উত্তৰ দিল্লীৰ ৱাজিৰাবাদ অঞ্চলত সংঘটিত হৈছে এক চাঞ্চল্যকৰ ঘটনা। প্ৰেমত প্ৰতাৰণা কৰাৰ অভিযোগত এগৰাকী যুৱতীয়ে চোকা অস্ত্ৰৰে প্ৰেমিকৰ ব্যক্তিগত অংগ কাটি পেলোৱাৰ অভিযোগ উঠিছে। যুৱকজনক গুৰুতৰ অৱস্থাত চিকিৎসালয়ত ভৰ্তি কৰোৱা হৈছে।
আৰক্ষীয়ে জনোৱা মতে, আহত যুৱকজনৰ নাম বিসৰ্জিত। তেওঁ উত্তৰ প্ৰদেশৰ ৰামপুৰ জিলাৰ বাসিন্দা আৰু নিজকে চিকিৎসক বুলি পৰিচয় দিলেও আৰক্ষীয়ে তেওঁক ‘কুৱেক’ বা ভুৱা ডাক্তৰ বুলি উল্লেখ কৰিছে। অভিযুক্ত যুৱতী গৰাকী বৰ্তমান ৱাজিৰাবাদত বাস কৰে আৰু মূলতঃ বিহাৰৰ কাটিহাৰ জিলাৰ বাসিন্দা।
আৰক্ষীক দিয়া বক্তব্যত বিসৰ্জিতে কয় যে বিগত দুবছৰ ধৰি যুৱতীগৰাকীৰ সৈতে তেওঁৰ সম্পৰ্ক আছিল। ২৪ ফেব্ৰুৱাৰীত দিল্লীলৈ আহি আমিনাৰ ঘৰত থাকে। তেওঁ অভিযোগ কৰে যে যোৱা ২৫ ফেব্ৰুৱাৰীৰ মাজ নিশা আমিনাই তেওঁৰ লগত গাখীৰৰ লগত নিচাযুক্ত বস্তু মিহলাই দিছিল। তাৰ পিছত পুৱা প্ৰায় ২:৩০ বজাত অৰ্ধচেতন অৱস্থাত চোকা অস্ত্ৰৰে ব্যক্তিগত অংশত আঘাত কৰে। পিছত যুৱকজন বিবাহিত বুলি গম পোৱাৰ পিছতে যুৱতীগৰাকীয়ে খঙত আক্ৰমণ চলোৱা বুলি আৰক্ষীয়ে ধাৰণা কৰে।
গুৰুতৰভাৱে আহত হৈ যুৱকজন কেনেবাকৈ উত্তৰ দিল্লীৰ হিন্দু ৰাও হস্পিতাল পায়হি। তাৰ পৰাই পিছত তেওঁক ছফদাৰজং হাস্পতাললৈ স্থানান্তৰ কৰা হয় আৰু তাতেই তেওঁৰ অস্ত্ৰোপচাৰ কৰা হয়।
চিকিৎসালয়ৰ পৰা তথ্য লাভ কৰি আৰক্ষীয়ে এই বিষয়ে জানিবলৈ দিয়ে। আহত ব্যক্তিজনৰ বক্তব্য আৰু চিকিৎসাৰ ৰেকৰ্ডৰ ভিত্তিত ভাৰতীয় দণ্ডবিধিৰ ধাৰা ১১৮(২) (বিপজ্জনক অস্ত্ৰৰে গুৰুতৰভাৱে আঘাত কৰা) আৰু ১২৩ নং ধাৰা (নিচাযুক্ত বা বিষাক্ত পদাৰ্থ ব্যৱহাৰ কৰি আঘাত কৰা)ৰ অধীনত গোচৰ ৰুজু কৰা হৈছে। সম্প্ৰতি পলাতক হৈ আছে অভিযুক্ত যুৱতীগৰাকী। আৰক্ষীয়ে তেওঁৰ সন্ধানৰ লগতে সমগ্ৰ ঘটনাৰ তদন্ত অব্যাহত ৰাখিছে।
