মল্লযুঁজ ফেডাৰেচনৰ মুৰব্বী তথা বিজেপিৰ সাংসদ ব্রিজ ভূষণ শৰণ সিঙৰ বিৰুদ্ধে প্রতিবাদ সাব্যস্ত কৰি অহা দেশৰ তাৰকা মল্লযুঁজাৰুসকলক পুনৰ আলোচনাৰ বাবে আমন্ত্ৰণ জনোৱাৰ পিছত কিছু সময় পূৰ্বে কেন্দ্ৰীয় ক্ৰীড়া মন্ত্রী অনুৰাগ ঠাকুৰৰ বাসগৃহত উপস্থিত হয় প্ৰতিবাদী মল্লযুঁজাৰুসকলৰ প্ৰতিনিধি দল।
মল্লযুঁজাৰুসকলৰ আন্দোলনৰ নেতৃত্ব দিয়া ভাৰতৰ তাৰকা মল্লযুঁজাৰু ক্ৰমে বজৰং পুনিয়া, সাক্ষী মালিকে কেন্দ্ৰীয় মন্ত্ৰীগৰাকীৰ বাসগৃহত আলোচনাত মিলিত হয়৷ মল্লযুঁজাৰুসকলে বৈঠকত মূলত: পাঁচটা দাবী উত্থাপন কৰা বুলি জানিব পৰা গৈছে।
মল্লযুঁজাৰুসকলৰ দাবীৰ ভিতৰত আছে প্ৰধানকৈ ভাৰতীয় মল্লযুঁজ ফেডাৰেচনৰ মুক্ত আৰু নিৰপেক্ষ নিৰ্বাচন আৰু এগৰাকী মহিলা প্ৰধান নিযুক্তি। তেওঁলোকে লগতে ব্ৰিজ ভূষণ সিং বা তেওঁৰ পৰিয়ালৰ কোনো সদস্য যাতে ফেডাৰেচনৰ অংশ হ’ব নোৱাৰে, সেই দাবীও তুলিছে।
ইফালে বিগত মাহত ভাৰতৰ নতুন সংসদ ভৱন উদ্বোধন কৰাৰ দিনাই মল্লযোদ্ধাসকলে ৰূপায়ণ কৰা প্ৰতিবাদী কাৰ্যসূচীৰ বাবে তেওঁলোকৰ বিৰুদ্ধে দাখিল কৰা আৰক্ষীৰ গোচৰ উঠাই ল’বলৈ দাবী কৰিছে। সমান্তৰালভাৱে তেওঁলোকে ব্ৰিজ ভূষণ সিঙক গ্ৰেপ্তাৰৰ দাবী পুনৰাবৃত্তি কৰিছে।
উল্লেখ্য যে, শেহতীয়া পাঁচ দিনৰ ভিতৰত প্ৰতিবাদী মল্লযুঁজাৰু আৰু চৰকাৰৰ মাজত এইখন দ্বিতীয়খন বৈঠক। যোৱা শনিবাৰে সন্ধিয়া মল্লযুঁজাৰুসকলে গৃহমন্ত্রী অমিত শ্বাহৰ সৈতে বৈঠকত মিলিত হৈছিল।
ইফালে কেন্দ্ৰীয় ক্ৰীড়া মন্ত্ৰী অনুৰাগ ঠাকুৰে মল্লযুঁজাৰুসকলক আলোচনাৰ বাবে আমন্ত্ৰণ জনোৱাৰ কেইঘণ্টামানৰ পাছতে সাক্ষী মালিকে মল্লযুঁজাৰুসকলে প্ৰতিবাদৰ অন্ত পেলোৱা নাই আৰু চৰকাৰে তেওঁলোকক কি প্ৰস্তাৱ দিয়ে, তাৰ বাবে অপেক্ষা কৰি আছে বুলি মন্তব্য কৰিছিল।
তেওঁ লগতে ব্রিজ ভূষণক গ্ৰেপ্তাৰৰ দাবী জনাই চৰকাৰৰ সম্ভাৱ্য প্ৰস্তাৱ সন্দৰ্ভত খাপ পঞ্চায়তৰ নেতাৰ সৈতে আলোচনা কৰিব বুলিও উল্লেখ কৰিছিল।
