সমগ্ৰ দেশৰ দৃষ্টি নিবদ্ধ থকা তিনিখন গুৰুত্বপূৰ্ণ বিধেয়ক আজি সংসদত উত্থাপন হ’ব। লোকসভা আৰু ৰাজ্যিক বিধানসভাসমূহত মহিলাৰ বাবে ৩৩ শতাংশ আসন সংৰক্ষণ কৰা, সমষ্টি পুনৰ্নিৰ্ধাৰণ কৰা আৰু কেন্দ্ৰীয় শাসিত অঞ্চলসমূহৰ আসন বৃদ্ধি কৰাৰ লক্ষ্যৰে এই ঐতিহাসিক বিধেয়কসমূহ সদনৰ মজিয়ালৈ অনা হ’ব। ২০২৯ চনৰ সাধাৰণ নিৰ্বাচনৰ পূৰ্বে এই সংৰক্ষণ ব্যৱস্থা কাৰ্যকৰী কৰাৰ পৰিকল্পনা কৰিছে কেন্দ্ৰীয় চৰকাৰে।
‘নাৰী শক্তি বন্দন অধিনিয়ম’ৰ অধীনত মহিলা সংৰক্ষণৰ বিষয়টো সমষ্টি পুনৰ্নিৰ্ধাৰণ আৰু ২০১১ চনৰ লোকপিয়লৰ তথ্যৰ সৈতে সাঙুৰি দিয়া হৈছে। সমষ্টি পুনৰ্নিৰ্ধাৰণ আয়োগ গঠন কৰাৰ বিধেয়কখনৰ বাহিৰে আন দুখন বিধেয়ক হৈছে সাংবিধানিক সংশোধনী বিধেয়ক। সেয়েহে, এই দুয়োখন বিধেয়ক গৃহীত কৰিবলৈ সদনত উপস্থিত থকা আৰু ভোটদান কৰা সদস্যৰ দুই-তৃতীয়াংশৰ বিশেষ সংখ্যাগৰিষ্ঠতাৰ প্ৰয়োজন হ’ব। বিৰোধীয়ে যদি ভোটদানৰ পৰা বিৰত থাকে বা সদন ত্যাগ কৰে, তেন্তে এই সংখ্যাগৰিষ্ঠতাৰ সংখ্যা হ্ৰাস পাব। বৰ্তমান ৫৩৭ গৰাকী সদস্য থকা লোকসভাত বিধেয়ক গৃহীত কৰিবলৈ ৩৬০ টা ভোটৰ প্ৰয়োজন। ইয়াৰ বিপৰীতে শাসকীয় এন ডি এৰ হাতত আছে ২৯৩ গৰাকী সদস্য, অৰ্থাৎ তেওঁলোকক অতিৰিক্ত ৬৭ খন আসনৰ প্ৰয়োজন। আনহাতে, ৰাজ্যসভাত মেজিক সংখ্যা ১৬৩ হোৱাৰ বিপৰীতে ১৪২ জনীয়া এন ডি এক প্ৰয়োজন হ’ব আৰু ২১ খন আসনৰ।
বিৰোধী দলসমূহে মহিলা সংৰক্ষণ বিধেয়কখনক সমৰ্থন কৰিছে যদিও ২০২৯ চনৰ নিৰ্বাচনৰ পূৰ্বে ইয়াক সমষ্টি পুনৰ্নিৰ্ধাৰণৰ সৈতে সাঙুৰি দিয়াৰ চৰকাৰী সিদ্ধান্তক তীব্ৰ বিৰোধিতা কৰিছে। বিৰোধীৰ মতে, ২০১১ চনৰ লোকপিয়লৰ ভিত্তিত সমষ্টি পুনৰ্নিৰ্ধাৰণ কৰিলে ই কেৱল এন ডি একহে লাভান্বিত কৰিব আৰু সংসদত দক্ষিণৰ ৰাজ্যসমূহৰ প্ৰতিনিধিত্ব বহু পৰিমাণে হ্ৰাস কৰিব। কংগ্ৰেছ নেতা ৰাহুল গান্ধীয়ে এক্স (পূৰ্বৰ টুইটাৰ) যোগে অভিযোগ কৰে যে, বিজেপিয়ে ২০২৯ চনৰ নিৰ্বাচনত নিজৰ সুবিধাৰ বাবে লোকসভাৰ আসনসমূহৰ সীমা নিজৰ ইচ্ছামতে সলনি কৰিব বিচাৰিছে আৰু এই বিধেয়কৰ জৰিয়তে চৰকাৰে সমষ্টি পুনৰ্নিৰ্ধাৰণ আয়োগক সম্পূৰ্ণ ক্ষমতা প্ৰদান কৰিব।
প্ৰস্তাৱিত বিধেয়ক অনুসৰি সমষ্টি পুনৰ্নিৰ্ধাৰণৰ পিছত লোকসভাৰ আসনৰ সংখ্যা ৮১৫ লৈ আৰু কেন্দ্ৰীয় শাসিত অঞ্চলৰ আসনৰ সংখ্যা ৩৫ লৈ বৃদ্ধি পাব পাৰে।
চৰকাৰৰ বাবে আন এক চিন্তাৰ কাৰণ হৈছে নবীন পট্টনায়কৰ বিজু জনতা দল আৰু কে চন্দ্ৰশেখৰ ৰাওৰ ভাৰত ৰাষ্ট্ৰ সমিতিৰ স্থিতি। পূৰ্বতে চৰকাৰক বিভিন্ন বিষয়ত সমৰ্থন জনোৱা এই দুয়োটা দলেই এতিয়া সমষ্টি পুনৰ্নিৰ্ধাৰণৰ বিৰুদ্ধে কঠোৰ স্থিতি গ্ৰহণ কৰিছে। অৱশ্যে কেন্দ্ৰীয় মন্ত্ৰী কিৰেণ ৰিজিজুৱে চৰকাৰৰ হাতত পৰ্যাপ্ত সংখ্যা আছে বুলি দাবী কৰিছে। তেওঁ কয় যে কোনো দলেই মহিলা সংৰক্ষণৰ বিৰোধিতা কৰা নাই আৰু নীতিগতভাৱে সকলোৱে এই ক্ষেত্ৰত একমত।
