ইৰাকৰ ৰাজধানী বাগদাদত সোমবাৰে পুৱা এক ভয়ংকৰ হত্যাকাণ্ড সংঘটিত হয়। দেশখনৰ প্ৰখ্যাত নাৰী অধিকাৰ কৰ্মী তথা বঁটাবিজয়ী সমাজকৰ্মী য়ানাৰ মহম্মদক নিজ বাসগৃহৰ সন্মুখতেই অচিনাক্ত দুৰ্বৃত্তই গুলীয়াই হত্যা কৰে। ‘অৰ্গেনাইজেশ্যন অৱ উইমেন্স ফ্ৰীডম ইন ইৰাক’ (OWFI) নামৰ সংগঠনটোৱে সদৰী কৰা অনুসৰি, মটৰচাইকেলত অহা দুজন বন্দুকধাৰীয়ে তেওঁক লক্ষ্য কৰি ধাৰাসাৰ গুলীবৰ্ষণ কৰে, যাৰ ফলত চিকিৎসাধীন অৱস্থাত তেওঁৰ মৃত্যু হয়।
সংগঠনটোৱে প্ৰকাশ কৰা অনুসৰি, সোমবাৰে পুৱা ৯ বজাত য়ানাৰ মহম্মদ নিজৰ বাসগৃহৰ বাহিৰত থকা অৱস্থাতে এই আক্ৰমণৰ বলি হয়। দুৰ্বৃত্তৰ গুলীত গুৰুতৰভাৱে আহত হোৱা সমাজকৰ্মীগৰাকীক ততাতৈয়াকৈ চিকিৎসালয়লৈ লৈ যোৱা হয় যদিও চিকিৎসকে সকলো প্ৰচেষ্টাৰ অন্তত তেওঁক মৃত ঘোষণা কৰে। ইতিমধ্যে OWFI-এ এই জঘন্য হত্যাকাণ্ডৰ আঁৰৰ অপৰাধীসকলক শীঘ্ৰে বিচাৰি উলিয়াই দৃষ্টান্তমূলক শাস্তি প্ৰদান কৰিবলৈ প্ৰশাসনৰ ওচৰত দাবী জনাইছে।
উল্লেখ্য যে, হিংসা আৰু নিৰ্যাতনৰ বলি হোৱা মহিলাসকলক সুৰক্ষা আৰু আশ্ৰয় প্ৰদানৰ উদ্দেশ্যে ২০০৩ চনত য়ানাৰ মহম্মদে ‘অৰ্গেনাইজেশ্যন অৱ উইমেন্স ফ্ৰীডম ইন ইৰাক’ (OWFI) প্ৰতিষ্ঠা কৰিছিল। ইৰাকত যৌন নিৰ্যাতনৰ সন্মুখীন হোৱা মহিলা আৰু সংখ্যালঘু সম্প্ৰদায়ৰ অধিকাৰ ৰক্ষাৰ হকে আগবঢ়োৱা নিৰন্তৰ প্ৰচেষ্টা আৰু সাহসিকতাৰ বাবে তেওঁক ২০১৬ চনত নৰৱেৰ সন্মানীয় ‘ৰাফ্টো বঁটা’ৰে (Rafto Prize) সন্মানিত কৰা হৈছিল।
এই হত্যাকাণ্ডৰ বাতৰি বিয়পি পৰাৰ লগে লগে মানৱ অধিকাৰ সংগঠনসমূহৰ মাজত তীব্ৰ প্ৰতিক্ৰিয়াৰ সৃষ্টি হৈছে। ‘ৰাফ্টো ফাউণ্ডেচন’-এ এক শোকবাৰ্তাত কয় যে আমাৰ সময়ৰ এগৰাকী অন্যতম সাহসী মানৱ অধিকাৰ কৰ্মীৰ ওপৰত হোৱা এই নিৰ্মম আক্ৰমণত তেওঁলোক গভীৰভাৱে মৰ্মাহত। ফাউণ্ডেচনটোৱে লগতে উল্লেখ কৰে যে এই হত্যাকাণ্ড কেৱল য়ানাৰ মহম্মদৰ ওপৰত হোৱা আক্ৰমণেই নহয়, বৰঞ্চ তেওঁ যিবোৰ মৌলিক মূল্যবোধ— অৰ্থাৎ নাৰীৰ স্বাধীনতা, গণতন্ত্ৰ আৰু সাৰ্বজনীন মানৱ অধিকাৰ ৰক্ষাৰ বাবে নিজৰ জীৱন উচৰ্গা কৰিছিল, তাৰ ওপৰতো এক চৰম আঘাত।
প্ৰসংগক্ৰমে, ইৰাকত মানৱ অধিকাৰ কৰ্মী আৰু বুদ্ধিজীৱীসকলৰ ওপৰত এনে ধৰণৰ আক্ৰমণ এয়াই প্ৰথম নহয়। দেশখনত দীৰ্ঘদিন ধৰি সমাজকৰ্মীসকলক লক্ষ্য কৰি হত্যা, হত্যাৰ চেষ্টা আৰু অপহৰণৰ দৰে ঘটনা সঘনাই সংঘটিত হৈ আহিছে। ইয়াৰ পূৰ্বে ২০২০ চনৰ জুলাই মাহতো বিশিষ্ট শিক্ষাবিদ তথা সমাজকৰ্মী হিচাম আল-হাছেমিক তেওঁৰ বাসগৃহৰ সমীপতে অনুৰূপ ধৰণে গুলীয়াই হত্যা কৰা হৈছিল। য়ানাৰ মহম্মদৰ হত্যাই ইৰাকত সমাজকৰ্মীসকলৰ নিৰাপত্তাহীনতাৰ দিশটোক পুনৰবাৰ উদঙাই দিছে।
