উত্তৰ-পূবৰ একাংশ ছাত্ৰীয়ে দাখিল কৰা অভিযোগৰ পাছত দিল্লীৰ মহিলা আয়োগে (দি চি ডব্লিউ) দিল্লী বিশ্ববিদ্যালয়লৈ এক জাননী জাৰি কৰিছে।
ছাত্ৰীসকলে জাতিগত বৈষম্যৰ বলি হোৱাৰ লগতে তেওঁলোকক হোষ্টেল খালী কৰিবলৈ হেচা দিয়াৰ অভিযোগ আনিছে।
দিল্লী বিশ্ববিদ্যালয়ৰ উত্তৰ-পূবৰ ছাত্ৰীসকলে দিল্লী মহিলা আয়োগলৈ এক অভিযোগ পত্ৰ প্ৰেৰণ কৰিছিল।
পত্ৰখনত কোৱা হৈছে যে কলেজ প্ৰশাসনে তেওঁলোকক হোষ্টেল খালী কৰি দিবলৈ হেচা দিছে।
বিষয়টো অৱগত হোৱাৰ পাছত এগৰাকী কেন্দ্ৰীয় মন্ত্ৰীয়ে ছাত্ৰীসকলক সহায় কৰাৰ প্ৰতিশ্ৰুতি দিছিল যদিও সোমবাৰে তেওঁলোকে নতুনকৈ এখন অভিযোগ পত্ৰ দাখিল কৰে।
ছাত্ৰীসকলে এইবাৰ বিষয়টোত মহিলা আয়োগৰ হস্তক্ষেপ বিচাৰিছে।
হোষ্টেল খালী কৰিবলৈ হেচা দিয়াৰ লগতে তেওঁলোকে মেচত খাদ্যকে ধৰি কেইবাটাও সমস্যাৰ সন্মুখীন হোৱা বুলি অভিযোগ আনিছে।
ছাত্ৰীসকলে লগতে জাতিগত বৈষম্যসূচক মন্তব্যৰ বিষয়েও অভিযোগ কৰিছে।
বিষয়টোৰ গুৰুত্বলৈ চাই দিল্লীৰ মহিলা আয়োগে দিল্লী বিশ্ববিদ্যালয়ৰ পঞ্জীয়কলৈ এখন জাননী জাৰি কৰিছে।
আয়োগে বিশ্ববিদ্যালয়খনৰ পৰা ছাত্ৰীসকলক আগবঢ়োৱা সা-সুবিধাৰ লগতে এক কাৰ্যব্যৱস্থাৰ প্ৰতিবেদন বিচাৰিছে।
দিল্লীৰ মহিলা আয়োগৰ মুৰব্বী স্বাতী মালিৱালে কয় যে দিল্লী বিশ্ববিদ্যালয়ত অধ্যয়ন কৰি থকা উত্তৰ-পূবৰ ছাত্ৰীসকলে অভিযোগ দিছে যে তেওঁলোকক হোষ্টেল খালী কৰিবলৈ হেচা দিয়া হৈছে। লকডাউনৰ বাবে তেওঁলোকে হোষ্টেলত থকাৰ বাহিৰে কোনো উপায় নাই।
মালিৱালে লগতে জানিবলৈ দিয়ে যে ছাত্ৰীসকলে তেওঁলোকৰ বিৰুদ্ধে জাতিগত বৈষম্যসূচক মন্তব্যৰো অভিযোগ আনিছে। এইটো এটা গুৰুতৰ অভিযোগ আৰু তালৈ লক্ষ্য কৰি আমি বিশ্ববিদ্যালয়লৈ জাননী জাৰি কৰি তাৎক্ষণিকভাৱে ব্যৱস্থা গ্ৰহণ কৰিবলৈ নিৰ্দেশ দিছো।
মহিলা আয়োগৰ মুৰব্বীগৰাকীয়ে লগতে কয় যে এনেধৰণৰ বৈষম্য কোনো কাৰণতে সহ্য কৰা নহ’ব।