বিশ্বত এতিয়া মনৱতা স্খলিত হৈছে।পৰিবৰ্ত্তিত হৈছে মানুহৰ আচৰণ। মানুহে মানুহৰ প্ৰতি কৰা আচৰণে সময়ে সময়ে স্তম্ভিত কৰি তুলিছে মানুহক। এনে এক অমানৱীয় ঘটনাই পুনৰ জোকাৰি গৈছে বোকাখাতৰ সচেতন সমাজক।বোকাখাত খতিয়াখলি গাঁৱৰ জিতেন দত্তৰ বাসগৃহত সংঘটিত এটা ঘটনা শেহতীয়াকৈ পোহৰলৈ আহিছে।
ঘটনা অনুসৰি জিতেন দত্ত নামৰ ব্যক্তিজনৰ পত্নী পানো দত্ত (৫৭) যোৱা প্রায় তিনি বছৰ ধৰি মানসিক বিকাৰগ্ৰস্ত হৈ আছে।পাৰিবাৰিক অশান্তিৰ বাবেই পোনা দত্ত মানসিক বিকাৰগ্ৰস্ত হয়। স্বামী জিতেন দত্তই পত্নী পোনা দত্তক শাৰীৰিক আৰু মানসিক অত্যাচাৰ কৰাৰ ফলত মানসিক বিকাৰগ্ৰস্ত হৈ পৰে পোনা দত্ত।
আনহাতে, পোনা দত্তক স্বামী জিতেন দত্ত আৰু পৰিয়ালৰ লোকে চিকিৎসা কৰাইছিল যদিও সুস্থ হৈ নুঠিল। ঘৰৰ পৰা য’লৈ ত’লৈ গুচি যায় কাৰণে স্বামীয়ে ভৰিত শিকলি লগাই ঘৰৰ বাহিৰত সাজি লোৱা গোহালী সদৃশ এটা ঘৰত তলত একো নথকা এখন কাঠৰ বিচনাত পেলাই থবলৈ লয়। ভৰিত শিকলি পিন্ধি এই গোহালি সদৃশ কোঠাতেই পানো দত্তই মৃত্যুৰ সৈতে যুঁজ আৰম্ভ কৰে।
জানিব পৰা মতে, জিতেন দত্তৰ আচৰণ আৰু কটু কথাৰ বাবে তেওঁৰ ঘৰলৈ প্ৰয়োজন নহ’লে প্ৰতিবেশীও নাযায়। দীৰ্ঘদিনৰ পাছত স্থানীয় একাংশ লোকে অমানৱীয় এই ঘটনাৰ বিষয়ে বোকাখাতৰ সাংবাদিকক অৱগত কৰে। সাংবাদিকসকলে অকলে জিতেন দত্তৰ ঘৰলৈ যোৱাটো উচিত নহ’ব বুলি ভাৱি বুধবাৰে বোকাখাতৰ মহকুমাধিপতিক বিষয়টো জনায়।
বোকাখাতৰ মহকুমাধিপতি বিবেক শ্যামে তাৎক্ষণিকভাৱে মহকুমা দণ্ডাধীশ শান্তনু গগৈৰ নেতৃত্বত এটা আৰক্ষীৰ দল খতিয়াখলিৰ জিতেন দত্তৰ বাসগৃহলৈ প্ৰেৰণ কৰে। সাংবাদিকৰ উদ্যোগত দণ্ডাধীশ আৰু আৰক্ষীৰ দল জিতেন গগৈৰ ঘৰত উপস্থিত হৈ সমগ্র ঘটনা প্রত্যক্ষ কৰে।
এখন কাঠৰ বিচনাত অকল কাঠৰ ওপৰতে এক নৰক সদৃশ পৰিৱেশত পোনা দত্তক ৰখাৰ বাবে দণ্ডাধীশ গৰাকীৰ লগতে উপস্থিত সকলো ক্ষোভিত হৈ পৰে। মহকুমা দণ্ডাধীশ শান্তনু গগৈয়ে পোনা দত্তৰ স্বামী জিতেন দত্তক তৎকালে গা-পা ধোৱাই পোনা দত্তক ঘৰৰ ভিতৰলৈ নিয়াৰ নির্দেশ দিয়াৰ লগতে চিকিৎসা প্রদানৰ বাবেও নির্দেশ দিয়ে।
জিতেন দত্তৰ একমাত্র সন্তান আৰু বোৱাৰীয়েকে পোনা দত্তক কোনোধৰণৰ শুশ্ৰুষা নকৰে বুলিও স্থানীয় লোকে দণ্ডাধীশক জনায়।
ইপিনে, নিৰ্দেশ অমান্য কৰিলে জিতেন দত্তৰ বিৰুদ্ধে আইনগত ব্যৱস্থা গ্ৰহণ কৰিব বুলি দণ্ডাধীশ গৰাকীয়ে অৱগত কৰে। দণ্ডাধীশৰ নির্দেশত জিতেন দত্তই পত্নী পোনা দত্তক গা-পা ধোৱাই ঘৰৰ ভিতৰলৈ নিয়ে আৰু চিকিৎসাও আৰম্ভ কৰে।
মানসিক বিকাৰগ্রস্ত হ’লেও নিজৰ স্বামী বা সন্তানে নিজৰ পত্নী বা মাতৃক কৰা এনে ব্যৱহাৰে জোকাৰি গৈছে বোকাখাতৰ সচেতন সমাজক৷ এই সমগ্ৰ ঘটনাত উদ্ধাৰকাৰীৰ ভূমিকা লোৱা বোকাখাতৰ সাংবাদিকক সকলোৱে প্ৰশংসাও কৰিছে।