ডেনিছ ঔষধ নিৰ্মাতা কোম্পানী ন‘ভ’ নৰ্ডিষ্কে বুধবাৰে ভাৰতত এউইক্লি বা ইনচুলিন আইক’ডেক নামৰ এবিধ নতুন ইনচুলিন বজাৰত মুকলি কৰিছে। টাইপ ১ আৰু টাইপ ২ ডায়েবেটিছ ৰোগীৰ বাবে তৈয়াৰ কৰা এইটোৱেই হৈছে বিশ্বৰ প্ৰথমটো সাপ্তাহিক ইনচুলিন। এই নতুন আৱিষ্কাৰৰ ফলত ডায়েবেটিছ ৰোগীসকলে এতিয়াৰে পৰা বছৰত ৩৬৫ টা ইনচুলিন বেজী লোৱাৰ পৰিৱৰ্তে মাত্ৰ ৫২ টা বেজী ললেই হ’ব, যিটো চিকিৎসা বিজ্ঞানৰ ক্ষেত্ৰত এক বৃহৎ সাফল্য বুলি গণ্য কৰা হৈছে।
ইনচুলিন হৈছে এবিধ হৰম‘ন যিয়ে তেজৰ পৰা গ্লুক’জ বা চেনি কোষলৈ নিয়াত সহায় কৰে আৰু তেজত চেনিৰ পৰিমাণ বাঢ়ি যোৱাত বাধা দিয়ে। সাধাৰণতে টাইপ ১ আৰু গুৰুতৰ টাইপ ২ ডায়েবেটিছ ৰোগীসকলে তেজৰ চেনি নিয়ন্ত্ৰণত ৰাখিবলৈ দৈনিক ইনচুলিন ল’বলগীয়া হয়। কিন্তু প্ৰতিদিনে বেজী লোৱাৰ ভয়তে ভাৰতত বহুতো ৰোগীয়ে ইনচুলিন লোৱাটো প্ৰায় সাতৰ পৰা ন বছৰলৈকে পিছুৱাই দিয়ে। কোম্পানীটোৱে জনোৱা মতে, এই নতুন সাপ্তাহিক ইনচুলিনবিধৰ জৰিয়তে ৰোগীৰ বেজীৰ প্ৰতি থকা এই ভয় দূৰ কৰিবলৈ চেষ্টা কৰা হৈছে।
এই নতুন ইনচুলিনবিধৰ দামে চিকিৎসক আৰু ৰোগী সকলোকে আচৰিত কৰিছে। এউইক্লিৰ ৭০০ ইউনিটৰ এটা পেকেটৰ দাম ৰখা হৈছে ২৬১১ টকা, অৰ্থাৎ প্ৰতি ইউনিটৰ দাম প্ৰায় ৩.৭৩ টকা। বৰ্তমান বজাৰত উপলব্ধ দৈনিক ইনচুলিনতকৈ ই প্ৰায় ৩০ ৰ পৰা ৪০ শতাংশ সস্তা। যিসকল ৰোগীক দৈনিক ১০ ইউনিট ইনচুলিনৰ প্ৰয়োজন হয়, তেওঁলোকে সপ্তাহত ৭০ ইউনিট ল’ব লাগিব আৰু ইয়াৰ বাবে সপ্তাহত প্ৰায় ২৬১ টকা খৰচ হ’ব। মুম্বাইৰ আগশাৰীৰ চিকিৎসক ডাঃ ৰাজীৱ কোভিলে কয় যে ইয়াৰ দাম সঁচাকৈয়ে বহুত কম আৰু ই সকলোৰে বাবে সুলভ হ’ব।
বৰ্তমান ভাৰতত প্ৰায় ১০.১ কোটি মানুহ ডায়েবেটিছ ৰোগত আৰু ১৩.৬ কোটি মানুহ প্ৰি-ডায়েবেটিছত আক্ৰান্ত হৈ আছে। ইয়াৰ উপৰিও প্ৰায় ৯ লাখ ৰোগী টাইপ ১ ডায়েবেটিছত আক্ৰান্ত। এই নতুন ইনচুলিনবিধ ফ্লেক্সটাচ নামৰ এটা পেনৰ জৰিয়তে সপ্তাহত মাত্ৰ এদিন ল‘ব লাগিব। কোম্পানীটোৱে প্ৰকাশ কৰা অনুসৰি, এই সাপ্তাহিক ইনচুলিনে তেজৰ চেনি অতি সুন্দৰভাৱে নিয়ন্ত্ৰণত ৰাখে। নতুন দিল্লীৰ চিকিৎসক ডাঃ এছ কে ৱাংনুৱে কয় যে এই সহজ পদ্ধতিৰ ফলত ৰোগীসকলে সময়মতে চিকিৎসা গ্ৰহণ কৰিবলৈ আগ্ৰহী হ’ব আৰু ই ভাৰতৰ দৰে বিশাল দেশ এখনত ডায়েবেটিছ নিয়ন্ত্ৰণৰ ক্ষেত্ৰত এক গুৰুত্বপূৰ্ণ ভূমিকা পালন কৰিব।
