জনসাধাৰণ যেনেকৈ নিৰাপত্তাহীনতাত ভোগিছে তেনেকৈ নিৰ্বাচনৰ পূৰ্বে চৰকাৰক নিৰাপত্তাহীনতাত ভোগাব লাগিব।
আজিৰ সংবাদমেলৰ জৰিয়তে তেওঁ ২০১৯ চনৰ ৩১ জানুৱাৰীৰ ভিতৰত তেওঁলোকৰ উপৰোক্ত তিনিওটা দাবী মানি ল’বলৈ চৰকাৰক সময়সীমা বান্ধি দিয়ে।