‘শৈশৱতে ধেমালিতে’ অসমীয়া চিনেমাখনে প্ৰথম অসমীয়া চিনেমা হিচাপে গ’ল্ডেন ৰীল এৱাৰ্ডলৈ বিদেশী ছবিৰ শিতানত ৬ টাকৈ শাখাৰ বাবে মনোনয়ন লাভ কৰা নকৰাক লৈ চলি থকা বিতৰ্কৰ এটা বাতৰিক লৈ প্ৰতিক্ৰিয়াৰ সৃষ্টি হৈছে।
উল্লেখযোগ্য যে অলপতে ৰাজ্যৰ এখন আগশাৰীৰ বাতৰি কাকতত প্ৰকাশ পোৱা আৰু ছচিয়েল মিডিয়াৰ সূত্ৰৰ আঁত ধৰি নৰ্থ ইষ্ট নাওৱেও বাতৰিটো পৰিৱেশন কৰিছিল। কিন্তু চলচ্চিত্ৰখনৰ কৰ্তৃপক্ষই উক্ত বাতৰিটো ভুল ধৰণে পৰিৱেশিত হোৱা বুলি অভিযোগ কৰিছে।
প্ৰকৃততে অসমীয়া ছবিখনৰ পৰিচালক বিদ্যুৎ কটকীয়ে এক প্ৰেছ বিবৃতিৰ জৰিয়তে ‘শৈশৱতে ধেমালিতে’ চিনেমাখনে গ’ল্ডেন ৰীল এৱাৰ্ডলৈ মনোনয়নৰ বাবে স্থান (shortlisted) পোৱা বুলি প্ৰকাশ কৰিছিল। কিন্তু এখন আগশাৰীৰ বাতৰি কাকতে মনোনয়ন পোৱা বুলি প্ৰকাশ কৰে। লগতে বাতৰিটোত শব্দযন্ত্ৰী অমৃত প্ৰীতমৰ বিষয়েও প্ৰকাশ পাইছিল। প্ৰকৃততে, প্ৰীতমে ফোনযোগে বাতৰিটো ভুলকে প্ৰকাশ পোৱা বুলি জনায়।
অৱশ্যে নৰ্থ ইষ্ট নাওতো বাতৰিতো মনোননয়ৰ বাবে স্থান (shortlisted) পোৱা বুলিয়েই প্ৰকাশ পাইছিল কিন্তু বাতিৰটোত প্ৰকাশ পোৱাৰ দৰে প্ৰীতমে চিনেমাখনৰ পৰিচালক বিদ্যুৎ কটকীক কোনো ধৰণৰ সমালোচনা কৰা নাছিল।
সি যি কি নহওক চলচ্চিত্ৰখনৰ জয়যাত্ৰা অব্যাহত থকাৰ সময়তে প্ৰকাশ পোৱা নেতিবাচক বাতৰি অৱশ্যেই দুৰ্ভাগ্যজনক। চলচ্চিত্ৰখনৰে আগন্তুক দিনত অধিক সাফল্য কঢ়িয়াই আনিব বুলি আশা কৰা হৈছে।
