ক’ৰ’ণাতংকৰ মাজতে আজি দেশৰ বিভিন্ন ৰাজ্যত পালন কৰা হ’ল ৰঙৰ উৎসৱ।
হোলীৰ মাজতে দেশৰ বিভিন্ন প্ৰান্তত বহু পথ দুৰ্ঘটনা সংঘটিত হোৱাৰ লগতে যোগীৰ ৰাজ্য উত্তৰ প্ৰদেশত সংঘটিত হৈছে এক নিদাৰুণ ঘটনা।
উত্তৰ প্ৰদেশৰ মেভাটি তোলা নামৰ অঞ্চলটোত আজি পুৱা প্ৰায় ১০ বজাত এদল লোকে এটা ঘৰত প্ৰৱেশ কৰি ঘৰটোৰ বাসিন্দা সকলক বলপূৰ্বক ৰং সানি দিবলৈ বিচাৰে।
সুৰামত্ত লোকৰ দলটোক পৰিয়ালটোৱে ৰং সনাত বাধা প্ৰদান কৰাত দলটো অধিক উন্মত্ত হৈ পৰে আৰু লাঠী-শিল আদিৰে পৰিয়ালটোক আক্ৰমণ কৰিবলৈ আৰম্ভ কৰে।
দলটোক বাধা দিয়া ৬০ বছৰীয়া মহিলা এগৰাকীক দলটোৱে লাঠীৰে মৰিয়াই মৰিয়াই লেবেজান কৰি পেলায়।
দলটোৰ আক্ৰমণত পৰিয়ালটোৰ আন পাঁচজন লোক গুৰুতৰ ভাবে আহত হয়।
স্থানীয় লোকে পিছত আহত লোক কেইজনক চিকিৎসালয়লৈ নিয়াৰ ব্যৱস্থা কৰে যদিও অতি গুৰুতৰ ভাবে আহত হোৱা ৬০ বছৰীয়া মহিলাগৰাকীৰ মৃত্যু ঘটে।
এই ঘটনাই এতিয়া সমগ্ৰ দেশতে তীব্ৰ চাঞ্চ্যলৰ সৃষ্টি কৰা পৰিলক্ষিত হৈছে।
আৰক্ষী বিষয়া প্ৰশান্ত কুমাৰ প্ৰসাদে প্ৰকাশ কৰা মতে আক্ৰমণকাৰী দলটোক চিনাক্ত কৰা হৈছে আৰু তেওঁলোকক শীঘ্ৰে গ্ৰেপ্তাৰো কৰা হ’ব।
ইপিনে সেই একেটা অঞ্চলতে আজি পুৱাই এজন সুৰামত্ত যুৱকে এখন ট্ৰেক্টৰ মানুহৰ ওপৰেৰে তীব্ৰ বেগেৰে চলাই নিয়াৰ ফলত ছজন লোক গুৰুতৰ ভাবে আহত হয়।
এই ঘটনাত ট্ৰেক্টৰ খনে এটা লাইট পোষ্ট খুন্দা মৰাৰ ফলত সুৰামত্ত যুৱক জনো আহত হয়।
