জয়সাগৰৰ সুন্দৰপুৰত যোৱা ১০ মাহত দুটা ৰহস্যজনক পৃথক পথ দুৰ্ঘটনাই এটা পৰিয়াললৈ কঢ়িয়াই আনিলে ঘোৰ অমানিশা।
যোৱা বৰ্ষৰ ১ মাৰ্চত নিজৰা দত্ত আৰু ১৫ ডিচেম্বৰত তেওঁৰ স্বামী পবিত্ৰ দত্ত পথ দুৰ্ঘটনাত নিহত হোৱাৰ পিছৰে পৰা ঘাত মাউৰা হৈ পৰিল তেওঁলোকৰ দুই সন্তান চয়নিকা আৰু তন্ময়।
দিন হাজিৰা কৰি উৰুখা পঁজাতে পবিত্ৰ দত্তই কোনোমতে পৰিয়াল চলাইছিল যদিও পথ দুৰ্ঘটনাত মৃত্যু হোৱাৰ পিছৰে পৰা নিঠৰুৱা হৈ পৰিল তেওঁলোকৰ ২০ বছৰীয়া কন্যা চয়নিকা দত্ত আৰু সপ্তম শ্ৰেণীত অধ্যয়নৰত কনমানি তন্ময় দত্ত।
পিতৃ-মাতৃক হেৰুৱাই বৰ্তমান দিশহাৰা হৈ পৰিছে এই দুই কিশোৰ-কিশোৰী। উপাৰ্জনহীন চয়নিকাই ইতিমধ্যে আৰ্থিক অনাটন আৰু ভাতৃক প্ৰতিপালন কৰিবলৈ কোনো নথকাত আধাতে সামৰিব লগা হৈছে শিক্ষা।
লগতে পঢ়ক: আলফা-স্বাধীনত যোগদানৰ সন্দেহ তিনিচুকীয়াৰ যুৱকৰ
ভাতৃ তন্ময়ৰ ভৱিষ্যতকলৈয়ো সন্দিহান হৈ পৰা চয়নিকাই বৰ্তমান মুখ্যমন্ত্ৰী ড° হিমন্ত বিশ্ব শৰ্মাৰ প্ৰতি জনাইছে কাতৰ অনুৰোধ।
জীয়াই থাকিব পৰাকৈ, কণমানি ভাতৃক সহায় কৰিব পৰাকৈ যিকোনো এটি কৰ্মসংস্থাপন যোগাৰ কৰি দিবলৈ হাতজোৰ কৰিছে অসহায় চয়নিকাই।
পিতৃ-মাতৃৰ বিয়োগৰ পিছত স্থানীয় সচেতন ব্যক্তি, বেলেগে এখন ঘৰত থকা বৰদেউতাক প্ৰমোদ দত্তৰ সহায়ত কোনোমতে এসাঁজ যোগাৰ কৰিছে যদিও ভৱিষ্যতকলৈ উদ্বিগ্ন হৈ পৰিছে দুই ভগ্নী-ভাতৃ।
লগতে পঢ়ক: আঁৰত প্ৰেমৰ সম্পৰ্ক! যুৱকৰ নিৰুদ্দেশক লৈ উত্তপ্ত হাজো আৰক্ষী থানা
চয়নিকাৰ মাতৃ নিজৰা দত্তক গাড়ীয়ে মহতিয়া থৈ যোৱাত মৃত্যুক সাৱটি লৈছিল যোৱা এক মাৰ্চত। জীৱন নাশ কৰা গাড়ীখনৰ গৰাকী বিচাৰি উলিয়াইছিল আৰক্ষীয়ে। আইনগত প্ৰক্ৰিয়া চলি আছিল। তেনেতে যোৱা ১০ ডিচেম্বৰৰ সন্ধিয়া একেখন ঠাইতে গাড়ীৰ খুন্দাত নিহত হৈছিল চয়নিকাৰ পিতৃ।
অতি পৰিতাপৰ বিষয় যে যিখন গাড়ীৰে খুন্দিয়াইছিল সেইখন গাড়ী আজিলৈকে চিনাক্ত কৰিবলৈ সক্ষম নহ’ল আৰক্ষীয়ে।
পিতৃ-মাতৃক হেৰুৱাই অসহায় হৈ পৰা চয়নিকা আৰু তাইৰ ভাতৃ তন্ময়ক সহায় কৰিবলৈ স্থানীয় ৰাইজ তথা দল-সংগঠনে জিলা প্ৰশাসন আৰু বিধায়ক অখিল গগৈক আবেদন জনাইছিল যদিও এই পৰ্যন্ত যথোচিত সহাঁৰি লাভ নকৰা বুলি সংবাদ মাধ্যমৰ আগত প্ৰকাশ কৰে।
লগতে পঢ়ক:অসম আৰক্ষীৰ বিভিন্ন পদত নিযুক্তিৰ বাবে পৰীক্ষাৰ দিন ঘোষণা, কি পদৰ বাবে কেতিয়া পৰীক্ষা?
উচ্চতৰ মাধ্যমিক চূড়ান্ত বৰ্ষ উত্তীৰ্ণ হোৱা চয়নিকাৰ এতিয়া মুখ্যমন্ত্ৰীৰ প্ৰতি আহ্বান,”মামা আমাক সহায় কৰক। আমাক জীয়াই থাকিবলৈ এটা সংস্থাপন দিয়ক।‘’
