শেহতীয়াকৈ ডেৰাডুনত হোম ষ্টেত এগৰাকী যুৱতীৰ মৃত্যুৰ ঘটনাই চাঞ্চল্যৰ সৃষ্টি কৰিছিল। আকৌ হোম ষ্টেত আন এক হত্যাকাণ্ড। কৰ্ণাটকৰ চিক্কাবল্লাপুৰ জিলাত এটা হোম ষ্টেৰ পৰা উদ্ধাৰ হৈছে এগৰাকী ২৬ বছৰীয়া যুৱতীৰ মৃতদেহ।
জানিব পৰা মতে, তেওঁ পেছাত এগৰাকী ফিজিঅ’থেৰাপিষ্ট আছিল। তেওঁৰ নাম সুৰভি। প্ৰেমিক সঞ্জিত আলীক অচেতন অৱস্থাত একেটা কোঠাৰ পৰা উদ্ধাৰ কৰি চিকিৎসালয়ত ভৰ্তি কৰোৱা হয়। ঘটনা সন্দৰ্ভত আৰক্ষীয়ে তদন্ত আৰম্ভ কৰিছে।
আৰক্ষীৰ সূত্ৰ অনুসৰি বেংগালুৰুৰ বাসিন্দা সুৰভি আৰু কেৰালাৰ বাসিন্দা সঞ্জিত আলীৰ মাজত দীৰ্ঘদিনীয়া সম্পৰ্ক আছিল। সুৰভিয়ে সঞ্জিতক বিয়া কৰাব বিচৰা বুলি পৰিয়ালক জনাইছিল। অৱশ্যে এই সন্দৰ্ভত পৰিয়ালটোৰ আপত্তি আছিল বুলি আৰক্ষীয়ে জানিবলৈ দিয়ে।
তদন্তকাৰীয়ে দাবী কৰিছে যে পৰিয়ালটোৰ আপত্তিৰ পিছত দুয়োজনে ঘৰৰ পৰা ওলাই যায়। ইয়াৰ পিছত সুৰভিৰ পৰিয়ালে সন্ধানহীন ব্যক্তিৰ ডায়েৰী দাখিল কৰে। পিছত সুৰভিয়ে উভতি আহি কয় যে তেওঁ এজন প্ৰাপ্তবয়স্ক আৰু নিজৰ জীৱন সংগী বাছি লোৱাৰ অধিকাৰ আছে। ইয়াৰ পিছত তেওঁ সঞ্জিতৰ লগত থাকিবলৈ আৰম্ভ কৰে।
আৰক্ষী সূত্ৰই আৰু দাবী কৰে যে সুৰভি আৰু সঞ্জিতৰ বিৰুদ্ধে এন ডি পি এছ আইনৰ অধীনত এটা পাৰ্টিত ড্ৰাগছ উদ্ধাৰৰ সৈতে জড়িত গোচৰ ৰুজু কৰা হৈছিল। তদন্তত প্ৰকাশ পাইছে যে সুৰভিৰ পৰিয়ালে পিছত সুৰভিক সম্পৰ্কৰ পৰা ঘূৰাই আনি মহীশূৰৰ পুনৰ্বাসন কেন্দ্ৰত ভৰ্তি কৰে। তাত প্ৰায় ছমাহ মদ আৰু ড্ৰাগছ আসক্তিৰ চিকিৎসা গ্ৰহণ কৰি মাকৰ সৈতে বেংগালুৰুত থাকিবলৈ আৰম্ভ কৰে।
ইপিনে, সুৰভিৰ পৰিয়ালে অভিযোগ উত্থাপন কৰিছে যে সঞ্জিত আলীয়ে সম্পৰ্কৰ সময়ত সুৰভিক ড্ৰাগছত আসক্ত কৰি তুলিছিল। পৰিয়ালৰ লোকে লগতে অভিযোগ কৰে যে সঞ্জিতে সুৰভিক কেইবাবাৰো শাৰীৰিক নিৰ্যাতন চলাইছিল আৰু তেওঁৰ শৰীৰত আঘাতৰ চিন আছে। অৱশ্যে এই অভিযোগৰ সত্যতা এতিয়াও স্বতন্ত্ৰভাৱে নিশ্চিত কৰা নাই আৰক্ষীয়ে।
সোমবাৰে হোম ষ্টেৰ পৰা সুৰভিৰ মৃতদেহ উদ্ধাৰ কৰাৰ পিছত মৰণোত্তৰ পৰীক্ষাৰ বাবে প্ৰেৰণ কৰা হয়। আনহাতে, অচেতন অৱস্থাত উদ্ধাৰ হোৱা সঞ্জিত আলী চিকিৎসালয়ত চিকিৎসাধীন হৈ আছে। আৰক্ষীয়ে জনোৱা মতে, শাৰীৰিক অৱস্থা সুস্থিৰ হ’লে তেওঁক জেৰা কৰা হ’ব।
আৰক্ষীয়ে জনোৱা মতে, মৰণোত্তৰ পৰীক্ষাৰ প্ৰতিবেদন, ফৰেনছিক পৰীক্ষাৰ ফলাফল আৰু অন্যান্য প্ৰমাণ পৰীক্ষা কৰি মৃত্যুৰ সঠিক কাৰণ নিৰ্ণয় কৰি থকা হৈছে। সকলো দিশ পৰীক্ষা কৰি পৰৱৰ্তী আইনী ব্যৱস্থা গ্ৰহণ কৰা হ’ব।
