“অসম চৰকাৰৰ আশিস আৰু সহযোগ নাথাকিলে বঙালী সংগঠনে সমাৰোহ অনুষ্ঠিত কৰিব নোৱাৰিলে হেঁতেন।” মঙলবাৰে দিচপুৰৰৰ মিনিষ্টাৰ কলনিৰ বাসগৃহত অনুষ্ঠিত সংবাদমেলত এই মন্তব্য কৰে প্ৰাক্তন মুখ্য মন্ত্ৰী তৰুণ গগৈয়ে।
উল্লেখযোগ্য যে, নাগৰিকত্ব সংশোধনী বিধেয়কৰ সমৰ্থনত অহা ১৭ নৱেম্বৰত হিন্দু বঙালী সমাৰোহ অনুষ্ঠিত কৰিব বিচৰাক কেন্দ্ৰ কৰি আজি এইদৰে সৰব হৈ পৰে প্ৰাক্তন মুখ্য মন্ত্ৰীগৰাকী।
তেওঁ লগতে কয় যে এই সমাৰোহখনে সংঘাতৰ সৃষ্টি কৰিব। তদুপৰি সমাৰোহখন নীতিৰ ভিত্তিত থাকি অনুষ্ঠিত কৰা হ’লে সংঘাত নহয়’ বুলি উল্লেখ কৰি তেওঁ কয়, “কিন্তু নীতিৰ বাহিৰত আছে এই সমাৰোহ।”
উক্ত সংবাদমেলৰ জৰিয়তে গগৈয়ে চৰকাৰক এই সমাৰোহ বন্ধ কৰিবৰ বাবে আহ্বান জনায়।
ইয়াৰোপৰি তেওঁ কয়, “কংগ্ৰছ দলৰ এই সমাৰোহৰ প্ৰতি সমৰ্থন নাই। কাৰণ আমি সমিল-মিলেৰে থকাটো বিচাৰো।”
আনহাতে, একেখন সংবাদমেলতে বিজেপি দলক সমালোচনা কৰি তেওঁ কয় “মোৰ জন্মৰ পৰা অসমৰ বুৰঞ্জীৰ এনে দুৰ্য্যোগৰ সন্মুখীন হোৱা দেখা নাছিলো। ভাৰত স্বাধীন হোৱাৰ পাছৰ পৰা অৰ্থ্যাৎ ১৯৪৭ চনৰ পাছৰ পৰা অসম এনে দুৰ্য্যোগৰ সন্মুখীন হোৱা নাই।”
তেওঁ লগতে কয়, “বিজেপি চৰকাৰে নাগৰিকত্ব সংশোধনী বিধেয়কখন আনি অসমীয়া জাতিটোকে বিপদাপন্ন কৰিব বিচাৰিছে। আগতে এনে বিপদ অথবা দুৰ্য্যোগ অসমত হোৱা নাছিল।”
তদুপৰি ভাৰতৰ সমূহ ৰাজ্য ভাষাৰ ভিত্তিত গঠিত হৈছিল বুলি দাবী কৰে গগৈয়ে। তেওঁ কয় “ধৰ্মৰ ভিত্তিত কোনো ৰাজ্য গঠিত হোৱা নাই। বিহাৰ বিহাৰী, উৰিষ্যা উৰিয়া, গুজৰাট গুজৰাটী, পাঞ্জাব পাঞ্জাবী ভাষাৰ ভিত্তিতহে গঠন হৈছে।”
উক্ত সংবাদমেলতে তেওঁ দাবী কৰে যে নাগৰিকত্ব সংশোধনী বিধেয়কখন অসংবিধানিক। তেওঁৰ মতে “সংবিধানে সকলো ভাষা-ধৰ্মকে সম-অধিকাৰ দিছে। কিন্তু নাগৰিকত্ব সংশোধনী বিধেয়কে সকলো ভাষা-ধৰ্মকে মষিমূৰ কৰিব।”
“বিদেশী খেদা আন্দোলনত ৮০০তকৈ অধিক লোক চহিদ হৈছিল আৰু ইয়াৰ লগতে বহু কংগ্ৰেছীকো হত্যা কৰাৰ লগতে নিৰ্য্যাতন চলাইছিল।” গগৈয়ে এইদৰে সংবাদমেলত কয়।
আনহাতে, ১৯৭১ চনটোক ভিত্তিবৰ্ষ হিচাপে লৈ এন আৰ চি উন্নীতকৰণ প্ৰক্ৰিয়া চলি থকাৰ সময়ত নাগৰিকত্ব সংশোধনী বিধেয়কখন অপ্ৰাসংগিক বুলি সদৰী কৰে গগৈয়ে। তেওঁ লগতে কয়, “সেই অসম চুক্তিক নস্যাৎ কৰি নিজৰ স্বাৰ্থৰ কাৰণে নাগৰিকত্ব সংশোধনী বিধেয়ক আনি অসমবাসীক ক্ষুভিত কৰিছে। অৱশ্যে অসমবাসী যিমান ক্ষুভিত হ’ব লাগিছিল, হোৱা নাই।”
তেওঁ উক্ত সংবাদমেলৰ জৰিয়তে বিধেয়কৰ বিৰুদ্ধে সকলো দল-সংগঠনক একত্ৰিত হ’বৰ বাবে আহ্বান জনাই কয়, “অসম সাহিত্য সভা, ছাত্ৰ সংগঠন, ৰাজনৈতিক দলসমূহ, সকলো একত্ৰিত হৈ তীব্ৰ আন্দোলন গঢ়ি তুলিব লাগিব। অনথ্যা আমাৰে বিপদ হ’ব।”
তেওঁ লগতে কয় “আমি চুকাফা, বীৰ লাচিতৰ বংশধৰ। আমাৰ শক্তি আছে, বিধেয়কৰ বিৰুদ্ধে আমি আগুৱাই আহিব লাগিব।”
তেওঁৰ মতে, “বিজেপিৰ শাসনৰ সময়ছোৱা অন্ধকাৰৰ যুগ, কাৰণ তেওঁলোকে নাগৰিকত্ব সংশোধনী বিধেয়ক গৃহীত কৰিবলৈ গৈ আছে।”
গগৈয়ে লগতে কয় যে কেন্দ্ৰীয় চৰকাৰৰ ওচৰত অসমৰ মানুহে কি বিচাৰিছে সেই কথা অৱগত কৰিবলৈও সাহস নাই ৰাজ্যিক বিজেপি চৰকাৰৰ।
আনহাতে, অগপই দল ত্যাগ কৰিম বুলি চিঞৰি থকাটো এখন নাটক আখ্যা দি তেওঁ লগতে কয় “অগপই নাটক বাদ দিয়াটো বিচাৰিছো। আঞ্চলিকতাবাদৰ নামত অসমীয়া ভাষাক জলাঞ্জলি দিব বিচৰা দলৰ সৈতে হাত মিলাই থকাটো নিবিচাৰো।”
তেওঁৰ মতে নাগৰিকত্ব সংশোধনী বিধেয়ক গৃহীত হ’লে এন আৰ চি এখন পেলনীয়া কাগজ হৈ পৰিব। তেওঁ লগতে এক তুলনা আগ বঢ়াই কয় যে এন আৰ চিয়ে বিচাৰিছে ১৯৭১ চন আৰু নাগৰিকত্ব সংশোধনী বিধেয়কে ২০১৪ চন। গতিকে ২০১৪ চনটো গৃহীত হ’লে ১৯৭১ চনটোৱেই অনৰ্থক হৈ পৰিব বুলি তেওঁ দাবী জনায়।
ইয়াৰোপৰি তেওঁ কয়, “উচ্চতম ন্যায়ালয়ে মনিটৰ কৰি থাকিলেও সময়ৰ অপব্যৱহাৰ আৰু ধনৰ অপচয় কৰি থকাহে হৈছে। নাগৰিকত্ব বিলখন অহাৰে পৰা এন আৰ চিক মানুহে গুৰুত্ব সহকাৰে নোলোৱা হ’ল।”
