সমগ্ৰ ভাৰতবৰ্ষত কংগ্ৰেছ দলে “আধা আবাদীৰ সম্পূৰ্ণ অধিকাৰ, এতিয়া কন্ঠ নহ’ব দমন নাৰী শক্তি হ’ল আগমণ” এই মন্ত্ৰ লৈ যি কাৰ্যসূচীৰ ৰূপায়ণ কৰিছে তাৰ অংশ হিচাপে সমগ্ৰ অসমৰ ভিতৰত বৃহস্পতিবাৰে শিৱসাগৰত প্ৰথমবাৰৰ বাবে অনুষ্ঠিত কৰে। শিৱসাগৰৰ যুৱ দ’লত অনুষ্ঠিত এই কাৰ্যসূচীত মুখ্য অতিথি হিচাপে অংশ গ্ৰহণ কৰে নিখিল ভাৰত কংগ্ৰেছ কমিতিৰ যুটীয়া সম্পাদক তথা ভাৰতীয় যুৱ কংগ্ৰেছৰ তত্বাধাৱক কৃষ্ণ আলাৱাৰুজীয়ে।
আধা আবাদী সম্পূৰ্ণ অধিকাৰ শীৰ্ষক কাৰ্যসূচীৰ সভাখন উদ্বোধন কৰে আধা আবাদী সম্পুৰ্ণ অধিকাৰৰ আহ্বায়ক তথা অসম প্ৰদেশ যুৱ কংগ্ৰেছ কমিটিৰ উপ-সভাপতি অংকিতা দত্তই। উদ্ধোধনী ভাষণত অংকিতা দত্তই কয় যে, মহিলা সকলৰ বিভিন্ন অধিকাৰৰ সম্পৰ্কত সজাগতা আনিবলৈ কংগ্ৰেছে এই মঞ্চ গঠন কৰিছে। য’ত মহিলাসকলৰ বিভিন্ন সমস্যা সম্পৰ্কে মুকলিমুৰিয়াকৈ আদান প্ৰদান কৰাৰ লগতে সমস্যাসমুহৰ সমাধান কৰাৰ চেষ্টা কৰা হ’ব।
তেওঁ লগতে উল্লেখ কৰে যে, বৰ্তমানৰ বিজেপি চৰকাৰে মহিলা সকলৰ বাবে যি ধৰণে পদক্ষেপ লব লাগিছিল তেনেধৰণে ল’ব পৰা নাই।
সভাত নিখিল ভাৰত কংগ্ৰেছ কমিটিৰ যুটীয়া সম্পাদক তথা ভাৰতীয় যুৱ কংগ্ৰেছৰ তত্বাধায়ক কৃষ্ণ আলাৱাৰুজীয়ে কয় যে, মহিলাসকলক শক্তিশালী আৰু সক্ৰিয় ৰাজনীতিত অংশ গ্ৰহণৰ বাবে ভাৰতীয় যুৱ কংগ্ৰেছে এনে ধৰণৰ কাৰ্যসূচীৰ আয়েজন কৰিছে।
জিলা কংগ্ৰেংছ কমিটিৰ সাংস্কৃতিক বিভাগৰ অধ্যক্ষ মুস্তাফা খানৰ তত্বাধানত জাতীয় সংগীতেৰে অনুষ্ঠানৰ শুভাৰম্ভ কৰা হয়। অনুষ্ঠানত অসম প্ৰদেশ যুৱ কংগ্ৰেছ কমিটিৰ সভাপতি কমৰুল ইছলাম চৌধুৰী, ভাৰতীয় যুৱ কংগ্ৰেছৰ সম্পাদিকা ড০ স্মৃতিৰঞ্জন লেখা, সুভ্ৰমিত্ৰ গগৈ, জিলা কংগ্ৰেছৰ সভাপতি প্ৰমীৰ গগৈ, ৰাজ্যিক যুৱ কংগ্ৰেছৰ সাধাৰণ সম্পাদক অভিজিত বৰা, গায়ত্ৰী সন্দিকৈ, প্ৰদেশ কংগ্ৰেছৰ সম্পাদিকা পলী হাজৰিকা, লাচিত মহন, ৰফিক আহমেদকে ধৰি বহু কংগ্ৰেছ কৰ্মী উপস্থিত থাকে।
আনহাতে, বৃহস্পতি বাৰে সমগ্ৰ ৰাজ্যৰ লগতে শিৱসাগৰ জিলা কংগ্ৰেছৰ উদ্যোগত আৰু ব্লক কংগ্ৰেছৰ সহযোগত জাতিধ্বংসী নাগৰিকত্ব সংশোধনী বিধেয়ক বাতিলৰ দাবীত শিৱসাগৰ জিলা উপায়ুক্তৰ কাৰ্যালয়ৰ সন্মুখত পাঁচ ঘন্টীয়া প্ৰতীকি অনশনৰ কাৰ্যসূচীও ৰূপায়ন কৰা হয়। এই প্ৰতিকী অনশনত কংগ্ৰেছৰ বহুকেইজন বিষয়ববীয়াৰ লগতে শতাধিক কংগ্ৰেছ কৰ্মীয়ে অংশ গ্ৰহণ কৰে।